Саясый төөматек: Бийлик такмазалары

Кыргызстанда көп алмашкан бийликтин мүнөзү ар башка болгону менен, алар «кыргыз зеригүүдөн өлбөсүн» деген бир гана ишти катырат.

♦      ♦      ♦

- Сизге бийлик бизди келесоо санап жаткандай сезилген жокпу?

- Ал турмак мага алардыкы туурадай туюлат…

♦      ♦      ♦

- Сиз 1ден 10го чейинки шкала боюнча өкмөткө болгон ишенимиңизди көрсөтө аласызбы?

- Шкаланы нөлдөн баштасак болобу?

♦      ♦      ♦

- Сиз бийликке ишенесизби?

- Ооба!..

- Бирок ал бизди алдап келатпайбы.

- Сөздү бөлбөңүз да! Мен анын бизди дагы да алдаарына ишенеримди айткым келет.

♦      ♦      ♦

Эгер биз бийликке калп айтсак – бул кылмыш. Эгер бийлик бизге калп айтса, бул – саясат.

♦      ♦      ♦

- Убакыт – бул акча!

- Акырын, эгер өкмөт укса ал үчүн да салык төлө дейт.

♦      ♦      ♦

Ийгиликтүү бийликтин бир белгиси – элди өзүн бактылуу сезгидей кылып алдай билүүсү.

♦      ♦      ♦

Үч жайда адамдар жаман жоруктары үчүн жооп беришпейт. Алар: бала бакча, жиндикана жана өкмөт үйү.

♦      ♦      ♦

Маяна бергенде бухгалтер өз акчасын берип жаткансып аябай санагандай эле, өкмөт да акча берчү болсо өз чөнтөгүнөн бергендей милдет кылат, айтып түгөтө албайт.

♦      ♦      ♦

Заң сыртка атылып чыккыча кетип калуу – бул начар сантехниктин эле эмес жакшы өкмөттүн да иш ыкмасы.

♦      ♦      ♦

Элдин эң аш кылымдуу азыгы кесме экенине биздин өкмөт бекем ишенимде.

♦      ♦      ♦

Өкмөттүн кыялы – жигиттердин аскерге чакырылуу жашын төмөндөтүү, адамдын карчарбага чыгуу курагын өлгөнүнө чейин көтөрүү.

♦      ♦      ♦

Эгер өкмөт маянаны баалардын өсүшү менен бирдей алып кеталбаса, анда жок дегенде айды отуз күндөн он беш күнгө чейин кыскартышы керек.

♦      ♦      ♦

Бийлик ак көңүл эле, ошон үчүн ал өзүн-өзү дайыма кечирип келет, силер гана аны сөгө бересиңер.

♦      ♦      ♦

Бизде бийликти кулатууга чакырык таштоо мыйзам боюнча кылмыш болуп саналат. Сурайын дегеним: бул мыйзамдын иштебеген бийликти кулатууга тиешеси барбы?

♦      ♦      ♦

Саламаттык сактоо министрлигинен 2014-жылдан кийинки балдарга тамеки сатууга тыюу салуу боюнча сунуш түштү. Ушул эле учурда Каржы министрлиги менен Пенсиялык фонд тарабынан 2014-жылдан кийинки балдарга тамекини бекер таратуу сунушталды.

♦      ♦      ♦

Өлкөдө кризис болуп жатса өкмөт чөнтөккө кол салган бойдон басып жүрөт да!

- Мынча катуу тынчсызданыштын кереги жок.

- Кантип тынчсызданбайм! Чөнтөк меники болуп жатпайбы!

♦      ♦      ♦

Өлкө жакшы эле, бир гана эл жаман – жалкоо, көрө албас, изденбейт... Ушундай элди башкарган байкуш өкмөт. Ага жолтандабастар менен хансарайларды эле эмес зыяндуулук үчүн сүт да бериш керек.

♦      ♦      ♦

Монетаризация, субвенция, дефляция, реновация — адамдардын акыркы мыдырын тартып алыш үчүн өкмөт эмне деген гана түшүнүксүз кооз сөздөрдү ойлоп таппайт.

♦      ♦      ♦

Эгер өкмөт мүчөлөрүнөн республикалык тест боюнча сынак тапшыртса, өкмөт мүчөлөрүнүн сабатсыздыгы байкалабы же тесттин кемчиликтери көрүнөбү?

♦      ♦      ♦

- Сиз баары уурдап жатат деп наалып жатасыз. А эгерде айлык акысы менен тапкан кирешесинин өлчөмү асман жердей айырмалангандардын баарын атсак же камасак уурулук тыйылат беле?

- Сен эмне мыйзамдуу отурган бийликти кулатууга чакырык таштап жатасың, ыя!

Которгон Кубанычбек АРКАБАЕВ

Окшош материалдар

Комментарий калтырыңыз