АСМАН ШААР КУРУЛДУ

Иштин жыйынтыгын жакшы тапшыруу үчүн абыдан жан үрөп иштегендей түр көрсөткөн сүрөткө түшүштү, андан соң жарыялашты.

Каржы аябай кетти, бирок иш алга жылбады.

АЗАП

Боор беттеги бак-шактуу үйдөн кулаган алмалардын аңкыган даамын татмакчы болуп бир алманы эми тиштейин дегенде, тестиер баланы үнү кулагына шак этти.

– Бул биздин алмалар, биздин бактан кулаган алмалар... Сиз кимсиз, эмнеге биздин үйдү карап жатасыз?

“Мен бул үйдүн мурдагы ээсимин... Силерге ушул бак-шактуу үйдү саткан, ушул көчөттөрдү отургузуп, даамын татпадым эле...” – дей албай мукактанды.

Колундагы тиш тийбеген алмасын берди да, тетири бурулуп кетти.  

СУКТАНУУ

Ал күйөөсүнүн мурунку аялын көрүп суктанды. “Ырас эле ажырашыптыр, мага окшоп күндө токмок жеп, кейпинен кетпей”, – деди зээни кейип...

БУЗУЛГАНДЫК

– Эже, мен сүйүп калдым. Бирок аны сүйөрүмдү эч айта албадым.

– Эмнеге? – эжеси анын той көйнөгүн оңдоп жатып сурады.

– Биз жашаган, биз тарбияланган коомдо, биздин жашоодо кыз бала сүйүүсүн арнаса, "бузулгандыкты" билдирет ко?! – Кыз көз жашын сүрүп алды.

А эжеси ошентип айтпаганы үчүн азыр жан дүйнөсү боорон чапкын...

СЫЙЛУУ КААЛОО

Той болуп жатты. Айтылган каалоолордун баары сулуу, үлбүрөгөн, дыкаттуу колуктуга багытталып, жакшы келин, жакшы жар, күйөөнү сыйлоону, кайын журтка жакшы кызмат кылуу жөнүндө болду.

Жылдар өтүп, үч баласы менен илмейген оорукчан келин төркүнүнө келди... Кайын журтка жакшы кызмат кылбаганы, күйөөсүн сыйлабаганы үчүн...

КУСАЛЫК

– Биз чоңоюп, жетилген жакка жаз келди ээ? Байчечекей гүл ачкандыр. Баса, мага байчечекей терип келе аласыңбы?

– Ушунча жыл Москвада жүрүп, бир да жолу байчечекей көргөн жокмун...