Чыныгы таланты бар жазуучу бир нече сапка адамдын жан дүйнөсүн козгогон терең маанини камтый алат.

Бир жолу Хемунгуэй бир нече сөздөн турган кызыктуу, кыска аңгеме жазып бере алам деп мелдеше кетет.

Ал мелдешти утуп алат:

«Кичинекей бөбөктүн батинкеси сатылат. Кийиле элек.»

Фредерик Браун эң кыска коркунучтуу аңгемелердин бирин жазган:

«Жердин акыркы жашоочусу бөлмөдө олтурган. Эшикти бирөө кагып  жатты…»

О.Генри эң кыска аңгемелердин конкурсуна катышып, кадимки аңгемедегидей эле  — башталышы, кульминациясы жана аякталышы бар кыска аңгеме жазган:

«Шофёр тамекисин күйгүзүп, бензинин текшериш үчүн бакты ачып карады. Маркум жыйырма үч жашка чыккан».

Англичандар да кыска аңгемелердин конкурсун жарыялашат. Алардын шарты боюнча аңгеме: королева, Кудай, секс, жана  бир сыр катылган сөздөр катышуусу керек болчу.

Биринчи орунду ээлеген аңгеме мындай эле:

«О, Кудай, — деди айласы кеткен королева, — боюма бүтүп калыптыр, ал аз келгенсип кимден экенин билбейм!»

Эң кыска өмүр баяндардын конкурсунда жашамал курактагы француз аялы утуптур:

«Мурда бетим жылмакай, юбкам бырышып турчу эле, а азыр бардыгы тескерисинче».

Мынакей, дагы бир нече дүйнөдөгү кыска аңгемелер. Окуп ырахат алыңыз.

Жейн Орвис: Терезе

Ританы кыйнап өлтүрүшкөндөн бери Картер терезени тиктеп олтурганы олтурган. Эч кандай телевизор, китеп окуу, кат жазышуу деген жок. Анын эмики жашоосу – терезеге тартылган пардоонун ары жагындагы көрүнгөн нерсени тиктеп олтурмай. Ага тамак алып келип берип жатышабы, ким алып келип жатат, эсеп китеби боюнча төлөмдөр төлөнүп жатабы, баары бир, ал бөлмөдөн да чыкпайт. Анын жашоосу көз алдында – жүгүрүп жүрүшкөн физькултурниктер, жыл мезгилдеринин алмашышы, ары-бери өткөн машинелер – Ританын карааны.

Картер дубалдарына кийиз капталган палаталарда терезе деген болбой турганын түшүнчү эмес.

Лариса Керкленд: Сунуш

Жылдыздуу түн. Эң ыңгайлуу учур. Шам алдында тамактануу. Жарашыктуу италия рестораны. Кыска кара көйнөк. Барпайган сулуу чач, жалжылдаган көздөр, күмүштөй таза күлкү. Чогуу жүрүшкөнүнө эки жыл болгон. Сонун убакыт! Накта сүйүү, мыкты дос, башка жан жок. Шампан алып келгиле! Колумду жана жүрөгүмдү сунуш кылам. Тизелеп, башымды ийем. Эл карап жатабы? Мейли, карай беришсин! Эң көркөм бриллиант шакек. Эки бети албыртап жанганы, жагымдуу күлкү.

Кантип, макул эмессиңби?!

Шайтан эмнени каалайт?

Эки бала, алардан узап, шашпай кетип бараткан шайтандын артынан карап турушту. Анын карегинен чачыраган сыйкырдуу нур, алигиче алардын акыл-эсин тумандатып турган.

– Уксаң, ал сенден эмне сурады?

– Менин жан дүйнөмдү. А сенденчи?

– Телефон-автоматка салганга майда тыйын сурады. Бирөөгө шашылыш чалыш керек экен.

– Кеттик, машинеге түшөлүкпү?

– Кетсе кеттик, бирок менде караманча акча калбай калды.

– Коркпо, эми акча менде толтура.

Алан Майер: Жол дагы болбоду

Денемди сыздаткан катуу оорудан ойгондум. Көзүмдү ачсам, маңдайымда медайым турган экен.

– Мистер Фуджима, – деди ал, – кудайга шүгүр деңиз, эки күн мурдакы Хиросимада бомбалоодон кийин аман калдыңыз. Азыр сиз госпиталдасыз, кудай буюрса жакшы болуп кетесиз.

Мен үнүмдү араң чыгарып суроо бердим:

– Мен кайдамын?

– Нагасакиде, – деп жооп берди медайым.

Август Салеми: Заманбап медицина

Көз уялткан машине жарыгы, кагылышкан темирлерден чыккан катуу үн, денени зыркыраткан, адам чыдагыс оору, анан жылуу, жан жыргаткан, адамды өзүнө тарткан көгүлтүр жарык.

Жон өзүн мурда болуп көрбөгөндөй бактылуу, жаш, эркин сезип, алды жактагы көгүлтүр нурду көздөй жөнөдү.

Оору менен көздү байлаган караңгы түн кайтып келди. Жон шишик баскан көздөрүн кыйналып жатып, араң ачты. Оролгон бинт, түтүкчөлөр, гипс. Эки бут такыр эле жоктой. Ыйлаган аялы.

– Кымбаттум, сен аман калдың!

Которгон Абийрбек Абыкаев

 

Добавить комментарий

Ваш e-mail не будет опубликован. Обязательные поля помечены *

Этот сайт использует Akismet для борьбы со спамом. Узнайте как обрабатываются ваши данные комментариев.