АВТОПАРОДИЯ

Холмс эртең мененки тамагын алдына койгондон баштап эле Ватсон андан көзүн албай тигиле карай баштады. Тигил анын көз карашын сезип, башын өйдө көтөрдү.

— Кана, Ватсон, эмне жөнүндө ойлонуп жатасың?— деп сурады ал.

— Эмне жөнүндө эмес, ким жөнүндө деңиз… сиз жөнүндө.

— Мен жөнүндөбү?

— Ооба. Мен сиздин эң жөнөкөй фокустарыңыз алигиче элдин кызыгуусун жаратып жатканына таң калам.

— Мен сизге кошулам, — деп койду Холмс. — Чындыгында, эсиңизде болсо, бул жөнүндө өзүм айтсам керек эле.

— Сиздин ыкмаңызды, — деп улантты Ватсон жактырбагандай, — каалаган киши оңой эле өздөштүрүп алса болот.

— Албетте, — деди Холмс күлүп. — Балким азыр эле үйрөнгөнүңүздү көргөзүп берерсиз?

— Ал оңой эле. Мисалы, эртең менен сиз бир нерсеге алагды болуп, ойлуу жүрдүңүз.

— Абдан жакшы! — деп досун мактап койду Холмс. — Аны кантип билдиңиз?

—Сиз дайыма өзүңүздү тыкан, таза алып жүрөсүз, а бүгүн сакалыңызды алганды унутуп коюпсуз.

— Оо кудайым, кандай гана сонун айттыңыз! — деди Холмс. — Мен сиздин ушунчалык жөндөмүңүз бар экенин билбептирмин, Ватсон, сиздин бүркүттүкүндөй курч көз карашыңызга дагы бир нерсе илингендир?

— Ооба, Холмс. Барлоу деген кардарыңыздын ишинде эч кандай жылыш болбоптур.

— Ушундайбы! Аны кайдан билдиңиз?

— Мен сиз ачып жаткан конверттен анын ысымын көрдүм, аны окуп бүтүп кабагыңызды чытыганыңызды байкадым.

— Азаматсыз! Сиз чындыгында эле аябагандай кыраакы экенсиз. Башка дагы байкоолоруңуз бардыр?

— Холмс, мен сизди кандайдыр бир финансалык алдамчылыкка барып жатасызбы деп корком.

— А эмне үчүн ошондой деп ойлодуңуз?

— Гезиттин бетин ачып, адегенде эле финансалык жаңылыктарды карап, мыйыгыңыздан күлүп койдуңуз.

— Аябай жакшы, Ватсон, сиз мен ойлогондон да ашып түштүңүз. Андан ары уланта бериңиз.

— Тамакка сиз халатчан эмес, кара кемсел менен келдиңиз. Демек, азыр маанилүү кардарыңыздын бирин күтүп жатасыз.

— Дагы эмнени айта аласыз?

— Мен сөзүмдү уланта берсем деле болмок Холмс, бирок ушул айткандарым менен эле токтоюн, ушул айткандарым эле, бул дүйнөдө сизден бөлөк деле акылдуу адамдар бар экенин далилдейт ко деп ойлойм.

— Ооба. Бирок менден акылсыздары да бар, — деп талаша кетти Холмс. — Андай адамдар аз болушу мүмкүн, бирок кымбаттуу Ватсон, сизди мен ошолордун арасына кошкум бар.

— А эмне себептен андай дейсиз, Холмс?

— Анан эмне дейин, кымбаттуу коллегам, сиздин байкагандарыңыз мен каалагандай так чыкпай калды.

— Сиз мени жаңылыш айтты дейсизби?

— Эми бир аз… Ирети менен айтайын. Мен сакалымды албай калганым – устараны курчутканга бергем. Халат кийбей кемсел менен келгеним – бүгүн эртең менен о, бактылуу күндөрдүн бири! — менин Барлоу деген тиш догдурга барчу күнүмдү ал кат менен билдириптир. Крикет жөнүдөгү маалымат, финансы тууралуу маалымат менен катар басылыптыр, мен “Суррей” өзүнүн “Кентке”карата бекем позициясын сактай алды болду бекен деп кызыккам. Көңүлүңүздү чөктүрбөңүз, Ватсон, уланта бериңиз! Бул сиз айткандай эң жөнөкөй фокустар, сиз аны жакын арада өздөштүрүп кетериңизге шегим жок…

1924

Которгон Абийрбек АБЫКАЕВ

Добавить комментарий

Ваш e-mail не будет опубликован.

Этот сайт использует Akismet для борьбы со спамом. Узнайте как обрабатываются ваши данные комментариев.