Учур адабиятын жандантуу максатында «РухЭш» сайтынын алдында эки топтон турган агенттик түзүлдү. Бири – «Нуска» котормочулар тобу, бири – «Казына» адабиятчы, сынчылар, эксперттер тобу.

«Нуска» тобундагылардын милдети – дүйнө адабиятынын өрнөктүү тексттерин жана көркөм чыгармаларын кыргыз тилине түпнускадан которуп жеткирүү. О.э. кыргыз авторлорунун тандалма чыгармаларын дүйнө элдеринин тилине которуп жайылтуу. Учурда «Нуска» тобундагылардын аракети менен бул озуйпаны турмушка ашыруу милдети жолго коюлуп келатат. Аталган топтун алдыдагы максаттары менен бул жактан тааныша аласыздар>>>>

«Казына» тобуна келсек, бул топтун мүчөлөрү буга чейин өз милдеттерин аткарып келаткан тилектештерибиз. Алар башынан бери «РухЭш» сайтынын адабий аянтча болуп түптөлүп калышына кол кабыш кылып келген туруктуу авторлорубуз жана адабиятчыларыбыз. Бул топтогулар негизинен жалпы улуттук адабияттын бүгүнкү жана эртеңки келечегине кайдыгер карабаган адабиятчылар жана адабият таануу, адабий сын жазуу өнөрүн аркалап жүргөн калемдештерибиз.

Буга дейре «Казына» тобундагылардын ар бири менен өз-өзүнчө кызматташып келсек, мындан ары алар менен уюшмалуу багытта иш жүргүзүү планын түзүп, адабий ишмердүүлүктү өнүктүрүү милдетин аркалай турган максатыбызды коомчулукка жарыялоонун учуру эми жетти…

Эмесе «Казына» тобунун мүчөлөрү менен тааныштырууга келсек:

Үмүт Култаева, Абдыкерим Муратов, Садык Алахан, Рысбек Эшматов, Айнура Кадырманбетова, Жолдош Турдубаев, Тайир Ашырбай, Аким Кожоев, Аида Эгембердиева, Нурзат Казакова, Нарсулуу Гургубаева, Азамат Омош, Залкарбек Назарматов, Абдысамат Сарала, Нуриз Өмүрбаева, Мээрим Көлбаева, Айгүл Качкынбай кызы.

Эске алчу жагдай: учурда жаш калемгерлер арасында адабий сынчылардын мектебин түзүү маселеси кырынан коюлуп келет. Андыктан улуттук адабияттын соңку көчүнө аралашып жүргөн зирек жаштардын арасынан сынчылык өнөргө, адабий ишмердүүлүккө жөндөмү бар калемгерлерди тартуу максатында Нарсулуу Гургубаева, Азамат Омош, Залкарбек Назарматов, Абдысамат Сарала, Нуриз Өмүрбаева өңдүү жаштарды аталган топко аралаштырууну эп көрдүк…

«Нуска» жана «Казына» тобундагы адабий агенттиктин мүчөлөрү жалпы улуттук адабиятыбыздын бүгүнкү жана эртеңки келечегине тиешелүү маселелерди уюшмалуу түрдө кеңешип, иштиктүү чараларды жүргүзөт. Уюшмалуулуктун негизинде гана адабий рынокко жарамдуу авторлорду ылгап, алардын чыгармалары боюнча рецензия, адабий сындар жазылып, өрнөктүү авторлорду жалпы окурман журтуна кеңири таанытуу аракетин улантат. О.э. адабий агенттик тарабынан мыкты деп таанылган авторлордун чыгармалары дүйнөнүн башка тилдерине которулат жана кыргыз тилиндеги китептери «Турар» басма үйүнүн колдоосу менен жарыкка чыгат.

Ал эми жарыкка чыккан китептердин базарын кайнатуу милдети «РухЭштин» адабий агенттигинин менеджери, жеке ишкер Эмлис Жумалиевге жүктөлөт. Учурда Эмлистин демөөрчүлүгү менен таланттуу жаш акын Садырбек Турдубек уулунун «Ыракета» аттуу ырлар жыйнагы «Турар» басмасы тарабынан жарыкка чыгар алдында турат.

«Супара» этно-комплексинде кеп-келең курган «Нуска», «Казына» тобунун айрым мүчөлөрү жана өнөктөштөр менен…

One Reply to “«РухЭштин» адабий платформасы (сүрөттөрү менен)”

Добавить комментарий

Ваш e-mail не будет опубликован.

Этот сайт использует Akismet для борьбы со спамом. Узнайте как обрабатываются ваши данные комментариев.