Колдоо көрсөтүү
KY
RU
EN
TR
* * *
Гүл сулуу болгон менен жылуу болбойт. Ал эми аялзаты сулуу дагы, жылуу дагы!
* * *
Таң атканча акчага карта ойноп чыгып, анан тараарда же утпай, же уттурбай нөл-нөл болуп калсаң – ушундан өткөн кордук жок.
* * *
Кар күрөп өскөн кишинин жүрөгү таза болот.
* * *
Өлкөнү кадр менен камсыздоо – бозүйдүн түндүгүн ууктар менен карматкандай кеп. Ууктар бир эле тараптан сайыла берсе – түндүк токтобойт. Бардык жагынан сайылса гана түндүк катуу кармалат…
* * *
Аялга өзү жаман эрге тийген менен жакшы эрге тийген – бирдей эле нерсе. Баары бир кейип-кепчип, баары бир өксүп, баары бир ажылдай берет.
* * *
Мектепке жабыла кетип жаткан жаркырак окуучуларды чылпак көз менен тиктегенге болбойт.
* * *
Адамдын күчүн кара! Элдешкис эки душманды (жубайы менен “беркинисин”) бир жүрөктө жашатып – бирдей сүйүп!
* * *
Кайталагандан кайталай берип – окурмандар үчүн деле өзүм окуп салмак болдум жаңы китебимди!
* * *
“Коёндун” бир тамгасын алып койсок “Оён” болду эле – андан кайра өзүнүн жүрөгү түшүп бөжүрөсө болобу.
* * *
Поэзия – жүрөктөн жасалган мээ.
* * *
Секунд бардык багытты кыдырып-карап чыкканда гана мүнөт болот. Мүнөт бардык багытты кыдырып-карап чыкканда гана саат болот. Сен дагы турмуштун бардык жагын баамдап-көрүп чыкканыңда гана адам болосуң.
* * *
Батиңкеге батып жүргөндөн кийин – баарыбыз тең батиңкенин балдарыбыз. Демек, бири-бирибизге кыйынсый турган жөнүбүз жок.
* * *
Бурчтун ич жагы – кучак, сырт жагы – бычак.
* * *
Суй жыгыла издеген малың, ал тургай буюмуң табылганда ага карата сүйлөп жиберсең – анда эле адамдык табигый насилиңден ажырай элексиң.
* * *
Түштүк элинин сырткы жумшактыгы – өрүктөй. Бирок түштүк элинин ички катуулугу да – өрүктөй. А жумшактыкка катылган катуулуктун ичинде данек жатат…
* * *
Эмне үчүн арак 40 градус? Бул – 40 жаштан кийин абайлап ичкин, болбосо акеңди таанып каласың деген эле эскертүү.
* * *
Кедейлигиң эч нерсе эмес, кедейлигиңди жашыргандан өткөн азап жок.
* * *
Качкандар – сыпсыйда, жапжайдак талаа менен качпайт. Жок дегенде сөксөөлдөрдү, а болбосо аткулактарды, ал дагы болбой калса уйдун жампаларын аралай качат…
* * *
Кыргызды кыйналат деп аябагын. Кыргыз мейман үчүн канчалык көп чыгым тартса – ошончолук көп канагат алат. Өзү канагаттанып алсын, өзү…
* * *
Атаңар менен апаңардын туулган күндөрү – силердин да туулган күнүңөр!
* * *
Адамды кызмат-орун кыйла өйдө көтөрүп турат. Бирок кайсы бир кызмат орунду кайсы бир адам өйдө көтөрүп турган учурлар да бар.
* * *
Күйүмдүүлүгү менен сүйүмдүүлүгүн карап туруп, аялдарды чыныгы адамдар, ал эми эркектерди – адамдын алгачкы “пробалары” болсо керек деп ойлоп кетем.
* * *
Эй, ажырашам дегендер! Бул дүйнөдө аялы алтын, күйөөсү күмүш эч ким жок.
* * *
Тамыры кыркылганда дарактын чирий баштаганы аянычтуу го. Андан да дарак кыркылганда тамырынын чирий баштаганы аянычтуу.
* * *
Балдарынан кеч турган ата-эненин тарбиясы таасирсиз.
* * *
Көкүрөгүңдүн көйнөгүңдү тиреп-керип турганы-ай… Мен ошол керилип турган жердин ичинде, демек, эки көкүрөгүңдүн ортосундагы боштукта жашагым келет.
* * *
Кыргыздын азыркы “Жылдыз!” атанып жүргөн ырчыларынын дээрлик көбү жылдыз тургай, жылдызкурт дагы эмес.
* * *
Бир уучта бир ууртам суу болот. Бир кочушта үч ууртам суу болот. А бир ууртам суу – эки колуңдун биримдиги үчүн кошулган ырыскы.
* * *
Партияда жоктордун “партиясынан” күчтүү партия эч жерде жок.
* * *
Бир автордук кечемде Калыбай Осмоналиев агай минтип сурады: “Заман өзгөрүлүп атат: сен дале акын болосуңбу же аким болосуңбу?” “Албетте, мен акын болуш үчүн туулгамын. Аким болуш деле жаман эмес. Эң жаманы – “А ким?” болуп калыш.”
* * *
Сасык саясаттан качып кутулгусу келген аялдын боюнда боло калса эле бүттү – оюндагысы сөзсүз аткарылат.
* * *
Артынан айдап-кыйкырсаң мал деле басаары ырас. Айныксыз жетекчи болсоң – элди ээрчит.
* * *
Алайку менен Алай, ал турсун Чоң-Алай тутумдаш. Андыктан баарын бириктирип, “алай”, “куу”, “чоң” деген сөздөрдү да кошуп, “Чоң Алайку” деп атап койсо болчудай.
* * *
Аялынын жаштыгынын азабын тартып, ого бетер карыгандар көбөйдү.
* * *
Арак – ар ак (оңунан окусаң), арак – кара (тескерисинен окусаң). Тактап айтканда, аз ичип, оң жүрсөң – ак, ашыкча ичип, тескери кетсең – кара.
* * *
Заман бул – оттогу казан сыңары. Заман алмашканда – казан алмашкандай ичиндеги кайнаган турмуштун үстү астына, асты үстүнө куюлат. Башкача айтканда, баштагы бийик нерсенин төмөнгө түшүп, төмөн нерсенин бийикке чыкмагы бар.
* * *
Ал турсун аялыңды кызганыш үчүн дагы ден-соолук керек турбайбы.
* * *
“Ыр жазганды качан баштагансыз?” – деп сурай беришет. Мен билбеймин. Адам түш көргөндө ошол түшүнүн качан башталганын билбеген өңдүү мен дагы качан ыр жаза баштаганымды билбеймин.
* * *
Таракандар – чыныгы шаардыктар.
* * *
Эң таза аба – мончонун астындагы аба. Ал жуунуп чыкканыңда укмуш байкалат.
* * *
Жөн жүрүп карыган эч нерсе эмес. Теле экрандан түшпөй жүрүп карыган ашкере аянычтуу.
* * *
Менин ар бир ырым – окурмандарыма жазган катым.
* * *
“Кыз-келиндерге арналган ырларыңыздан улам аялыңыз урушпайбы?” – деп сурашты автордук кечемде. “Урушат, урушат. Ушу алтындай болгон аялзаты жөнүндө эмне үчүн начар жазып жатасың деп урушат”.
* * *
Машина айдасаң – Алайкуда айда! Кооптонуш деген жок, балдары менен малдары жакындай электе эле жабалактап качып турушат.
* * *
8-Мартыңар менен, ардактуу айымдар! Менин каалоом, Жараткан силерге эң кеминде өзүңөрдөй бели ичке эки сегиз – 88 жаш өмүр берсин! Эң кеминде. Үч сегиз – 888 жаш көптүк кылат – эрмектешээр эркек жок…
* * *
Жаканы эле жууй бербей, мойнуңдан да кабар ал.
