Коңшу Тажикстандын Жерге-Тал районундагы боордошторубузга өз ыктыярыбыз менен элден топтогон 1,5 тоннага чукул китепти жеткирип келген далалатыбызга туура бир ай өттү. Тилекке каршы, бир айдан бери ошол жүк Тажикстандын чегарасынан ары өткөрүлбөй жатканы Кыргыз бийлигин тынчсыздандырбаганы таң калтырат. Андан бери жаза берип калемибиз жешилди, какшай берип тилибиз тешилди!

«Азаттык» радиосунун сайтына «Жерге-Талга китебибиз жетпей калды» деп белгилүү публицист Жолдош Турдубаев, «РухЭш» сайтына мен «Тамырымды зыркыраткан Жерге-Тал» аттуу көлөмдүү макалаларды жаздык, социалдык тармактар аркылуу да кенен айтылды, ЭлТР каналы толук чагылдырды, а бирок азыркы бийликте деле эл үнүн эшиткен жандар жокпу, айтор, жергеталдык этностук кыргыздардын тагдырына расмий бийликтин кайдыгерлиги суроо жаратат… Болбосо сапарыбыздын максаты, болжолдуу курамы, датасы жөнүндө жазып, уюштуруу жагынан колдоо көрсөткүлө деп Билим, Маданият жана Тышкы иштер министрликтерине 8-апрелде кайрылуу кылганыбыздан да эч майнап болбоду.

Мамчиновниктердин кайдыгерлигине Ж.Турдубаев өз макаласында минтип токтолгон эле: «Бара тургандар биротоло такталгандан кийин бул сапар тууралуу кабарлаган биздин Билим берүү жана илим министрлигибизден Тажикстандын Билим берүү жана илим министрлигине жолдонгон расмий катты өз колум менен ТИМге алпарып, эми мурдагыдай беймарал отура бербей, ушул расмий каттын дарегине тез жетишин камсыздагыла деп өтүндүм. Бирок баягы эле бюрократиялык ыкшоолуктун айынан кат тиякка жетпей, биз ала барган китептерди чек арадан өткөрүүгө, мугалимдер менен жолугушууга уруксат ала албай убара болуп келдик. Ал кат биз кайтып келгенде деле тиякка жете элек экен!»

Жагдайдын туюкка кептелгени туурасында ЖК депутаттары аркылуу деле аткаруу бийлигине дубай салам айттырдык, деле бир ак үй, көк үйдөгүлөрдүн ордунан козголбогону эмнеси?!

Албетте, бу жерде Тажикстан тараптын кооптонуусун түшүнсөк болот. Канча жыл бою согуштан жапа жабыр тартып келген өз элинин бейпилдиги, тынчтыгы үчүн чегара көзөмөлүн катуу кармаганын биз деле кубаттайбыз. Коңшу өлкөлөрдүн чегара тартиби, коопсуздугу биз үчүн да маанилүү. Бирок этникалык кыргыздардын эне тилде китеп окуусуна шарт түзүш керектигин кошуналар да түшүнүшү кажет.

Бул республиканын билим стандарттарына шайкештеп, макулдашмайын өткөрүлбөйт деп мурда эле айтылгандыктан, окуу китептерди Ошто калтырып, жалаң адабий, методикалык, илимий-популярдуу китептерди гана иргеп алпардык эле, негизги бөлүгүнүн тизмелерин чегарадагыларга да көрсөткөнбүз. Тажикстандын Билим берүү жана илим министрлиги текшергенден кийин гана өткөрүлөт деп, бажы кампасына түшүртүшкөн.

Андан бери бир айдан ашык убакыт болду. Тизмелерди толуктап, китептердин аталыштарын орусча которуп, биздин Билим берүү жана илим, Тышкы иштер министрликтерибиз аркылуу жибергенбиз, Тажикстандагы элчиликтин электрондук почтасына да расмий каттардын көчүрмөлөрү, китептердин тизмелери жиберилген. Бирок эмне үчүн Жерге-Талга болгон иш сапарыбыздын максатын биздин чоңдор коңшу өлкөнүн расмий бийлигине жеткиликтүү түшүндүрүп берер саясат жүргүзө албайт?!

Тажикстанда жашаган этностук кыргыздардын илим-билим алууга болгон муктаждыгын канаттандырар максатта сапарга аттанарыбыз туурасында ала жаздан бери расмий бийликтегилерге канча жолу кабар айттырганыбызга кулак кагышпаса, биз эми эмне кылышыбыз керек?! Деги бизден Душанбеге расмий өкүлдөр бара албайбы же тияктагы биздин элчилик эл достугу үчүн мамиле куруу саясатын жүргүзүүгө жарабайбы?! Деги биз бийликтин кайсы бутагына кайрыла турган жердебиз?!

Жерге-Талга барарыбыз туурасында Президенттик аппараттагыларга чейин кабар айтылды. Биз билгенден президенттин алдындагы этностор, дин ж.б.  иштер боюнча атайын бөлүм, Өкмөттүн да бул жааттагы маселелере жооптуу түзүмү бар, булардан тышкары Билим, Маданият, Тышкы иштер министрликтеринде ишке билегин түрүнгөн кесипкөйлөр жокпу?!

Олжобай ШАКИР

Добавить комментарий

Ваш e-mail не будет опубликован. Обязательные поля помечены *