АҢГЕМЕ

Жылдар зымырап өтүп, жылдар менен кайран жаштыгы кайрылгыс болуп кетип жатса да отуз жаштан өтүп, кыркты чамалап калган “карт бойдок” атка акырындап ээ болгон Ашырга акыркы күндөрү жолуккан эле киши качан аял аласың дей берип тажатышчу болду.

Бара-бара ал суроолорго камдап алган түркүн жооптору да азайып, элдин арасына баргандан заарканат.

Эң таамай жоопту аталаш агасы Курманаалыга берди:

— Ай, Ашыр жүрө бербей аял алсаң боло, тиги жеңемдин колу-буту узарып, келиндин чайын ичсем дегенде эки көзү төрт болуп жүрөт.

— Байке, эки көйгөй бар, ошол көйгөйлөр чечилсе эле үйлөнөт элем.

— Ал эмне болгон көйгөй экен?

— Биринчиси, акча жок.

— Экинчисичи?

— Кыз жок.

— Биринчи көйгөйүңө жардам бере алам, экинчиңди көйгөйүңдү өзүң чеч, — дейт агасы күлүп. Анда жанында турган Ашырдын классташтарынын бири Жакып:

— Бир аз чыдай тур Куке, менин кызым мектепти бүтөрүнө аз калды”- деп атпайбы.

Буга чейин көп аял алуу жагынан айылдын рекордун коюп, 8 жолу аял алган 36 жаштагы Нурсултандыкы андан да өтүп кетти:

— Менин кетирген аялдарым биринен бири өткөн сулуулар, молдокебизге нике кыйдырган сайын мындай өңдүү-түстүү немелерди кайдан таап аласың, нике кыйып атканда кээде сага эмес эле өзүмө кыйгым келип кетет дечү эле. Жакемдин кызын күткүң келбесе, менин кетирген аялдарымдын бирин макул кылып киргизип берейин, баарынын калыңы төлөнгөн, — дептир.

Добавить комментарий

Ваш e-mail не будет опубликован. Обязательные поля помечены *