Чындыктын үнү жагымсыз, жагымдуу сөз жалган. Адептүү адам чеченсинбейт, чеченсинген адам калпычы.
* * *
Хансарайдын ичи кооз болсо, талааны отоо чөп басып, кампалар бош калат. Бийлик ээлери кымбат, азем кийимдерди кийинип, курч кылычтарын көтөрүп, жөнөкөй тамак-ашка тойбой, ашыкча байлык топтошот. Мунун баарын каракчылык, ысырапкорчулук дейт.
* * *
Эл бийликтен коркпосо, андан да чоң бийлик келет.
* * *
Эгерде эл өлүмдөн коркпосо, анда эмне үчүн аларды өлүм менен коркутасыңар?
* * *
Кичине нерселерден улуу нерселер чыккан сыяктуу эле, дүйнөнүн бардык балээлери майда нерселерден чыгат.
* * *
Өткөн доорлордун башталыш жолун тааный бил, бул билим бүгүнкү күнгө адаштырбай алып келүүчү жолду көрүүгө мүмкүндүк берет.
* * *
Өз ойлоруңа көңүл бур – алар аракеттериңдин башталышы.
* * *
Сабырдуулук – адеп-ахлактык жеткилеңдиктин башталышы болгон изгиликтин биринчи кадамы.
* * *
Эң мыкты курал да жакшылыктын жышааны эмес.
* * *
Өзүнө ыраазы болгон – бай адам.
* * *
Өз ченемин билген адам кызматына ыраазы. Көптү билген көп сүйлөбөйт, көп сүйлөгөн эч нерсе билбейт.
* * *
Мыйзамдар, буйруктар көбөйсө, уурулар, каракчылар көбөйөт.
* * *
Оңой жетишилген макулдашууга ишенип болбойт.
* * *
Жогорку адептүү адамдар өздөрүн адептүү деп эсептешпейт, анткени аларда жогорку адеп-ахлак бар.
* * *
Көп топтогон – көп жоготот.
* * *
Карапайым адамдар, белгилүү адамдардын таянычы, жапыз нерселер – бийиктиктин пайдубалы. Ошондуктан өздөрүн өздөрү көтөрмөлөгөн ак сөөктөр менен бийлик ээлеринин туруму күчтүү эмес, анткени алар карапайым элди өздөрүнүн таянычы катары эсептешпейт. Бул адаштыруучу жол.
* * *
Туруктуулукту билбеген ызы-чуу салып, көп катачылыктарды жаратат, туруктуулукту сезүү адамды сезимтал кылат. Сезимталдык адилеттүүлүккө алып келет.
* * *
Каниетсиздиктен оор нерсе жок.
* * *
Зыяндуу умтулууларга берилип кетүүдөн өткөн кылмыш жок.
* * *
Душманды баалабай коюудан өткөн жаман нерсе жок.
* * *
Кумардан оор күнөө жок.
* * *
Жаңы гүлдөп жаткан өсүмдүк назик жана алсыз. Кургап калган өсүмдүк катуу жана ийкемсиз. Ушундан эле назик жана алсыз жашоого жөндөмдүү экендиги көрүнүп турат.
* * *
Элди билген адам акылдуу. Өзүн тааныган адам билимдүү. Элди жеңген адам күчтүү. Өзүн жеңген адам алп.
Которгон Абийрбек АБЫКАЕВ