ШАКИР Олжобай: ОЛЖОБАЙ ШАКИР: КААМЫТ

Агер такка отурган күндөн тарта ички да, тышкы да саясый тирештерди жумшартуу эң чоң мааниге ээ экенин түшүнсө, жакынкы аралыкта эле баардык саясый топтор Жээнбековго сөзсүз ыктайт. Колдоп-буттап жардам берүүнү эңсеп тургандар четтен табылат. Албетте, биринчи кезекте кошоматчылар жардап чыгары турулуу иш дечи. Кудай-таала жаңы президентти ылайым ошолордон сактасын!

Буга чейин Атамбаевдин айланасында чарк айланган кошоматчылар эми Жээнбековду курчоолой турган болсо, анда иштин бүткөнү! Андале Жээнбеков өзү айтмакчы «Атамбаевдин саясатын улантууга» мажбур болот. Так ошондо мойну каамыттан чыкпаган качырдын тагдыры Жээнбековдун башына келет. Ойдун образын каамытка кийгизгенибиздин даа бир себеби: каамытты оор жүк тарта турган чобур ат же эшектин мойнуна кийгизерин бала күнүбүздөн билебиз. Атамбаев да Жээнбековго эң оор жүктү калтырып кетти. Ал оор жүк эмне? Өлкөдөгү чыңалып турган абал; кыргыз-казак чегарасындагы кырдаалдан сырткары да стратегиялык өнөктөш өлкөлөр менен ЕАЭС боюнча келишимде Кыргызстандын чабал саясат жүргүзүп келгени; жалпы эле тышкы саясаттагы байланыштардын баарында мурдагы президент салып кеткен жаракалар; 2010-жылдан берки Убактылуу өкмөттө ийиндеш иштешип келген эң жакын санаалаштары менен бири-бирине болгон тиш кайроолор; айтор, баарында тең Атамбаевдин алабармандыгынын айынан бүгүн Кыргызстандын репутациясы жетер чегине жеткенин бийликтеги бир ууч топ гана сезбей атпаса, президенттик аппараттын да, өкмөттүн да, парламенттин да ишине элдин ичи чыгып турган жок.

Кыргыз бийлигин жар кырына кептеп келген АША эми Жээнбековдун ишине мурдун тыга берер болсо жаңы президенттин мойнундагы каамыттын жүгү күндөн күнгө оорлогондой оорлой берет.

Агер Атамбаевдин жетегине түшүп бербесе, өлкөнүн жаңы президенти Сооронбай Жээнбековдун колунда тарыхый мүмкүнчүлүк туру. Ал мүмкүнчүлүктү Жээнбеков кантип колдонот, кеп ошондо! Кокус, «аталыкка» (соңку мезгилдерде тар чөйрөдө Атамбаевди шүнтип атап калышпадыбы) мурдунан жетеленип калбаса, Жээнбековдун жылдызы жанган президентке айланышы бир замат. Тез арада саясый репутация топтоо «чү» деген кадамынан эле башталат. Себеби азыр эл маанайына карасак: жаңы президентке үмүт, тилектерин артып турган кез.

Аныгында, Атамбаев буга чейин дамамат айтып келгендей; ал саясаттан кетпей турганы бештен белгилүү болуп калды. Демек, ал такка жаңы конгон Жээнбековдун саясый курсуна тоскоол болбой койбойт. Аны жөнгө салуунун бир гана жолу – жаңы президент өзү, колуна тийген тизгинге бекем болуудан бөлөк аргасы жок. Каамытты өзү эле жалгыз тартпай, өкмөт менен парламенттен сырткары да баардык саясый күчтөр менен тил табышып, жарандык коомдун акыл калчаган катмары менен тыгыз кызматташууга тийиш! Жээнбеков үчүн ошолордун кеңеши баалуу.

Арийне, азыр Жээнбековдун тегерегинде балга конгон аарыдай жабалактачу шылуундар толтура. Ал шылуундар каамыттын жүгүн эч качан жеңилдетпейт, тескерисинче…