Бул “Жигули” Тбилиси шаарынын кабат үйлөрүнүн биринде 20 жылдан ашык турду. Болгондо да төртүнчү кабатта эй. Мунун да өзүнчө таасирдүү тарыхы бар.

1991-жылы Тбилиси шаарынын тургуну Резо Энукидзе өмүр бою кыялданган ВАЗ-2106 үлгүсүндөгү жапжаңы машинени сатып албайбы. Бирок ал машинесин айдаганга деле үлгүрбөптүр. Биринчи эле түнү белгисиз шылуундар машиненин күзгүсүн, дөңгөлөктөрүн уурдап кетишет, кашайтып.

Жаны кашайган “Жигулинин” ээси анан эмне кылсын, крандын жардамы менен авто-унааны так өзү жашаган кабат үйдүн балконуна «токтотууга» аргасыз болот. «Жакшы заман келгенге чейин машинем так ушул жерде турат», — дейт Энукидзе кошуна-колоңдун баарына. Сыягы, машине ага ушунчалык кымбат болгондуктан, «Жигулиси» үчүн жакшы заман келгенге чейин башка оңгулуктуу орун таппаса керек.

Темир тулпарын ал ушунчалык баалап, балконунда бапестеп, дайыма жууп-тазалап жүрчү экен. Ырасында ал жаңы машинесинин дөңгөлөктөрүн деле ошол бойдон алмаштырбаптыр десең.

2018-жылы көк түстүү ВАЗ-2106 жерге түшүрүлөт, тилекке каршы, ал кезде Резо Энукидзенин бу жашоодон көзү өтүп кеткен кези эле. Ал кургур темир тулпарын ушунча жыл бапестеп сактап, качандыр бир кезеңде кыялын ишке ашырмак болуп, коргоп келгенин кантесиң. Бирок аз күн мурда эле одүйнөгө өзү кете бергенин айт...  

Ошондуктан бул жашоону жакшы заманга жылдырып отурбайлы дегеним го. Адатта биз учур чакты келер чакка жылдыра бермейибиз бар эмеспи. Анан калса саресеп да салбайбыз десең. Айрым адамдар гана учур чагын куру кетирбейт. Бул да өзүнчө өнөр. Башкасынын баары балкондо тура берген ВАЗ-2106га окшош...

Булагы: https://web.telegram.org/

Которгон О`Шакир

Эгер “РухЭш” сайтынын ишмердиги токтоп калбашын кааласаңыз, бизди колдоо үчүн төмөнкү банктык эсебибизге өз каалооңузга жараша акча которо аласыз... Мбанк+996 700 532 585 жана ЭЛСОМ +996 558 080 860, МойО +996 0700532585 жана Оптима банк-4169585341612561.