АҢГЕМЕ

Ошол майрам күнүнө мага бут кийим алып бермей болушту.

Шаарда даяр бут кийим саткан дүкөн жок эле. Бут кийим  тиккен жалгыз дүкөндүн тигүүчүсү жылаңаяк бутумду бир картон кагазынын үстүнө коюп, бекем басып турушумду айтты да оозуна тиштеген калемин колуна алып бутумду тегерете чийди.

Бутум чийилген картон кагаз – менин бут кийимимдин өлчөмү эле.

Күн сайын жаңы бут кийимимди кыялданам. Атамдын айтуусуна караганда бут кийимим кара анан боосу менен болот.

Эшик такылдаса эле жүгүрөм.

Бут кийимим майрамдан бир күн мурда келди. Боосу менен кара.

Ал күнү аны кийген жокмун. Кечинде жаңы бут кийимимди керебетимдин алдына жайгаштырдым.

Улам туруп  кутусунан алып аркы бетинен бир, берки бетинен бир карап кайра салып коём. Жалтыраган тепейген бут кийимимди түн ортосунда туруп канча жолу жыттадым – ким билет.

Уйку жок.

Таң агарып, эл жаңы ойгонуп баштаганда мен эбак эле бут кийимимди боорума кысып отургучта даяр отургам.

Бут кийимимди атам кийгизди.

Бутума туура келбей калды. Тар болуп бутумду кысты.

Бирок атама айткан жокмун. Ал “кыскан жокпу?” дегенде “жок” дедим. “Тар, кысып жатат” десем, бут кийимимди кайра алып кетип калышмак. Тигүүчүнүн да дароо эле жаңы бут кийим тигүүсү мүмкүн эмес эле.

Ал майрам күнү кечке бутум кысып, жаным ачышып басып жүрдүм.

Бир канча убакыт өтпөй чыдагыс болуп ооруй баштады. Эринимди кесе тиштедим. Аксай баштадым. Сурагандарга бутумду бир жерге уруп алдым деп койдум. Бирок эч кимге бут кийимимдин кысып жатканын айткан жокмун.

Мындай карап көрсөңүз, жашоо да ошол тар бут кийим сыяктуу.

Кимдир-бирөө үчүн жетпеген маяна, Кимдир-бирөө үчүн жек көргөн жумуш…

Кимдир-бирөө үчүн тар бут кийим чөйрөсү, жашаган жери, шаары, көчөсү…

Кимдир-бирөө үчүн дос, жоро-жолдош –  тар бут кийимге айланат.

Кимдир-бирөө үчүн тар бут кийим убакыт, өтпөгөн убакыт…

Кимдир-бирөө үчүн байлык, башыңызды жастаган жаздык тар бут кийим сыяктуу.

Жаныңыз кыйналып, аксай-аксай кете бересиз.

Кийин билдим, жашоо өзү тар бут кийим экендигин…

Түрк тилинен которгон Азиза Сулайманкулова

Улуттук адабиятты байытуу багытындагы котормолор конкурсу

Добавить комментарий

Ваш e-mail не будет опубликован.

Этот сайт использует Akismet для борьбы со спамом. Узнайте как обрабатываются ваши данные комментариев.