СССР – газдалган суусу автоматташтырылганы эле болбосо, бул 4 миллион бакан ооздордон турган ГУЛАГ.

СССР – бийликти акылы алжыгандар башкарып, жакырчылык – нормага айланган өлкө.

СССР – эки жүздүү. Батышка каршы көз карашта болгону менен ал жакка саякаттоого эки көзү төрт, а чет өлкөдөн келген буюмдар – өмүрдөгү көз күйгүзөр табылга.

СССР – баары жаңгактай окшош. Кийимдери, тамак-ашы, ырлары, ойлору.

СССР – баардыгы дефицит, прогресстин аты-жыты да жок.

СССР – өңчөй коммуналдык квартиралар: баары бир ашкана, бир коридордо шыкалгандар. "Коңшу" деген сөз бөтөнчө мааниге ээ.

СССР – бул чет өлкөлөргө чыгууга тыюу салуу, валюталык операция үчүн түрмө, компартия чегинен тышкаркы саясый иш-аракеттердин изинен түшкөн режим.

СССР – бул жеке ишкерликке тыюу салуу. Жеке менчикке ээлик кылдырбай, адамдар өзүнөн артпаган гана мүлктүн ээси болууга тийиш. Адам өзүнө эмес, коомчулукка таандык.

СССР – бардык жерде тилиңди тишке каттырып, эркин маалыматтан ажыраткан цензура.

СССР – тынымсыз калп айтып, ичкениңди ирим, жегениңди желимге айланткан басынтуу.

СССР – бул пионер, комсомолдорду каз катар тизип алып, коомдук айыптоолорду кулак-мээге куймай. Көпчүлүктүн көзүнчө басынтуу, кимдир-бирөөнүн индивидуалдуулугун кемсинтүү.

СССР – бардык жерде таанышың барбы – танкасың, таанышың жокпу – маңкасың.

СССР – бул милитаризм менен империалисттик аң-сезимди кенедей кезден таңуулоо.

СССР – жер менен жексен кылуу.

СССР – мамлекет бизге айлык акы төлөгөндөй түр көрсөтсө, а биз өлүп-талып иштегендей түр көрсөтүү.

СССР – бул кайыр-садага күттүрүп кемсинткен мамлекет.

СССР – жеке гигиенага керектүү нерселерден жутаган өлкө.

СССР — бул жарыбагандардын жашоосу.  

СССР – көз алдыңдагы окуялардын маанисиздигин жана абсурддугун сезүү.

СССР – жеке инсандыгыңды сыйлабастык. Мектепте, институтта, жумушта болсун, – адамдык жеке абийириңди расмий түрдө жектөө норма катары эсептелет.

СССР – күнү кур эмес пропаганда, а ташжалак калбаган дүкөндөрдө керээлдин кечке кезек.

СССР – күнүгө күтүп, үрөйүң үрккөн согуш, чочулоо.

СССР – анкеталарда «жеке кызыкчылыкты коомдук кызыкчылыктан жогору коюу» деген пункт.

СССР – элге окшобогон адамга шектүү кароо.

СССР – каалаганыңды окуп, каалаганыңды көрүүдөн, угуудан куру жалак калуу.

СССР – колбасага кезекке туруп, эстен танып жыгылуу.

СССР – адамга керегиңе жарамдуу буюм-тайымдай мамиле кылуу.

СССР – бул улутуң белгиленген графа.

СССР – бул эртеңки күнүң күңүрт болсо да жашоого шүгүр деген тирилик-турмуш.

СССР – чыгармачыл акылды жерип, станокту сүйүү.

СССР – жогорудан түшүп келип, көчүк айланбаган коммуналдык ашканага чейин мурдун тыккан антисемитизм.

СССР – тандоого эч ээ кылбаган басмырлоо.

СССР — бул жетекчиңдин бөйпөңдөп көтүн жалоо. Айбаттуунун алдындагы алсыздык.

СССР – тапкан-тергениң өп-чап жеткенине маашырлануу.

СССР – жек көрүү, көрө албастык жана наадандыктын идеологиясы.

СССР – эркиндиктин келишкис каршылашы. Кылт эткен кыймылың көзөмөлдө. Абийир алдында ой-пикир айтам дечү эркиндик оозуңдан айлансын. Дайымкы декларацияларычы: чогулуштар, параддар, жалындуу кептер, жүрүштөр, план-нормалар, плакаттар, ардак такта, бет кызартчу уят такталарычы – эбегейсиз көлөмдөгү көшөгөлөрү чыныгы картинаны жаап-жашырып гана турат ко.

СССР – бул калптын арты калп. Адам табиятын зордук-зомбулук менен бузуу. Баардык адамзат баалуулуктарынын ордун чаташтыруу.

СССР – адамды суук тумшукка айлантып, жек көрсөтүп келген тарыхтагы өтө узак режим.

Биз кайрадан эле тикенектүү өз Темир тосмобуздун артындабыз, ал жерде акыр аягы ажыдаар да улуп-уңшуп, өз азыгы менен аз убакытка романтикасын уланта берет. Согуш азгырыгына тартылган биз кокобузга чейин бирөөлөрдүн канына какаган канкорго айланган ностальгия менен кайрадан кыяматтын оруна тоголондук, ал жерде бизди жазалоочулар күтүүдө.

Тарых, өнөкөт оору сыяктуу кайталанма. Анын жападан жалгыз дабасы – ажал тооруган клеткаларды өз убагында химия жолу менен дарылоо. Бирок бизде андай болбоду, биз советтик сасыган коңузду СССРден «жаңы Орусияга» сүйрөп келдик.

Булагы: https://www.facebook.com/aziz.beyshenaliev

Кыргызчалаган О`Шакир

Эгер “РухЭш” сайтынын ишмердиги токтоп калбашын кааласаңыз, бизди колдоо үчүн төмөнкү банктык эсебибизге өз каалооңузга жараша акча которо аласыз... Мбанк+996 700 532 585 жана ЭЛСОМ +996 558 080 860, МойО +996 0700532585 жана Оптима банк-4169585341612561.