Шайлообек ДҮЙШЕЕВ: Элчибек

ЭСКИ ДОСТОР Үй-бүлөмдү Чаектеги кайын-журтума таштап, квартира таап алган соң көчүрүп келмекчи болуп, бой иштеп жүргөндүктөн кечкисин Төкөлдөштөгү досум Нуралыныкына барып жатам. Бир жумадан кийин Нуралынын көмөгү менен ошол эле жердеги экөөбүз бири-бирибизди жакшы тааныган, журналистиканы менден бир курс кийин окуп бүткөн Кубандыкына «көчүп» алдым. Кубан бойдок, мен бой. Экөөбүз «эки бакыр-бир тукур» болуп жарашып калдык. Кубанды «журналист, жазат» деп жүрсөм, журналистикага караганда кара күүгө, калем кармаганга караганда Карамолдого жакын жан болуп чыкты. Көрсө, искусство институтун төртүнчү курстан таштап кетиптир. […]