Жер шарында жалгыз аял калганча, ал жөнүндө айта турган жаңы нерсе дайыма табылат.
Станислав де Буффле

♦     ♦     ♦

Жер шарын Атлас өз ийининде көтөрүп турган жок, аны каалаган маалда топ кылып ойногон аялзаттын колунда.
Генрик Сенкевич

♦     ♦     ♦

Сулуу аял көз үчүн – бейиш, жан-дүйнөңө – тозок, чөнтөгүңө – тазалагыч.
Бернар Ле Бовье де Фонтенель

♦     ♦     ♦

Аялзаттын сулуулугун айтып мактагыла – ал дароо баардык кемсинтүүлөрүңдү кечирет.
Пьер Буаст

♦     ♦     ♦

Сулуу каалаганын жасайт, сулууга баардыгын кечирсе болот.
Мольер

♦     ♦     ♦

Сулуу аялзат көзгө, ак көңүл аялзат жүрөккө жагымдуу; биринчиси сонун буюмга, экинчиси баалуу кенчке окшош.
Наполеон I

♦     ♦     ♦

Аялзаты уулуу жыландар окшош, картайып, сулуулугу кемиген сайын зыянсыз, а канчалык сулуу, жаш болсо, алардын уусу күчтүү.
Альфред Брем

♦     ♦     ♦

Аялдын акылынан өткөн парадоксалдуу эч нерсе жок. Аларды бир нерсеге ынандыруу өтө кыйын: өздөрүн өздөрү ынандырууга чейин жеткирүү зарыл. Алардын диалектикасын билүү үчүн логика жана анын бардык эрежелерин жокко чыгарыш керек.
Михаил Лермонтов

♦     ♦     ♦

Аялзатка көрк кошкон, анын сулуулугун арттырган эмне? Алтын, изумруд же күмүш эмес, а жөнөкөйлүк, кооздук жана уялчаактык.
Плутарх

♦     ♦     ♦

Адептүү аял – бул баарына ачыла элек белгисиз кенч; аны тапкан акылдуу адам мактанбайт.
Франсуа Ларошфуко

♦     ♦     ♦

Кандай аял жаңылыштык кетирсе да, анда эле эркектин күнөөсү бар.
Иоганн Гердер

♦     ♦     ♦

Аялды унчукпастык сулуу кылат.
Гомер

♦     ♦     ♦

“Ооба” дегенди аялдар ооздору менен айтканга караганда көздөрү менен оңой билдирет.

Пьер Декурсель

♦     ♦     ♦

Көз жаш – аялдардын куралы!
Уильям Шекспир

♦     ♦     ♦

Обо эненин окуясы эсиңдеби? Аялга акыл-эс келгендеги эң биринчи ою жаңы көйнөк болгон.
Генрих Гейне

♦     ♦     ♦

Биз эркектер, жогорку сезимдер жөнүндө калп айтып жатканыбызды – ага дене гана керектигин аялдар билип турат, ошондуктан бардык жаман нерселерди кечирет, бирок уйпаланган, жарашыксыз кийинип келгениңди эч кечирбейт.
Лев Толстой

♦     ♦     ♦

Аялдар болбосо жашоонун башталышында жардамсыз, ортосунда ыракатсыз, аягында багуусуз калмакпыз.
Себастьян-Рок Никола де Шамфор

♦     ♦     ♦

Аялда укмуштуудай улуу сыр, алар – жашоонун улуу сыры: бардык кубанычтын, бардык түйшүктүн булагы…
Арне Гарборг

♦     ♦     ♦

Аял эркектин Улуу тарбиячысы.
Анатоль Франс

♦     ♦     ♦

Алтынды – от, аялзатты – алтын, эркекти – аялзат сынайт.
Сенека

♦     ♦     ♦

Эң көп балалуу болгон аял чоң сыйга татыктуу.
Наполеон

♦     ♦     ♦

Аял жаркылдап турса, бүт үй жаркырайт. Аялдын кабагы бүркөлсө, бүт үй караңгы.
Ахикар

♦     ♦     ♦

Жаман аялдан ашкан жамандык жок, жакшы аялдан артык жакшылык жок.
Еврипид

♦     ♦     ♦

Аялга буйрук кылуу укугуна ээ болгуң келсе, ага көп ирет баш ийүүгө жөндөмдүү болушуң керек.
Виктор Гюго

♦     ♦     ♦

Аялдардын сүйүүсү көз ирмемдик жыргал берип, ага түбөлүк милдеттенмелерди, жок эле дегенде жашоодогу эч качан бүтпөгөн жагымсыз нерселерди моюнга жүктөйт.
Василий Ключевский

♦     ♦     ♦

Эркектин жек көрүүсүнөн көрө, аялдын сүйүүсүнөн корк. Бул — уу, өзгөчө коркунучтуу анткени ал жагымдуу.
Сократ

♦     ♦     ♦

Эркектер аялдар жөнүндө каалаганын айтат, ал эми аялдар эркектерге каалаганын жасайт.
Софья Сегюр

♦     ♦     ♦

Эркек кулагы менен, аял көзү менен угат, биринчиси анын айткандарын түшүнүү үчүн, экинчиси аны менен сүйлөшкөн адамга жагуу үчүн.

Василий Ключевский

♦     ♦     ♦

Канчалаган аялзат брилланттуу болууну каалагандыктан – пастыкка барып, бузулуп, бактысыз болушат! А алтынга толгон сандыктарга ээ болгон бир эркек бактылуубу? Жана аларды толтуруу үчүн жасалган бардык жамандыктарды ким өлчөйт?!
Б. Рескин

♦     ♦     ♦

Аялга болгон сүйүү жапайы пилдерди үйрөткөн илгичтен да курч, жалындан да ысык. Ал – адамдын жан дүйнөсүнө сайылган жебе.
Байыркы Индия накылы

♦     ♦     ♦

Аялзатка болгон сүйүү – биз үчүн эбегейсиз, алмаштырылгыс мааниге ээ; ал этке сепкен туз сыяктуу жүрөккө сиңип, аны бузулуудан сактайт.
Виктор Гюго

♦     ♦     ♦

Акыл-эси адашса да, аялзаттын жүрөгү алданбайт.
Эрнест Ренан

♦     ♦     ♦

Аялзат сүйөт же жек көрөт, үчүнчүсү жок.
Публилий Сир

♦     ♦     ♦

Аялдын кадыр-баркы – ал сүйгөн эркектен билинет.
Виссарион Белинский

♦     ♦     ♦

Жүрөгүнүн ачкычын берип, эртеси эле кулпусун алмаштырган аялзат арбын.
Сент-Бёв

♦     ♦     ♦

Аялга болгон кумарлуу сүйүүңдү түп-тамырынан кыймайынча, жандүйнөң эмчек эмген торпок сыяктуу байланган боюнча калат.
Индус накылы

♦     ♦     ♦

Жакшы аялзат турмушка чыгарда эрине бакыт убада кылат, жаман аялзат аны эркектен күтөт.
Василий Ключевский

♦     ♦     ♦

Ажаан аял менен жашагыча, ээн чөлдө жашаган артык.
Сулайман пайгамбардын осуятынан

♦     ♦     ♦

Уулантуунун жардамы менен балык кармоо – балыкты оңой, тез кармоого мүмкүндүк берет, бирок аны жегенге болбой турган кылып бузат. Ошол сыяктуу эле дуба же ар кандай дары менен күйөөлөрүн жанында кармоого аракет кылган аялдар аларды сезимтал ыракат менен туткундап, бирок кийин оорулуулар, жиндилер менен жашашат.
Плутарх

♦     ♦     ♦

Кээ бир аялдын тили күйөөсү үчүн эң айыгышкан душманынан да жаман.
Себастьян Брант

♦     ♦     ♦

Үй-бүлөдө бийлик кылган аял күйөөсүн кулга айлантат, а кул болгон мырза күлкүлүү жана аянычтуу жандык.
Жан-Жак Руссо

♦     ♦     ♦

Эч нерсеге карабай үйлөн. Аялың жакшы чыкса – бактылуусуң. Жаман чыкса, философ болосуң.
Сократ

♦     ♦     ♦

Кылы жок комуз чертилбейт, дөңгөлөгү жок араба жүрбөйт, күйөөсү жок аял жүз тууганы болсо да бактысыз.
Ачикар

♦     ♦     ♦

Которгон Абийрбек Абыкаев

Эгер “РухЭш” сайтынын ишмердиги токтоп калбашын кааласаңыз, бизди колдоо үчүн төмөнкү банктык эсебибизге өз каалооңузга жараша акча которо аласыз... Мбанк+996700532585 жана Оптимабанк-4169585341612561.