КИНОСЦЕНАРИЙ

МОСКВА ШААРЫ. НАТУРА. КҮНДҮЗ.
Пластикалык операция жасай турган клиника.

КЛИНИКАНЫН ИНТЕРЬЕРИ. КҮНДҮЗ.

Клиниканын башкы врачынын кабинети. Стенада адамдын бет түзүлүшү тартылган сүрөттөр илинип турат. Столдо бири-бирине бет маңдай эки адам отурат.
Столдун төр жагында көз айнекчен ак халат кийген жашы алтымыштарга келип калган орус улутундагы клиниканын башкы врачы ВИКТОР ВАСИЛЬЕВИЧ.
Анын маңдайында 65-70тердеги, кашка баш азиат улутундагы, тыкан костюм шым кийген, галстукчан интеллигент САКИЕВ АСМАНБЕК отурат.

БАШКЫ ВРАЧ
Сиз жакшылап ойлондуңузбу?

САКИЕВ АСМАНБЕК
Ооба, өзүңүз билесиз, башка аргам жок.

БАШКЫ ВРАЧ
Сиздин куракта кайра кайра операция жасоо өтө опурталдуу.

САКИЕВ АСМАНБЕК
Билем Виктор Васильевич, баарын түшүнөм. Бирок мекенге, туулган жерге деген кусалык баарына түртөт экен. Эгер жаш болсом көнүп кетмекмин, жада калса бак даракты да башка жерге жаш кезинде гүлдөй электе көчүрөт, болбосо куурап калат экен.
Мен сизге кусалык тууралуу бир легенда айтып берейин. Баса, убактынызды алган жокмунбу.

БАШКЫ ВРАЧ
Жок, жок айта бериңиз.

САКИЕВ АСМАНБЕК
Сиз Ысык-Көлдө болдуңуз беле?

БАШКЫ ВРАЧ
Албетте, болгом. Абдан кооз, абдан таза көл.

САКИЕВ АСМАНБЕК
Мына ошол көлдүн тескей тарабынан бир жигит күнгөй тарабынан бир кызга үйлөнөт. Кыргыздардын салты боюнча: жигит тараптан, кыздын ата-энесине абдан мыкты, айгыр тартуу кылат.
Көп өтпөй, бир күнү эртең менен тээ алыста, көл бетинде бир караан пайда болот. Улам барган сайын, караан жээкке карай жакындап келет. Кечке маал ошол караан көлдөн чыгып келет. Ал көлдүн күнгөй тарабына, кыздын ата-энесине тартууга берилген тору айгыр болуп чыгат. Ошентип, тору айгыр Ысык-Көлдүн бир жээгинен экинчи жээгине сүзүп чыгып, өзүнүн үйүрүнө жетип, анан жан берген экен. Ошол 70-80 чакырым көлдү жан үрөп сүзүп өтүүгө, кандай сезим түрткү бергенине мына ушул куракка келгенде араң түшүндүм.

БАШКЫ ВРАЧ
Абдан кызыктуу уламыш экен.

САКИЕВ АСМАНБЕК
Жок, Виктор Васильевич, бул уламыш эмес. Болгон окуя. Азыр ошол тору айгыр сүзүп чыккан жер, Торуайгыр деп аталат.

Врач Арманбекти үндөбөстө карап отурат.

САКИЕВ АСМАНБЕК
Өзүңүз уккандырсыз, азыркы бийлик сыртымдан өмүр бою түрмөгө камалсын деген өкүм чыгарган. А мен калган өмүрүмдү, түрмөдө эмес, өзүмдүн жеримин абасын жутуп, аз да болсо, эркин жашагым келет. Тоолорумду, Ысык-Көлүмдү сагындым. А дагы канча өмүрүм калды, бир кудай билет.
Өлсөм, сөөгүм ата-бабам жаткан жерде коюлса дейм.

Кашка баш, үнү каргылданып, мууну бошоп сөзүн андан ары уланта албай, чөнтөгүнөн бет аарчысын алып чыгып көзүн сүртөт.

САКИЕВ АСМАНБЕК
Кечиресиз, жаш өткөн сайын адам жашык болуп калат экен.

БАШКЫ ВРАЧ
Мен сиздин ахыбалынызды жакшы түшүнөм. Сиз көп толкунданбаңыз, баары жакшы болот. Голосовой связкаңызды да жазайбыз да.

САКИЕВ АСМАНБЕК
Ооба, антпесек үнүм өзгөчө таанымал.

БАШКЫ ВРАЧ
Операциядан кийин, өз үнүңүздү өзүңүз тааныбай каласыз, бир-эки айга чейин катуу кыйкырып, тамагыңызга күч келтирбегенге аракет қылыңыз. Баса, жакындарыңыз менен кеңештиңизби?

САКИЕВ АСМАНБЕК
Менин жараткандан башка кеңеше турган эч кимим калбады.

Башкы врач столдун үстүндө турган телефонду алат.

БАШКЫ ВРАЧ
Операционныйды даярдагыла.

ОПЕРАЦИЯ КАБИНЕТИ ИНТЕРЬЕРИ. КҮНДҮЗ.
Дубалда адамдын ар кандай бет түзүлүштөрү тартылган сүрөттөр илинип турат. Беттерине маска тагынып, ак кол кап кийген, үч врач кушеткада ээгине чейин ак шейшеп менен жабылып жаткан, Кашка башты курчап турушат. Колдорунда медициналык аспаптар.

Бири колундагы маркер менен Кашка баштын бетине, көздөрүнүн үстүнө сызык чиет. Экинчиси колундагы скальпель менен сызыктын үстүнөн тиле баштайт. Үчүнчү турган ассистент, жайыла берген канды айнек түтүкчө менен сордуруп турат.

ОФИС. ИНТЕРЬЕР. КҮНДҮЗ.
Фотоаппараттын жаркылдагы. Галстукчан азиат улутундагы адам сүрөткө түшүп атат. Жаңы паспорттүн барагы. Сүрөт чапталып жатат.
ВАННАНЫН ИНТЕРЬЕРИ. КҮНДҮЗ.
Президент күзгүдөн өзүнүн жаңы жүзүн сыйпалап, кармалап көрөт.
Медициналык маска тагынып, көзүнө көз айнек тагынат.

КАБИНЕТТИН ИНТЕРЬЕРИ. КҮНДҮЗ.
Жашы жыйырма бештерге келип калган азиат улутундагы жигит, ички чөнтөгүнөн сыртында Кыргыз Респуликасы деген жазуусу бар көк түстөгү ичине Аэрофлот деген жазуусу бар, самолеттун билети салынган паспортту алып чыгып столдун үстүнө коет.

Жүзүнө медициналык маска тагынган адам, паспортту алып чыгат. Паспортто жаңы түшкөн сүрөтү Сакиев Арманбек Сакиевич деген жазуу.
Мандайында турган азиат улутундагы жигитке кайрылат.

МАСКАЧАН
Бул кимге берилген паспорт экенин билесиңби?

ЖИГИТ
Жок, билбейт экемин.

МАСКАЧАН
А билсеңчи?

ЖИГИТ
Билбегеним өзүмө жакшы. Мага ким экени баары бир.

МАСКАЧАН
Азамат жигит экенсиң. Билеттин акчасы да ушунун ичинде.

Столдун үстүнө конверт таштайт.
Жигит конвертти алып ичине салынган долларды алып санап, чөнтөгүнө салат.

ЖИГИТ
Рахмат. Эгер проблема болуп калса кайрылып туруңуз. Ишиңизге ийгилик.

Жигит маскачандын колун кысып учурашып чыгып кетет.

Маскачан күзгүгө келип, бетиндеги маскасын алып, паспорттогу сүрөткө карап, күзгүдөгү жүзүнө салыштырат.

Терезеге басып келет. Сыртта Москванын машина менен элге толгон ызы-чуу көчөсүн карап турат.

МОСКВА ШААРЫ. ШЕРЕМЕТЬЕВО АЭРОПОРТУ. КҮНДҮЗ.
Асманга көтөрүлүп жаткан самолет.

САМОЛЕТ САЛОНУ. ИНТЕРЬЕР.
Иллюминатордон булуттарды жиреп бараткан самолеттун канаты, алдыда булуттардын астында ак карлуу тоолор көрүнө калып, кайра жоголуп кетет. Терезенин түбүндө, ак булуттарды карап буурул чач, ак көйнөкчөн жетимиштерге келип калган кыргыз улутундагы АРМАНБЕК отурат.

КЫРГЫЗСТАН. МАНАС АЭРОПОРТУНУН КҮТҮҮ ЗАЛЫ. КҮНДҮЗ.
Колуна чемодан сүйрөгөн Арманбек паспорттук текшерүүдөн өтүп жатат. Бул бетине операция жазатып, аты-жөнүн өзгөртүп, он беш жыл өткөндөн кийин өзүнүн мекенине келаткан, мамлекетин таштап качкан президент эле. Жаңы алган документи боюнча, фамилиясы Сакиев Арман Сакиевич болуп калган.
Арман Сакиевич чыга бериште жүргүнчүлөрдү күтүп турган адамдарды аралап өтүп, күтүү залын карай бет алды.

АЭРОПОРТ. ТАКСИЛЕР ТУРГАН ЖАЙ. КҮНДҮЗ
Арман таксинин арткы отургучуна отурат.
Такси ордунан жылып, аэропорттон чыгып кетет.

ТАКСИНИН САЛОНУ.КҮНДҮЗ.
Арман терезеден талаага, жол жээгинде кырка тизилип, зыпылдап өтүп жаткан бак дарактарга көз чаптырып отурат.
Таксистке кайрылат.

АРМАНБЕК
Иним, кыргызча ырың жокпу?

Таксист үндөбөстөн, кыргызча ыр коет.
Салондо, Арманды шылдыңдагансып, «Сагынганда бир келээрсиң,/Самаганда бир келээрсиң» аттуу ыр жаңырат.
Арман канчалык аракет кылса да, көзү жашылданып, таксинин терезесинен талааны карап баратат.
Чөнтөгүнөн бет аарчысын алып чыгып, таксистке байкатпай көзүн сүртөт.

ШААРДЫН КӨЧӨСҮ. НАТУРА. КҮНДҮЗ.
Такси шаарды карай келатат. Жол боюнда жайгашкан ГАЗпромдун заправкасына келип токтойт.
Таксист жигит машинадан түшүп, акчасын төлөгөнү чуркап кетет.

ТАКСИНИН САЛОНУ. КҮНДҮЗ. ШААР
Таксист машинасына бензин куюп, рульга отуруп айдап жөнөйт.

АРМАНБЕК
Жакшы заправка экен.

ТАКСИСТ
Орустардыкы да.

Арманбек терезеден шаарды карап баратат.
Жол боюнан, «Народный» магазини көрүнөт.

АРМАНБЕК
Бу, «Народный» деген продукты сатабы?

ТАКСИСТ
Ооба, казактардыкы.

Арманбек терезеден шаарды карап отурат.
Терезеден «Бета Сторес» магазини көрүнөт.

АРМАНБЕК
Бул кимдики эле?

ТАКСИСТ
Бул Түрктөрдүкү.

Арманбек үндөбөстөн карап барат.

Терезеден кычыраган ресторан көрүнөт.

Арманбек ресторанды суктана карайт.

АРМАНБЕК
Жакшы салыныптыр.

ТАКСИСТ
Бул кытайлардыкы.

Арманбек
Аа, жакшы экен.

ТАКСИСТ
Эмнеси жакшы, байке?

АРМАНБЕК
Мамлекетке инвестиция алып келип жатат да.

ТАКСИСТ
Мамлекетти четинен сатып алып жатышат да, байке.

Терезеден жалпайган үйлөр, вагондон жасалган магазиндер көрүнөт.
Таксист жигит вагон күркөлөрүнө ээк кагат.

ТАКСИСТ
Бул болсо кыргыздардыкы.

Арманбек үндөбөй калат.

ТАКСИНИН САЛОНУ. КҮНДҮЗ.
Арманбек таксистке кайрылат.

АРМАНБЕК
Иним, чаканыраак менчик мейманканага айдачы.

ТАКСИСТ
Жарайт, байке.

ТАКСИНИН САЛОНУ. КҮНДҮЗ
Арманбек үндөбөстөн шаарды карап барат.
ШААР. МЕЙМАНКАНАНЫН АЛДЫ. КҮНДҮЗ.
Такси чакан эки кабат менчик мейманкананын алдына келип токтойт.

ТАКСИНИН САЛОНУ. КҮНДҮЗ.

ТАКСИСТ
Кирип көрүнүз байке, жакпаса дагы толтура мейманкана бар.

Арманбек таксиден түшүп, мейманканага бет алат.
Таксист да Арманбектин аркасынан жөнөйт.

МЕЙМАНКАНАНЫН ХОЛЛУ. ИНТЕРЬЕР. КҮНДҮЗ.
Администратор кыз жылмая тосуп алат.

АДМИНИСТРАТОР КЫЗ
Саламатсыздарбы?

АРМАНБЕК
Саламатчылык, орун бар бекен?

Таксист Арманбектен озунуп кыз менен бакылдашып учураша кетет.

ТАКСИСТ ЖИГИТ
Салам, мына силерге клиент алып келдим. Эгер орун жок десең, экинчи келбей коем.

Кыз таксистке жылмаят.

АДМИНИСТРАТОР КЫЗ
Сен үчүн дайыма табабыз.

ТАКСИСТ ЖИГИТ
Мына байке, абдан жакшы мейманкана. Кыздары да жакшы, тамагы да жакшы.

Арманбек таксистин тамашасына жылмая күлөт.

АРМАНБЕК
Рахмат иним.

ТАКСИСТ ЖИГИТ
Сиз убара болбоңуз, жүгүңүздү мен эле алып келип берем.

Таксист сыртка чыгып кетет.
Арманбек ички чөнтөгүнөн паспортун алып чыгып кызга сунат.

АРМАНБЕК
Азырынча төрт күнгө.

АДМИНИСТРАТОР КЫЗ
Жөн эле коюңуз. Мына ачкыч. Үчүнчү бөлмө. Тамакты каалаган убакта заказ берсеңиз болот.

Таксист Арманбектин чемоданын алып кирет.
Арманбек чөнтөгүнөн капчыгын алып чыгып, акча берет.
Арманбек жигитке миңдик рубльдан экини сунат.

АРМАНБЕК
Жетеби?

ТАКСИСТ ЖИГИТ
Жетет, байке.

Таксист жигит кубанганынан акчаны шашкалактап чөнтөгүнө салат

ТАКСИСТ ЖИГИТ
Рахмат, байке. Жакшы калыңыз.

Таксист бурулуп баратып, кайра кылчаят.

ТАКСИСТ ЖИГИТ
Байке, эгер такси керек болсо бул чоң кызга чалып койсоңуз, мен дайым даярмын.

Сыртка бет алат.

МЕЙМАНКАНА. ЧАКАН БИР КИШИЛИК БӨЛМӨ. ИНТЕРЬЕР. КЕЧ.
Эшикти ичинен бекитип, үстүндөгү костюмун, галстугун чечип, шкафка илет.
Терезеге келип ачат да, сыртты карап турат.
Арманбек комнатанын шаарды караган эшигин ачып коюп, шаарды үстүнөн карап отурат.

ВАННА. ИНТЕРЬЕР. ЭРТЕҢ МЕНЕН.
Арманбек кирип, күзгүдөн өзүн карайт. Бетин кармалап көрөт. Бетин жууп, уктоочу бөлмөсүнө кирет.
Телефонду алып столдун үстүндөгү китепчени ачат.

МЕЙМАНКАНАНЫН ХОЛЛУ. ИНТЕРЬЕР. КҮНДҮЗ.
Мейманкананын администратор кызы шыңгыраган телефонду алат.

КЫЗ
Угуп атам. Жыйырма минутта келип калат. Жарайт.

МАШИНАНЫН САЛОНУ. КҮНДҮЗ.
Арманбек шаардын көчөлөрүн карап баратат.
Такси шаардан чыгып, трасса менен сызып жөнөйт.

МАШИНАНЫН САЛОНУ. КҮНДҮЗ
Арманбек бет алдын мелтирей тиктеп, үнсүз отурат.
Таксист жигит көзүнүн кыйыгы менен Арманбекти карап коет.

ТАКСИСТ
Шоферуңуз жокпу?

АРМАНБЕК
Жок иним, алыстан келатам.

Экөө бир азга үндөбөй калышат.

АРМАНБЕК
Бул жол жаңы салынган го.

ТАКСИСТ
Жети-сегиз жыл болуп калды. Көптөн бери келе элексиз го.

АРМАНБЕК
Он жылдай болду.

ТАКСИСТ
Айылыңызга баратасызбы?

АРМАНБЕК
Туулган жериме баратам. Өзүң каяктансың, иним?

ТАКСИСТ
Көлдөн болом. Мен да далай жыл чет жерде жүрүп, келгениме үч эле жыл болду.
Туугандарыңызга баратасыз го.

Арманбек оор үшкүрүнүп алат да, кайра жылмайып таксисти карайт.

АРМАНБЕК
Бир тууган агама куран окуп койоюн деп баратам, топурак сала албадым. Бир ууч топурак буюрбады…

Арманбек чөнтөгүнөн бет аарчы алып чыгып, көзүнө келе калган жашты сүртөт.

АРМАНБЕК
Кечирип кой иним, адам жаш өткөн сайын жашык болуп калат окшойт.

ТАКСИСТ
Сиздики да жакшы экен. Мен жалгыз агамдын кайда көмүлгөнүн да билбейм.

Арманбек таксист жигитти суроолуу карайт.

ТАКСИСТ
Агам экөөбүз балдар үйүндө тарбияланганбыз. Ата-энебиз жаш кезинде эле авариядан кайтыш болуп калышкан. Кийин союз тараганда, биз жашаган Кажы-Сайдагы жетимдер үйүнө мамлекет каражат бөлбөй, каралбай калгандыктан, 97 жылы, деректирибиз, акыркы торпогун сатып, баарыбызды бир автобуска салып келип, Ош базарына таштаган эле. Бечара, деректирибиздин көзүнөн жаш куюлуп, эл көп эмеспи, кайыр сурасаңар да эптеп жан багып кеткиле деп, элди аралай качканын такыр унута албайм.
Кийин бул окуя тууралуу газетага да жазышыптыр,окугандырсыз.

АРМАНБЕК
Жок, укпаптырмын. Анан эмне болду?

ТАКСИСТ
Балдардын көбү уурулук кылып, ар кимден таяк жеп, акыры түрмөгө кесилип кетишти. Кээсин кул катары Казакстанга алып кетишти деп уктум. Кыздарыбыз жаш болушса да, денесин сатып эптеп өлбөстүн күнүн көрүп кетишти.

АРМАНБЕК
Канча бала элеңер?

ТАКСИСТ
Алтымыштан ашык болчубуз. Бүт баары томолой жетимдер. Менден улуу агам, базарда иштеген бир-эки киши менен Сибирге иштегени кеткен. Эптеп чыдап тур, кийин келип алып кетем деп кеткен.
Пакистандан келгенден кийин, ошол адамдарды издеп жүрүп бирөөнү таптым. Агам Сибирде карагай басып өлүп калыптыр, сөөгүн ошол эле Сибирдин токойуна коюшуптур. Кайсыл жер экенин да билбейт экен. Ошентип жалгыз агамдын сөөгү кай жерде көмүлгөнүн да билбейм.

Таксист үндөбөй калат.

АРМАНБЕК
Кап, жаман болгон экен. А Пакистанга кандайча барып калдың?

ТАКСИСТ
Базарда тачки түртүп, балдар менен иштеп жүргөм. Бир күнү, бир чоң курсак адам, ит уруштурган жерге алып барды. Көрсө, ошол жерде кээ бир күндөрү акча сайып, жаш балдарды мушташтырат экен. Ошол чоң курсак киши көп акча табасың деп, мени алып барып мушташтырды. Биринчи күнү эле бир баланы сабап, акча таап алдым. Кийин дагы алып барып мушташтырды. Катуу таяк жесем да, эки баланы жеңип алдым. Бир топ акча алдым.
Бир күнү баягы киши келип, бир кычыраган офиске алып барды, ал жерде эки сакалчан адам отуруптур. Алар Пакистандан келишиптир. Ал жерде мага окшогон ондон ашык бала бар экен. Үч-төрт кыз да бар болчу. Ошол жерден эле биздин ден соолугубузду текшерип, чет мамлекетке барып окуйсуңар дешти. Көрсө, тигил чоң курсак, бизди ошол пакистандыктарга сатып жибериптир.
Ошентип, баарыбызды тең Пакистанга алып барышты. Чынын айтсам, тартип катуу болгону менен, биздей жетимдер үчүн бейишке баргандай эле болчу.
Тамагыбыз кенен, кийим бүтүн, жаткан жерибиз жакшы болду.

АРМАНБЕК
Эмне максатта алып барышыптыр?

ТАКСИСТ
Барганда эле араб тилин, англис тилин катуу окутушту. Анан куранды, намазды калтырбай окуп жүрдүк. Мушташты, согуш куралдарынын түрүн, кантип жардырыш керек экенин… Кыскасы, согуштун түрүн үйрөндүк. Кыздарды да балдардай эле окутушту. Баса, жакында эле чыкпадыбы, Пакистанда мамлекеттик аскерлер менен ислам террористеринин кагылышуусунда кыргыз кыздары окко учканын, ошол кыздар да биз менен окушкан.

АРМАНБЕК
Өзүңчү?

ТАКСИСТ
Өзүм, ал жерден үч-төрт жардырууга катышып, эң мыкты жоокер катары он киши менен Сирияга бардым. Ал жерде төрт айдай согушуп, башыман жаракат алып, алты айдай дарыландым. Ошол жерден бир кыргыз кызга таанышып, акыры минтип жериме келдим.
Мына ушундай байке, эми мени милицияга алып барып тапшырып берсеңиз болот.

Таксист каткырып коет.

АРМАНБЕК
Биздин түрмө сага курорт эле болуп калат ко.

ТАКСИСТ
Түрмө деген кай жерде болсо да түрмө да, байке.

АРМАНБЕК
Калган балдар эмне болду?

ТАКСИСТ
Чынын айтсам, билбейм байке, ар кимисин ар кай жерге алып кетишчү.
Кээ бири дагы эле ошол жакта болуш керек.
Алар эми биздин мамлекетке кереги жок адамдар да.

АРМАНБЕК
Эмне үчүн?

ТАКСИСТ
Керек болсо бизди балдар үйүндө жүргөндө ойлонушат эле да. Кимге керегибиз бар, бизди сатып, биз эле эмес, жерин, элдин байлыгын сатып, акчаны гана ойлогон чоңдоргобу?

Арманбек колундагы бет аарчысы менен чекесине чыга түшкөн терин аарчыйт.

ТАКСИСТ
Анын үстүнө алар согушкандан башка эч нерсе кыла алышпайт. Тирүүлөй согуштук машиналар болуп калышкан. Чындап келсе, андай адамдардын эки жүздөйү эле бир мамлекеттин аскерин талкалап кое алышат.

Баса, ошол бизди сатып жиберген чоң курсак, азыр депутат болуп парламентте отурат. Күпүлдөп, элдин башын айлантып катуу сүйлөйт. Чынын айтсам байке, бийликте отургандарды, депутаттарды көрүп, акыр заман келатканына да ишенип кетем.

Экөө бир азга үндөбөй калышат.

ТАКСИСТ
Ырдап берейинби, байке?

АРМАНБЕК
Мейлиң иним.

Таксист созолонто ырдап кирет. Кебетеси орой, сыртынан копол көрүнгөн жигит, заматта өзгөрүлүп, адам жүрөгүн эзген обонду созот.

Асылбек Өзүбековдун «Апам жана көл» аттуу ыры. Арманбек жигитти суктана карап барат.

ЖОЛ. НАТУРА. КҮНДҮЗ.
Машина айылга кирип келет.

МАШИНАНЫН САЛОНУ. КҮНДУЗ.
Арманбек капчыгынан акча алып чыгат.

АРМАНБЕК
Иничек, ушул жерден эле токтотуп кой.

ЖОЛ. АЙЫЛДЫК КӨРҮСТӨН. НАТУРА. КҮНДҮЗ.
Машина айылдын этегинде жайгашкан көрүстөндүн жанына токтойт.

МАШИНАНЫН САЛОНУ. КҮНДҮЗ.

АРМАНБЕК
Рахмат иним. Ишиңе ийгилик каалайм. Бул жол кирең.

Арманбек жигитке акчасын берип, машинадан түшүп жөнөйт.
Таксист жигит колундагы акчасын санайт.

ЖОЛ. НАТУРА. КҮНДҮЗ.
Таксист машинадан түшүп, узап бараткан Арманбектин аркасынан чуркайт.

ТАКСИСТ
Байке, э байке.

Таксист жигит Арманбектин аркасынан жете келет.

ТАКСИСТ
Байке, сиз мага ашык берип койдуңуз. Эки миң сом жетет.

АРМАНБЕК
Жок, иним ала бер.

ТАКСИСТ
Жок, байке… эки миңге деп сүйлөшкөнбүз, жетет ошол.

АРМАНБЕК
Иним, мен сага башка жардам кыла албайм, чын дилимден берип атам. Мени капа кылба.

ТАКСИСТ
Рахмат байке, кереги жок. Алыңыз.

Таксист жигит Арманбектин колуна акчасын карматып, машинасын көздөй бет алат.

Арманбек кетип бараткан жигиттин аркасынан карап турат.
Жигит машинасына түшүп атып, Арманбеке жылмайып кол булгап кыйкырып коет.

ТАКСИСТ
Ийгилик байке!

Арманбек да жылмайып, кол булгап аркасына бурулуп, мүрзөлөрдү карай бет алат.

КӨРҮСТӨН. НАТУРА. КҮНДҮЗ.
Арманбек мүрзөлөрдү аралап, эстеликтердин бетиндеги маркумдардын сүрөттөрүн карап келет. Алыстан заңкайып көрүнгөн, өзгөчө зангырата салынган мүрзөнүн алдына келет.

Граниттин бетинде жашы жетимиштен өтүп калган адамдын сүрөтү чегилген.
Арманбек эстеликтин бетиндеги маркумдун сүрөтүн алаканы менен сылап, ооз учунан күбүрөнөт.

АРМАНБЕК
Кечирип кой байке, менден топурак буюрбады! Кечир мени! Байке… байке…

Арманбек көзүнө келген жашты бет аарчысы менен сүртүп, ыйлап жиберет. Улам барган сайын өпкөлөп ыйлап, тизелеп отуруп калат.
Эки колу менен эстеликти таянып уңулдап ыйлайт.

Жамгыр жаай баштаганда гана ордунан туруп, айылды карай бет алат.

АЙЫЛ. НАТУРА. КҮНДҮЗ.
Айылдын орто жеринде жайгашкан чоң заңгыраган үй. Арманбек дарбазанын түбүнө келип, үстү-башын оңдоп, звоногун басат.
Эч ким жооп бербейт. Кайрадан басат. Ичтен бирөөнүн басып келгени угулат да, эркек адамдын үнү чыгат.

ҮН
Ким бул?

Арманбек эмне айтаарын билбей, калп эле тамагын кырып, буйдала түшөт.

АРМАНБЕК
Саламатсыздарбы?

ҮН
Ким керек?

АРМАНБЕК
Мен, сиздин тууганыңыз болом.

Дарбаза ачылып, орто жашка келип калган Арманбектин бир тууган иниси Сарманбек баш багат.
Арманбек алдында бир тууган иниси турганына кубанып, өзүнүн өзгөргөнүн унутуп жайдаңдай түшөт.

АРМАНБЕК
Саламатсыңарбы, кандай жакшы турасыңарбы?

Сарман эски таанышындай жайдаңдаган, чоочун адамды таң кала карайт.

САРМАН
Саламатчылык. Сизге ким керек эле?

Арманбек эсине келе калат.

АРМАНБЕК
Кечиресиз, мен сиздин агаңыздын Армандын жакын санаалашы болом. Салам айтып, ал-жайын билип кой деп суранды эле.

САРМАН
Кириңиз,

Сарман эшикти ачып, Арманды ичке чакырат.

БӨЛМӨНҮН ИНТЕРЬЕРИ. КҮНДҮЗ.
Зангырап салынган үйдүн чоң бөлмөсү. Үстү тамака жайнаган столдо Арман менен Сарман отурат.

Орто жаштарга келген Сармандын аялы чай куюп отурат. Төрдө Армандын ата-энесинин сүрөтү, катарында өзүнүн президент кезинде Сармандын үй бүлөсү менен түшкөн сүрөтү илинүү.
Арман бөлмөнү кыдырата карап, көңүлү жай.

Сарман алдында өзүнөн өзү кубанып отурган чоочун адамга дагы эле шектүү карап, анча ачыла бербей сыпайы мамиле кылып отурат.

САРМАН
Тез-тез чалып турчу эле, бир айдан бери такыр кабар жок. Аялынан сурасак чет өлкөгө кеткен деп койду. Телефону өчүк. Акыркы убактарда көп сүйлөшкүсү да келбей калган.

АРМАНБЕК
Ооба, кайсыл өлкөгө кеткенин билбейм, бирок илимий иштери менен көп убакытка жок болом дегендей айтты эле.

САРМАН
Акыры келет да. Сиз бирге иштейсизби?

АРМАНБЕК
Ооба, мен да ошол тармакта иштейм. Туугандарымды билип кой деп абдан суранды эле.

САРМАН
Рахмат. Кудайга шүгүр.Баары эле дурус. Эгер бул жерде башка жумушуңуз болбосо, шашпай конок болуп кетпейсизби?

АРМАНБЕК
Рахмат иним, мен кетишим керек. А бул айылдан шаарга таксилер каттайбы?

САРМАН
Мен азыр шаарга чыгайын деп аткам, эгер кааласаңыз ала кетем.

АРМАНБЕК
Рахмат, жакшы болбодубу.

ЖОЛ. НАТУРА. КҮНДҮЗ.
Сармандын джип машинасы шаарды карай кеткен трасса менен кетип баратат.

МАШИНАНЫН САЛОНУ. КҮНДҮЗ.
Арман терезеден талаага көз чаптырып отурат.

АРМАН
Жолду абдан жакшы салышыптыр.

САРМАН
Кытайлар салды, биздикилер качан бир нерсе салчу эле.

АРМАН
Агаңыз, акыры келсем деген ою бар, сизге айткандыр.

САРМАН
Келгенде эмне, аны бул жерде ким эле кубанып күтүп атыптыр. Соттон башка…

АРМАН
Силердин жаныңарда, туугандарынын жанында болгусу келет да.

САРМАН
Келбей эле койгону жакшы, ансыз да элге-журтка жек көрүндү болуп, эки киши кошулган жерден качып жашап жүрөбүз. Агабыз да ошонун айынан: уятына намысына чыдабай кете берди.

АРМАН
Мен ойлойм, агаңыз абдан жакшы иштеди. Саясат өзү абдан булганыч нерсе экен да.

САРМАН
Булганыч болсо эмне, балдарын саясатка сүйрөдү. Өзүңүз ойлоп көрсөңүз. Аялы башкарганы аз келгенсип, эки баласын депутаттыка сүйрөп, бир келесоо баласына мамлекеттин казынасын башкартып койбодубу!

АРМАН
Сиз агаңызды жакшы билбейт окшойсуз.

САРМАН
Туура айтасыз, билген эмес экенбиз. Көрсө ит экен! Уялбай да өткөндө интервью бериптир. Алакандай Кыргызстандын экономикасын талкалап салып. Европанын экономикасын кантип өстүрүш тууралуу, илимий иш жазып жатам деп. Билим алганы эле болбосо, акылы нөл. Бир ууч элди башкара албай, тентитип жиберди! Түшүнөсүзбү, бир ууч эмгекчил, ишенчээк элди чачыратып жибербедиби, дагы жакшы, акыры кубаланып тынды. Болбосо мамлекетти жок кылып тынмак!
Жөн кетпей канчалаган адамды өлтүрүп кетти! Өзүнүн элине ок атты!!! Акмак!!!

АРМАН
Менимче, сиз өтө эле катуу кеттиңиз окшойт. Кантсе да агаңыз да.

САРМАН
Урдум ошондой аганы. Чет өлкөдө жыргап жүрөт. Бизди ойлоп да койгон жок. Ошонун айынан бүт элге жек көрүнүп бүттүк.

АРМАН
Сиз антпеңиз, ал да туулган жерине келсем деп, куса болуп жүргөндүр.

САРМАН
Тапкан экенсиз, куса боло турган кишини! Кечирип коюңуз, анда ата-мекен, эл-жер деген түшүнүк да жок. Андай немелерге акча, байлык болсо болду! Болбосо атасынын башына качабы? Эл эмне аны өлтүрүп коет беле?
Элден кечирим сурап, бийлигин өткөрүп берсе, эл муну жөн эле көкөлөтүп көтөрүп алат эле да. Эгер өлсө да өз жеринде өлүп, ата-бабасынын жанында жатмак. Тигине, Ельцин, кандай кадыр-баркы менен кетти. Жанагы бырыйган катыны менен ач көз баласы өл десе өлүп, бок же десе бок жеп калган.

АРМАН
Сиз саясатты түшүнбөйсүз да.

САРМАН
Любой саясат, мамлекеттин, элдин кызыкчылыгы үчүн жасалат. Анын саясаты катын-балдары үчүн эле болгон! Мына жыйынтыгы!

АРМАН
Эми башкаларды айтпаганда да, сизге көп эле жакшылык кылды да.

САРМАН
Эмне жакшылык кылыптыр?!

АРМАН
Сизди окутту, үйлөндүрдү. Чоң кызматка отургузду. Эки жүз-үч жүз гектар жерди менчиктеп берди.

САРМАН
(башын чайкап)
Чынында эле өтө жакын адамы окшойсуз? Дагы эмне кылдым деп айтты?

АРМАН
Негизи, адамдын жакшылыгын унутпаш керек.

САРМАН
Сиз эмне адвокат болуп атасыз?!

АРМАН
Кечиресиз, мен болгонун айтып атам.

САРМАН
Эмне болгонун кайдан билесиз?

АРМАНБЕК
Жада калса кайындарыңыздан бери бакты го. Жакшылыгын көрүп алып, адамды жамандаган күнөө болот.
Ошол агаңыздын аркасы менен оокат кылып жүрөсүз! Сиздин да далай кемчилигиңиз бар.

Сарман машинасын жолдун боюна токтотот.
Өзү машинадан түшүп келип, Арман отурган капталындагы эшикти ачат.

САРМАН
Түшүңүз! Түшүңүз деп атам!

Арман үндөбөстөн машинадан түшөт.
Сарман машинасына отуруп терезеден башын чыгарып ашата сөгөт.

САРМАН
Эй, адвокат… айтып кой досуңа! Эгер Кыргызстанга келе турган болсо, эң биринчи мына мен өзүм соттойм!

Машинасын чаңдата айдап кетет. Арман кетип бараткан машинаны узата карап, илкий басып жөнөйт.

ДАРЫЯНЫН ЖЭЭГИ. НАТУРА. КЕЧ
Арман шар аккан сууну боюнда отурат. Көйнөгүн, шымын чечип, сууга кирет.

Сууга чөмүлүп, жаш балача ары-бери чумкуп алат да жээкке чыгып көмкөрөсүнөн колдорун жайып, жерди кучактап жатып калат. Чалкасынан оодарылат.
Асман. Булуттар. Тоолор.
Арманбек күн кечтеп баратканда гана ордунан туруп, костюмун, туфлисин кийип, трассаны карай бет алат.

ЖОЛ. НАТУРА. ТҮН.
Арманбек кан жолдон ары-бери өткөн машиналарга кол көтөрүп, токтотконго аракет кылат. Машина көп өткөнү менен, бири да токтобойт.

Бир жеңил машина Арманбектен өтүп барып токтойт.
Арманбек машинага келет.

АРМАНБЕК
Кечиресиз, шаарга ала кетесизби?

Жашы жыйырма беш, отуздарга келген айдоочу жигит Арманбектин бутунан башына чейин карап, жанында отурган жолдошуна кайрылат.

АЙДООЧУ
Эмне кылабыз, ала кетелиби?

Жанында отурган жигит баш ийкеп коет.

АЙДООЧУ
Отуруңуз

Арманбек машинанын аркасына отурмакчы болот.

Алдыда, айдоочунун катарында отурган жигит машинадан чыгып Арманбеке кайрылат.

ЖИГИТ
Байке, келиңиз алдына отуруп алыңыз.
Арманбек машинаны айланып келип, айдоочу жигиттин катарына отурат.

МАШИНАНЫН САЛОНУ. ТҮН.

Арманбек аркасына бурулуп, ордун берген жигитке кайрылат.

АРМАНБЕК
Рахмат, иним.

Машина ордунан жылып, караңыга кирип кетет.

ТҮН. ТРАССА. МАШИНАНЫН САЛОНУ.
Арманбек бет алдын мелтирей тиктеп барат. Айдоочу Арманбеке көзүнүн кыйыгы менен карайт.

АЙДООЧУ
Байке, эмне машинаңыз бузулуп калдыбы?

АРМАНБЕК
Жок, машинам жок.

АЙДООЧУ
Түничинде, жалгыз жолдо жүргөнүңүздөн…

АРМАНБЕК
Шарт ушундай болуп калды, иним.

АЙДООЧУ
Кайда иштейсиз?

АРМАНБЕК
Мен чет өлкөдө жашайм. Туугандарымкына учурашканы келгем.

Айдоочу жигит аркасында отурган досуна кайрылат.

АЙДООЧУ
Угуп атасыңбы, байке чет мамлекеттен келиптир!

Аркада отурган жигит да булардын сөзүнө аралашат.

АРКАДА ОТУРГАН ЖИГИТ
Чын элеби? А кайсыл мамлекеттен келдиңиз, байке?

АРМАНБЕК
Иши кылып чет жерде турам иним.

АРКАДАГЫ ЖИГИТ
Аа, айткыңыз келбесе мейли, а ким болуп иштейсиз?

АРМАНБЕК
Эми чакан бизнес кылабыз.

АРКАДАГЫ ЖИГИТ
Абдан жакшы экен байке.
Айдоочу жигит, Арманбектин колундагы алтын саатты көрөт.

АЙДООЧУ
Байке, саатыңыз аябай крутой го?

АРКАДАГЫ ЖИГИТ
Байке, өзү дагы крутой экен.

Айдоочу жигитке кайрылат.

АРКАДАГЫ ЖИГИТ
Досум, жолдун четине токтоп койчу.

НАТУРА. ТҮН. ЖОЛ.
Машина жолдун боюна токтойт.

ИНТЕРЬЕР. МАШИНАНЫН САЛОНУ. ТҮН.
Капыстан, арка жагынан Арманбектин мойнуна шап этип кайыш кур илинет. Арманбек жан талашып, курдан бошонууга аракет кылат.
Артта отурган жигит Арманбектин мойнуна илинген курду чирене тартат.

Арманбек жүзү кубарып, оозунан шилекейи агып, көздөрү чекчейип, дем ала албай кыйкылдап, жан талашып колдору менен мойнундагы курду тырмалайт.
Арманбектин катарында отурган айдоочу жигит, Арманбектин чөнтөктөрүн аңтарат. Костюмунун ички чөнтөгүнөн портмонесин алып чыгып, машинансынын бардачогуна салат. Мурдун басып, тескери бурулат.

АЙДООЧУ ЖИГИТ
Фу, неңди! Чычып салды окшойт!
Чыгар машинадан!

Айдоочу жигит сыртка атып чыгат.

Артта отурган жигит да Арманбектин мойнундагы курду бошотуп, мурдун басып, сыртка атып чыгат!

АРТТА ОТУРГАН ЖИГИТ
Тфу, бляйт! Чычып ийди!

Айдоочу жигит, какап-чакап, кекиртегин ушулап кызарып отурган Арманбекти жакадан алып, машинадан сууруп чыгат.

АЙДООЧУ ЖИГИТ
Чык, энеңди урайын сасыган!

АРМАНБЕК
Айланайын балдар, баарын алгыла, мени урбагыла, мен мурунку президентиңермин.

ЖИГИТ
Кыйраттың, чык машинадан!

Жигит Арманбекти жакадан алып сыртка сүйрөп чыгат.

ТҮН. ШААРДЫН ЧЕТИ. ЖОЛДУН БОЮ.

Айдоочу жигит менен досу Арманбекти жерге оонатып, тепкилеп уруп жатышат.

АЙДООЧУ ЖИГИТ
Костюму таза экен чеч!

Айдоочунун досу, Арманбектин колундагы саатын жулгулайт.

АЙДООЧУНУН ДОСУ,
Чеч саатты, сендей чычкактарга саат жарашпайт! Сага окшогон немелерге убал жок! Энеңди урайын десе! Элдин канын соргон прокурор окшойсуң э! Чычып ийгениңе караганда!

АЙДООЧУ
Эгер милицияга айтчу болсоң, таарынба! Машинага чычып салды, биз компенсациясын алдык деп айтабыз! Давай брат! Сийип ал эми! Ха-ха-ха!

Арманбектин үстүндөгү костюмун, колундагы саатын, бүт чечип алышат. Экөө машинага отуруп, караңгыга кирип жок болушат.

Арманбек ордунан туруп, бети-башын сыйпалап, үстүн күбүйт.

Чөнтөктөрүн сыйпалап көрүп, узап кеткен машинанын аркасынан кыйкырат.

АРМАНБЕК
Паспортум! Паспортум кана! Паспортумду таштагыла! Паспортум! Иттер! Акмактар!!

Арманбек айласы куруп, ыйлап жиберет. Көзүн колунун сырты менен сүртүп, колун жыттап көрөт. Шымынын көчүгүн кармалап, кайра колун жыттап, бетин бырыштырат. Эки жагын элеңдеп карап алып, турган жеринен шымын чечип, колуна кармап алып, шарылдап агып жаткан сууну карай чуркайт.

ТҮН. ШАР АККАН СУУНУН ЖЭЭГИ.
Арманбек дырдай жылаңачтанып, суунун жээгинде эки тизесин кучактап калчылдап отурат. Жанында, чоң таштын үстүндө трусысы менен шымы жайылып жатат.

МЕЙМАНКАНА. ЭРТЕҢ МЕНЕН. ИНТЕРЬЕР.
Сырттан үстүндөгү көйнөгү, шымы бырышып, булганган Арманбек кирет.
Администратор кызга баш ийип учурашат.

АРМАНБЕК
Саламатсыздарбы… Бөлмөнүн ачкычын берип коесузбу?

Администратор кыз Арманбекке ачкычын берип, шектүү карайт.
Арманбек ачкычты алып, шыпылдай басып бөлмөсүнө бет алат.
Администратор кыз акырын басып барып, Арманбектин аркасынан аңдып карайт.

МЕЙМАНКАНАНЫН ИНТЕРЬЕРИ. КҮНДҮЗ.
Арманбек күзгүнүн алдында жаңы кийимдерин кийип, сыртка бет алат.

ПЛОЩАДЬ. НАТУРА. КҮНДҮЗ.
Арманбек Ак үйдү курчаган темир тосмонун бойлой басып келатып, апрелде каза болгондордун тизмеси жазылган тушка келип, тизмелерди карап турган жашы жетимиштерден ашкан аялдын жанына токтоп калат.

Темир тосмого илинген тактадагы апрелде каза болгондордун фамилиялары.Аял, Арманбекке көңүл бөлбөстөн ооз учунан өзүнчө сүйлөнөт.

АЯЛ
Жалгыз балам эле, болгону жыйырма экиде эле. Жыйырма экиде! Балам ай, балам!

Аял көзүнө келген жашын сүртүп, үшкүрүнүп басып кетет.
Арманбек кетип бараткан аялды узата карап, ооз учунан күбүрөйт.

АРМАНБЕК
Кечирип койгула, мени.

Темир тосмону кармап, ак үйдү телмире карайт. Ак үйдүн жарыктары күйүп турат.

Теңселе басып бет алды жөнөйт.

КАФЕНИН ИНТЕРЬЕРИ. КҮНДҮЗ.
Бурчта стодо Арманбек жалгыз отурат. Алдында арак куюлган стакан. Тарелкада салат. Дагы бир стаканда сок.
Арманбек стакандагы аракты ичип жиберет да, бутылкадагы арактан стаканга куят.

ШААРДЫН ПАРКЫ. НАТУРА. КЕЧ.
Арманбек скамейкага келип отурат. Жанына чаар баштык көтөргөн бомж келип, мусор салынган ящикти аңтарып бир нерсе издейт. Арманбек бомжду карап отурат.
Бомж Арманбектин карап отурганына оңтойсуздана кетет.

БОМЖ
Кечиресиз, мен сизге тоскоол болгон жокмунбу?

АРМАНБЕК
Жок, жок. Эч нерсе эмес.

БОМЖ
Жада калса, бөтөлкө да калтырбай калышты.

Арманбек чөнтөгүнөн бир нече сом алып чыгып бомжко сунат.

АРМАНБЕК
Алыңыз.

Бомж Арманбекти түшүнө албай карап калат.

АРМАНБЕК
Уялбаңыз, алыңыз.

Бомж акчаны алып, шаша-буша чөнтөгүнө салат.

БОМЖ
Рахмат тууган, рахмат.

Шашкалактап, бурулуп жөнөйт. Арманбек башын салаңдатып, скамейкада отурат. Бомж кайрадан келет.

БОМЖ
Кечиресиз, тууган. Балким сизге бир нерсе керектир… Балким биздикине барып, биз менен бир аз отуруп дегендей.

Арманбек бомжду таң кала карайт.

БОМЖ
Албетте, эгер каршы болбосоңуз.

АРМАНБЕК
Каякка?

БОМЖ
Анча деле алыс эмес, бул эле жерде. Менин досторум абдан жакшы адамдар.

Арманбек ордунан турат.
Бомж Арманбектин алдына түшүп, бөжөңдөп чуркап жөнөйт.

БОМЖДОРДУН ЖАТКАН ЖЕРИ. ИНТЕРЬЕР. ТҮН.
Таштандыдан сүйрөп келишкен ящикти тегеректеп, сакал-муруттары өсүп, ичкиликтен көздөрү шишип чыккан, жаш курактары билинбеген үч эркек менен аял отурат.Бири ящикте, бири креслодо, дагы бири жерде.

Булардын арасында Арман да отурат.
Арман менен келген бомж алып келген пакетиндеги тамак-ашты жерге газета жая салып, алып чыгат. Спортсмен бомж аракты ала коюп оозун ачат.

Офицер бомж отургандарга кайрылат.

ОФИЦЕР БОМЖ
Туугандар, мына бүгүн биздин арабызда эң жакшы адам отурат. Качан бизге бирөө ушундай мамиле кылчу эле.

Арманга кайрылат.

ОФИЦЕР БОМЖ
Кечиресиз, атыңыз ким эле?

АРМАН
Арман Сакиевич.

ОФИЦЕР БОМЖ
Арман Сакиевич, менин атым, Мурат. Отставкадагы капитан. Сиз уялбаңыз, өз үйүңүздөй көрүңүз.
Бул жигиттин өз аты — Улан, бывший чемпион Республики по боксу.

Аракты көргөзүп коет.

ОФИЦЕР БОМЖ
Азыр болсо мынабу боюнча чемпион.

Мугалим бомж Арманбеке кайрылат

МУГАЛИМ БОМЖ
Кечиресиз, мен сизди бир жерден көргөндөй болуп турам. Сиз физика мугалими болуп иштеген жок белеңиз?

АРМАНБЕК
Жок, иштеген эмесмин.

Мугалим бомж, Арманбектен көзүн албастан ордуна отурат.
Офицер бомж Армандын жанында отурган аялды көргөзөт.

ОФИЦЕР БОМЖ
Бул Соня абдан мыкты врач болгон, азыр биздин менчик догдурубуз.

ВРАЧ БОМЖ
Республикалык ооруканада иштегем

Мугалим күтпөстөн эле ордунан өзү туруп, Арманга колун созот.

МУГАЛИМ БОМЖ
Эсен, тарыхтан мугалиммин.

ОФИЦЕР БОМЖ
Болчусун.

МУГАЛИМ БОМЖ
Туура айтасың, эми мен киши эмесмин. Мен итмин. Иттен да жаманмын. Мен эбак өлгөн адаммын.

Мугалим бомж чөнтөгүнөн бир даана тамеки алып чыгып чеккенге киришет.

ОФИЦЕР БОМЖ
Отставить!

Офицер бомж Арманга кайрылат.

ОФИЦЕР БОМЖ
Сиз буга көңүл бурбаңыз.

Спортсмен бомж стакандагы аракты колуна алат.

СПОРТСМЕН БОМЖ
Кана анда, таанышканыбыз үчүн.

Отургандар, стаканга куюлган аракты алып жиберишет.
Офицер бомж Арманга кайрылат.

ОФИЦЕР БОМЖ
Биз сиздин кайдан келгениңизди, кайда бараарыңызды сурабайбыз. Эң башкысы, биздин арабызда отурасыз.
Кааласаңыз айтасыз, каалабасаңыз сиздин иш.

АРМАНБЕК
Мен жакында эле Россиядан келдим.

СПОРТСМЕН БОМЖ
Эгер кайра кете турган болсоңуз, мени ала кетиңиз.

АРМАНБЕК
Мен ойлойм, башка жерде султан болгуча, өз жериңде ултан болгон жакшы деп.

МУГАЛИМ БОМЖ
Жок, тууган. А мен болсо, любой жерде султан болгонуң жакшы деп ойлойм. Урдум ушундай жашоону.

Ички чөнтөгүнөн кирдеп бүткөн бир барак кат алып чыгып,Арманга кайрылат.

МУГАЛИМ БОМЖ
Сизден суранычым, эгер Москвага барып калсаңыз, бул катты Путинге берип коёсузбу.

ОФИЦЕР БОМЖ
Эгер каршы болбосоң окуп бербейсиңби.

Мугалим бомж офицер бомжду карайт.

ОФИЦЕР БОМЖ
Туура түшүн эми, мамлекеттин коопсуздугун ойлонушубуз керек да.

СПОРТСМЕН БОМЖ
Туура, окуп беришиң керек.

Мугалим бомж катты ачып отургандарга окуп берет.

Уважаемый Владимир Владимирович! Вам пишет бывший учитель истории, и гражданин Советского Союза, а ныне БОМЖГ, точнее человек без определенного места жительство и гражданства.
Живу я, а точнее существую в Кыргызской Республике, жена с детьми живут в России. В связи с потерей паспорта я не могу поехать к своей семье.
Жена инвалид и не может приехать. Куда бы я не обращался, никто не может мне помочь. Моя последняя надежда только на Ваше великодушие. (Чимкиригин шурулдата тартып, бышактап ыйлап жиберет)
Я Вас очень прошу, помогите выбраться отсюда, и получить гражданство России. Иначе, моему собачьему существованиюю скоро придет конец!

Простите за то что отнимаю Ваше драгоценное время, своими ничтожными проблемами!

С огромным уважением, и надеждой Тумарбек Касымов.

Мугалим бомж, мурдун сүртүп, катын окуп бүтүп, Арманга сунат.

(Уландысы бар)

Добавить комментарий

Ваш e-mail не будет опубликован. Обязательные поля помечены *