ЖЕҢЕМДИ ЭСТЕП ОТУРАМ
Көпүрө болуп дайрадай тунук сезимге
кат ташып жүрчү кездерим эсте, Жеңеке.
Жолукчу элек "үчөөбүз" болжоп кечинде,
Экөөңөр – жерде,
а кайниң чыгып терекке.

Кечиргин Жеңе, катыңды далай окугам,
"Бактымсың!.." десең балалык ышкым козголуп,
Эр жетип эми өзүңдү эстеп отурам,
Бактылуу күнгө уйкусуз түндө ой жоруп,
Акыркы жолу кат берген элем бешимде,
Аймалап беттен өпкөнүң алгач ошол го.

Ал кезек өттү,
кечиргин, мейли, кечирбе,
эх, билсең кандай чоңойгум келген ошондо.

ӨТҮНҮЧ
Чарк айланып ырларымда бийлейсиң,
Бийлесең да жан сырымды билбейсиң.
Алда менин акжолтоюм күйдүргүм:
"түбөлүккө мени жазып жүр" дейсиң.

Билем дечи, мага арналуу ак дилиң,
Төгүлгөн ыр сенин ар бир кирпигиң,
Орун берчи, кайрылайын бир азга
Досторума!
Санаалашка!
Таанышка!

СҮЙҮҮ
Түшүмөн чочуп ойгоном,
Ойлорум буулат, шар акпайт.
Ээрчитип чыгып ордомон
бир кайгы түндө карактайт.

Билбеймин... билбейм себебин,
Ошол түш бизге жол чапты.
Түш менен кошо келеби
же кайгы,
же бир чоң бакты.

Түз жүрөм дебейм,
Эгерим
Тазамын дебейм тазамын.
Сүйүүмдү алсаң эгерде
кошуп ал кошо азабын.

ТАПТЫРБАГАН КУСАЛЫК
Толкундар шыбырайт:
"бар, изде,
табасың!..." –
дегендей таризде.
Буулугам негедир... буулугам,
Сезимим – буюккан наристе.

Жайнаган жамалың издедим,
Жандырып ойлордун тизмесин.
Жалгашып кетким бар,
Каякта
жанаша бастырган издериң?

Чайпалат көңүлүм ой копшоп,
Чаалыккан түйшүгү бар окшоп,
Байкелеп байтерек баш чайкайт:
"таппайсың...издебе...жок-жок-жо-ок!"

Дилдирейм күздөгү бариктөй,
Кутулбас кусалык бар ичте.
Таппадым отуз кар барсам да,
Арманым – адашкан наристе.

УЙКУСУЗ ТҮН
Уйкусуз түн.
Убайымын тарткан түн.
Жарык маанай Ойду кайда жоготтум?..
Жоголгон Ой жомок болсун бүгүнчө
арзуусундай Акмөөр менен Болоттун.

Жолдун жолбун жомогубу, санаамбы,
Ыр булагы оргуп түшөт колоттон.
Ой учугун табаар бекем... табамбы
кербениндей бабаларым жоготкон.

Жоголгон Ой – жомок сындуу эрмегим,
Караңгыда капыс үмүт жандырган
Кашка жолдон күттүм эле келбедиң...
Башка жолдон өттү беле кербениң...

Сан ойлордун ааламында санааркап,
Сан жылдыздай чачыламын... чачылам.
Ушул түндү уйку көрбөй узаттым
атагы жок Акындардын атынан.

1989-жылы чыккан "Уйкусуз түндүн ырлары..." китебинен.

Эгер «РухЭш» сайтынын ишмердиги токтоп калбашын кааласаңыз, бизди колдоо үчүн төмөнкү банктык эсебибизге өз каалооңузга жараша акча которо аласыз... Мбанк + 996 700 53 25 85 жана Оптимабанк-4169585341612561.