(Самара Сагынбаева менен Али Токтакуновго арнайм)

        Кууш жол жалгыз. Капчыгай.
        Куласаң жер чапчымай.

Кооптуу жолдор, бурчуктар.
Конок болгом унчукпай.

         Тарс урунат ташына
         Тар жолунда машине.

Кыя жол көп: тоо кулар,
кырсык аңдып, тооруган.

          Тандап бассаң таман жол,
           тайып кетпей, аман бол.

Кудай койгон үтүрдөй,
жол үзүлөт күтүлбөй.

        Тескей толо ышкын бар,
         терип жечү кычкыл даам.

Күнгөй толо шыбак бар,
жыты аңкыйт ыраактан.

            Шаңкайган тоо бетинде
            шагыл жатат эшилме.

Ак мөңгүлүү аскадан
адам буту баспаган.

            Күнгөй, тескей кырлардан
            гүл үзүлбөйт ыргалган.

Көнөк жамгыр, нөшөргө
көнгөн бул журт көшөрмө.

           Шамал, чапкын, бороондо
           шаңдуу жашоо өрөөндө.

Бурганакта кыйсыпыр
кыз-келин саайт жылкысын.

         Улуу тоолор шамалдайт,
         уул-кыз үйдө камалбайт.

Шашты кетип жүгүрүп,
шамал, куюн тирилик.

           Жайлоо жаандан арылбай,
           жарык күнгө зар урмай.

Курганалбай бүрүшкөн
куурайт мында туристтер.

          Бороон чапкын жүдөтөт,
          болбой эле күн өтөт.

Кымызычы: ышталган,
кылк-кылк жутсаң - ыш, бал даам.

             Күнгөй, тескей арасы
             күргүштөгөн кара суу.

Ташкын дайра күн-түндөп,
таштар агат күртүлдөп.

            Кудай-таала агыткан
            куюн-куюн балыктар.

Эчким балык тутпаган -
элдик ант бар. Суктанам.

                Мылтык сунуп кийикке
                мерген чыкпайт бийикке.

Таза ушул тоолуктар -
табиятты оорутпайт.

                 Эл тоолорду аруулап,
                 эч ким чыкпайт аң уулап.

Кара-Кулжа журтундай
пейил кутсөк жулкунбай:

                   Жаратылыш тонолбойт,
                   жандык эч бир жоголбойт.

Түзөң жер аз көк жайык,
тоо боорунда чөп чабык.

                   Чалгы шилейт жигиттер,
                   чөп талашып кийиктен.

Алайкунун шартына
алкыш көнгөн калкына!

                   Чалкып жаткан өрөөнү -
                   чалгы сымал жөлөнүү.

Жолдор чекит, үтүрдөй
тыныш белги бүтүндөй.

                    Жол көп: суроо, илептей -
                    ооздо келме, тилектер...

Жар көп маңдай тушуңда,
жаның ооздун учунда.

P.S. Кооптуу жолдор, бурчуктар.
Конок болгом унчукпай.

                Кудай койгон үтүрдөй,
                жол үзүлөт күтүлбөй.

Кууш жол жалгыз. Капчыгай.
Куласаң жер чапчымай...
5-6 Май, 2024.