Мрамор үй

Ал кичинекейинде эне-атасын ээрчип, борборго сапарлап барышкан.

Ак үйдү көргөн бала:

– Атаке, бул эмне мынча аппак! – деди таңдана.

– Бул мрамордон салынган үй, – деди атасы.

– Мен кийин эр жеткенимде силерге мромордон үй салып берем! – деди шердене.

Жылдар өттү. Алар жашаган аймактан мрамор таш кени өндүрүлдү укмуштай. Бирок алар үчүн мрамор таштын баасы асман чапчып, кол жеткис эле. Кийин далай жылда топтогон акчасына үй сыртын мрамор менен каптатар болгон кезде, ата-энеси одүйнө узап, чым жазданышты.

Мрамор таштардын пайдасы эне-атасынын мүрзөсүнө гана жарады.

Жоготулган убакыттар

– Эже, булар эмне? – сиңдиси эжесинин бир нече жерге барып, кесиби боюнча жумушка киралбай, иш боюнча мекемелердин эшигин жырткан сайын дайыма алып жүрүүчү, артыкчылык менен бүткөн деген тастыктамасы бар чачылган кагаздарын, кызыл дипломдорун карап таңгалды.

– Албы?! – Эжеси өктөм сүйлөдү. – Жоготулуп... уурдалган жылдар!!!

Качкын

Мекенинде жумуш жок, жумушу бар бай өлкөнүн жарандыгын алган.

Кыйла жылдан соң бай өлкөнүн саясый, экономикалык кыйроосунан улам, ал өлкөдөн качып, өзү туулуп өскөн Ата-Журтунда бозгун болуп жүрөт. Кайра кетейин десе, бай өлкөнүн жараны болгону үчүн аны кандуу согуш майданы күтүүдө.

Чексиз камкордук

Тубаса майыптыгы менен төрөлгөн ал. Дайыма элдин көңүл сыртында калган байкуш. Элден артканды кийет, элден артканды жеп-ичет. Колунан келген иштерди өрмөлөп, жөрмөлөп жүрүп аткарат. Ошондо да эмгек акысы толук колуна тийбейт кээде.

Бирок аны толук камкордукка алганбыз дегендер кээде чакан белек-бечкектерин тартууламыш этип, түрдүүчө сүрөткө түшүп, социалдык тармактарга жүктөшөт.

Коргонуу

– Үч балаң менен эмнеге кайра турмушка чыктың?! – деди камкордук үйүнүн башчысы.

Тиги келин кийинки күйөөсү менен да пикири келишпей, ур-токмок жеп, корунуп качып келген.

– Билесизби... – келин үшкүрүнүп сүйлөдү. – Балдардын атасы ажырашкандан кийин деле жөн койбоду. Өлтүрөм, соём деп опузалаганынан... ушул кишинин этегин кармангамын... – күнөөлүү жооп берди.

Эгер «РухЭш» сайтынын ишмердиги токтоп калбашын кааласаңыз, бизди колдоо үчүн төмөнкү банктык эсебибизге өз каалооңузга жараша акча которо аласыз... Мбанк + 996 700 53 25 85 жана Оптимабанк-4169585341612561.