АРКАБАЕВ Кубаныч: КУБАНЫЧБЕК АРКАБАЕВ: СЕКСИНЧИ МАРТЫҢ МЕНЕН КЕМПИР ИИ…ЫЫК…

— Алтышкам го, алтышкам ии…ыкк… Ушу сен үчүнчү, сенин мобу майрамың үчүнчү ии…ыык, аянган жокмун да эй ии…ыык… Мына бул гүлдөрдүчү… өзүң үчүн гана депчи… тээтигинден бери ии…ыык апкелдим да! Куттуктайм!.. Эмне үчүн экөө эле? Ии… хи-хи-хи жаначы ии… хи-хи-хи… Өлгөн жоксуң күчүгүм, өлгөн жоксуң, бүгүн кечке ии…ыык сенин ден соолугуң үчүн тост айтсам каяктан өлөсүң? Айлык?.. Аа алдым, алдым кемпир, ии…ыык… Ээ хи-хи-хи… Мен, Алмас, Арзымат, Жыргал болуп, айлык алып чыксакле алар тараган атышпайбы… ии…ыкк. Мен айттым: — Жарравайт! — дедим.

— Жылына бир эле жолу аялдардын майрамы келсе анан бир да тост айтпай ии… ыык… тарап кетебизби дедим дагы ортого бир жүз сомдукту көтөрүп чаптым. Алмас аракты аялы менен акчасынан да ии…ыык жакшы көрөт эмеспи элүү сом жылдырды эле, Арзымат жмот эмеспи ошончо айлыгынан ии… ыык кысылып, куушурулуп атып жыгырма сом араң сыгып чыгарды. Жылма Жыргал болсо чөнтөгүн кармалаган бойдон туруп эле калбаспы… ии ыык.

— Эмне болду? — десек.

–Акча жок, — дейт.

— Кандайча, азыр эле албадык белек? – десек хи хи хи…ии…ыык.

— Акча бар, бирок жок, — деп чөнтөгүн чапкылап коёт. Биз түшүнбөй кандайча бар, бирок жок, — деп чөнтөгүнө кол салсак сөөмөйлөр эле батып… ии…ыык калган кол батпайт хи-хи-хи… Көрсө аялы чөнтөгүн ии…ыык… тигип коюптур хи-хи-хи… Жанагы сөөмөй кирген тешиктен акчаны тыгып жиберсең ии…ыык… кайра алынбай калат экен хи-хи-хи…

Мен болбой эле айттым:

— Давай мунуң болбойт чөнтөктү сөгүп акчаны эл катары чыгар десем:

-Муну сөккөнчө мени ашата сөккүлө. Нестан өлтүрөт, — деп калтырап туруп бербедиби ии…ыык… Ошентип эки бөтөш ортого келгенде мен айттым: — Давай жигиттер ар бирибиз өз сүйгөн аялдарыбыз үчүн тост көтөрөлү деп, ии…ыык… Десем эле Алмас акең араң эле турат да андайда суусап, шаша-буша тостун аялы угуп тургандан бетер тостун айта баштады: — Оо Нуржаз, Нуржаз ужас болбой калышың үчүн, — деп тартып жиберсе, Арзымат:

— Шура оо Шура дуралыгыңдан таза, тез айыгып кетчи, — деп көтөрбөспү. Жыргал болсо аракка акча кошуп койгондон бетер стаканды бийик көтөрө берип: ии…ыык…

— Оо Нестан жаным, сен мастан болсоң дагы мен сени сүйөм, бирок мени акча жасаган машина катары санабай жүрчү мындан ары, — деп туруп аракты бир эле ап – дегенинде менин жаман жиним келип кетти ии…ыык. – Эй эркек сөрөйлөр дедим силер чын эле эркек болсоңор аялдарыңар нак аял болот эле, — дедим ии…ыык…

— Минтип майрамдары келип атса жылымтык сөздөрүңөрдү аяйсыңар. Силер кичине жакшыраак акча жасагыч машина болгонуңарда аялдарыңар үйдө күйпөлөктөп кир жуугуч, нан жапкыч, чаң соргуч, үй жыйнагыч, бала төрөгүч машина болбойт эле дедим, ии…ыык…

— Менин Алмашымдай аял жок, — деп баса айттым анан: — Алмашымды мен деген жапжаш кызга да алмаштырбайм, ага мен дүйнөдөгү баардык жакшылыктарды каалайм жана аларды белек кылууга аракет кылам, — деп туруп аппак алып жиберсем мендей бактылуу адамды ушундай суктануу менен карашты эле көздөрү тиеби деп коркуп кеттим. Ошентип эки бөтөш түгөнгүчө сөздөн сөз чыгып отуруп жанагы гендердик саясат жөнүндө талаш чыгып кетип атпайбы ии..ыык.

Жыргал:

— Гендердик деген илгери Союз убагында бийликтин үчүнчү секретарь деген бир ургаачы бутагы болгон экен, ошону калыпка келтирүү жөнүндөгү илим, — деп тантырады ии… ыык…

Алмаз:

— Гендерлик деген ии…ыык… Эй, аял, сенин эркектен эч жериң кем эмес, ал ичсе ич, чекче чек, чапса чап, аялдарга төрөө болсо, эркектерге толгоо болсун, теңчилик үчүн деген ураандардын топтому деп былжырады.

Арзымат:

— Фигурасы бар мээси жок кыздарды ак үй, көк үйлөрдө иштетүү же мээси бар, бирок фигурасыз кыздарды ошол жогорку жактардан тескерисинче кылуу, — деп келжирегенинде, мен алардын мындай түркөйлүктөрүнө өлө жиним келип кетип айттым ии…ыык:

— Эркек эркектин ролун, аял аялдын ролун турмушта өзүндөй кылып аткарса гендерлик болот десем тиги келесоолордун түшүнчү кебетелери билинбейт. Ошондо мен болгон айлыгымды алып чыгып столго таштап туруп айттым: — Ушул акчага бүт гүл, анан арак алып келгиле азыр мен силерге гендерликти сөз жүзүндө эмес, иш жүзүндө көрсөтөм, — деп ии…ыык… Мындайга ыкчам алар заматта дүкөнгө барып эки жашик арак, анан эки гүл алып келишиптир.

— Эй келесоолор аялга качан эки гүл берчү эле, же менин Алмашымды өлдү деп уктуңар беле, — деп жакадан алсам алар: — Бүт айлыгыңды ичип койгонуңду аялың билсе инфарктан өйдө боло албайт болуш керек, — деп атпайбы күйгүзүшүп. Ошондо мен өзүмдү кармап туруп айттым: — Эй менин Алмашым силердин катындарыңардай эмес, ал чыныгы айым, өзүнүн үй-бүлөдөгү ордун билет, мени башкарбайт, сыйлайт, сүйөт, керек болсо бүгүн айлыгымды бүт ичип туруп ушу эки гүлдү белекке берсем да, эркектигим менен

мастыгымды дароо эле түшүнүп аяр мамиле кылат, мына ушул гендердик саясат болот десем алар түшүнүшүп сендей жакшы аял үчүн гана тосторун айтып атышты. Куттуктайм жаным сексинчи мартың менен! Ии…ыык…