Шайлоо такмазалары – 5

*     *     *

“Клоундарды көргүлө!” деген цирктин жарнамасы болбогондо депутатыкка талапкерлер менен болчу жолугушууга эч ким келмек эмес.

*     *     *

Шайлоо участкасына келген чал өзүнчө күңкүлдөйт:

- Кандай жакшы! О Кудайым, кандай жакшы...

Угуп калган бирөө сурайт:

- Атакеси, эмне жакшы?

- Ушул партиялардын ичинен бирөөсүнө гана добуш бергеним кандай жакшы!

*     *     *

Шайлоого барыш үчүн бизге шайлоонун чынчылдыгына же талапкердин чынчылдыгына ишенүүгө туура келет.

*     *     *

- Паспортумдагы сүрөттөн уялчу элем талапкерлердин шайлоо алдындагы кебетелерин көргөндө жоошуй түштүм.

- Сеники да эч нерсе эмес турбайбы. Мен карыздарымдан улам көчөгө баса албай калдым эле, талапкерлерди уккандан кийин ээн-эркин салып-уруп жүрчү болдум.

*     *     *

- Шайлоого бардыңбы?

- Бардым.

- Кимди шайладың?

- Кыялды эч кимге айтпоо керек!

*     *     *

Эгер шайлоо алдындагы талапкерлердин дебаты учурунда телевизордун үнүн басып, Высоцкийдин “Вань, смотри какие клоуны!” деген ырын коюп койсо дебаттар чындыкка жакын жана мындан да кызыктуу болмок.

*     *     *

- Кыргызстанда кайрадан шайлоо...

– А кимди шайлап жатасыңар?

– Жогорку Кеңештин депутаттарын.

– Кимдер талапкер?

– Жогорку Кеңештин мурдагы депутаттары.

– Деги мунуңар кимдерге керек?

– Жогорку Кеңештин мурунку жана кийинки депутаттарына.

*     *     *

– Урматтуу партиялаштарым, менин силерге эки жаңылыгым бар. Бирөө жакшы, экинчиси жаман. Кайсынысынан баштайын?

– Жакшысынан.

- Биз шайлоодо биринчи орунду алдык!

- Ур-ра!.. Жаман жаңылыгыңды айтчы.

- Бизге эч ким добуш бербептир.

*     *     *

- Аткарам Бүткөрөмович! Качан убадаларыңызды аткарып баштайсыз?

- Мага ушундай суроо бергидей силер кимсиңер?

- Сиздин талапкер кездеги шайлоочуларыңыз.

- Кайдагы талапкер, кайдагы шайлоочу?

- Шайлоо алдындагычы.

- Азыр шайлоо жок, демек талапкер да, шайлоочу да жок. Андыктан эч кандай убада да жок. Гудбай!

*     *     *

- Эмне үчүн бийлик партиясынын лидери шайлоо жыйынтыгын укканда ыйлап жиберди?

- Кулагы ооруп кетиптир.

-Бул жерде кулактын эмне тиешеси бар?

- Сени эле бирөө бийик жерге чыгарыш үчүн кулагыңдан чойсунчу...

*     *     *

– Жогорку Кеңешке бул жолку өтпөй калууңузду эмне менен түшүндүрөсүз?

– Мен неменин курмандыгы болдум...

– Эмненин курмандыгы?!

– Добуштардын туура саналышынын... Неңди!!!

*     *     *

- Шайлоодо утуп чыгыш үчүн эмне кылуу керек?

Боршайкомдон жооп:

- Шайлоого катышуу боюнча арыз бериш керек, шайлоо алдындагы штабды түзүш керек, кол топтош керек.

– Ушуну менен бүтөбү?

- Жок, бул катышыш үчүн гана, ал эми шайлоодо утуш үчүн “Биримдик” партиясы менен шайлоого баруу керек.

*     *     *

- Бул “Макалё-сакалёлор» дагы беш жыл депутат болгону калыштыбы?

– Отурбай калышты го, анткени эмдиги жылы кыямат кайым болот экен.

– Өөх! Жок дегенде ошондой болсунчу!..

*     *     *

– Мен түнү бою уктабай чыкчу болдум.

- Санаалуусуң го кургурум...

- Каяктагы санаа! Күндүзү көп уктагандыкы...

- Табышмактантпай Жогорку Кеңештин депутатымын деп эле дароо айтпайсыңбы!

*     *     *

Шайлоодо кандай аракеттенгениң анча деле маанилүү эмес, баарынан маанилүүсү санакты кандай жүргүзгөнүң.

*     *     *

Депутаттыкка талапкерге суроо:

– Саясатчы криминалдык түзүмдөрүнөн түшкөн кирешесинен казынага салык төлөшү керекпи?

– Албетте төлөйт! Эгер ал өзүн чынчыл адам деп эсептесе.

*     *     *

Айым көчөдө кетип баратып чуңкурга түшүп жыгылат. Өйдө болуусуна өтүп бараткан мырза жардамдашат.

– Рахмат жигит, сизге ыраазычылыгымды дагы кантип билдирсем экен? - дейт бутун оорутуп алган айым.

– Мен “Жегеним Кыргызстан” партиясынан шайлоого бараткан талапкермин, эгер сизге кыйынчылык жаратпаса добушуңузду бизге бериңиз?

– Кечиресиз, мен бутумду оорутпай башымдан оорукчан болсом суранычыңызды аткармак эле!!!

*     *     *

Депутат психиатрга кайрылат:

– Доктор, менин сүйлөгөнүм башка, ойлогонум башка, жасаганым бөлөк болчу болду, жардам бериңизчи.

– Камтама болбоңуз, бул айтканыңыз сиздин толук нормалдуу элдик депутат экениңиздин далили.  

*     *     *

Эгер сиз акчасын алыш үчүн адамдарга калп айтсаңыз – бул алдамчылык. Эгер сиз добушун алыш үчүн адамдарды алдасаңыз – бул саясат.

*     *     *

Эгер саясатчылар элге болгон сүйүүсүн билдирип киришсе, демек жакында шайлоо.

*     *     *

Эгер сиз добушуңузду уурдаткыңыз келбесе “Биримдикке” добуш бериңиз.

*     *     *

Депутатыкка талапкер өзүнүн катаал балалыгын шайлоочуларга айтып берип атат:

– Мен абдан жакыр үй-бүлөдө чоңойгом. Ал тургай күндүн кулагы да бизде ак кара болчу!..

*     *     *

Депутатыкка талапкерлер дебатка чыгар алдында кеңешип атышат:

- Кыйынчылыктарды жойорубузду каалашыбызча айта берели, эң негизгиси... аларды кимдер жаратып жатканы оозубуздан чыкпасын.

*     *     *

Эркек гезитти окчун коюп аялына сүйлөнөт:

– Талапкерлердин тең-жарымынын эле колунан эч нерсе келгидей эмес!

– Бирок жарымы деле жетиштүү да...

–Алардын болсо колунан баардыгы келчүдөй!!!

Которгон Кубанычбек АРКАБАЕВ

Окшош материалдар

Комментарийлер (1)

  • - Авазбек Жусупбеков

    Врач психиатрга пациент келет: - Доктор, менин айткандарым башкача, ойлогондорум башкача, жасагандарым таптакыр башкача. Эмне кылышым керек? - Сиз ким болуп иштейсиз? - Мен ЖК депутатымын! - Аа... анда түшүнүктүү. Эч капаланбаңыз. Бул сиздин кесиптик кеселиңиз...

Комментарий калтырыңыз