Агер коомдон кайсы бир топту, айталы – аялдарды, еврейлерди, гомосексуалдарды, кара түстүүлөрдү обочолонтуу керекпи, анделе бул топтогулар жугуштуу ооруларды жайылтуучулар деп кой. Бүттү. Заматта жаманаттыга кабылышат.

♦     ♦     ♦

Ойдон чыгарылган тартиптен баш тартууга кудуретибиз жетпейт. Зынданды талкалап, сыртка шашканыбыз менен, аныгында биз короосу бир кыйла кенен түрмөгө өзүбүздү шыкайбыз.  

♦     ♦     ♦

Агер баштарын миф бириктирсе, бири-бирин тааныбаган жоон топ адам ийгиликтүү кызматташтыкка жөндөмдүү.

♦     ♦     ♦

Чынында кудайлар, улуттар, корпорациялар, акча, адам укуктары жана мыйзамдары жок, адилеттүүлүк адамдардын жамааттык түшүнүгүндө гана жашайт.

♦     ♦     ♦

Акча – бул ишеним системасы, анысынан да: акча – адамзат тарыхындагы өз ара ишенимдин эң кынтыксыз жана жалпы системасы.

♦     ♦     ♦

Тарыхты аз эле адам жаратат, а калгандары жер айдоо, ташып-жыйноо менен алек.

♦     ♦     ♦

Кур кыялда жашоо оңой – баш ооруңдун мааниси арта баштайт.

♦     ♦     ♦

Вольтер айткан: «Кудай жок, бирок бул жөнүндө малайыма айтпагыла, ал муну укса, мени түндөсү мууздап тынат».

♦     ♦     ♦

Дин бизди жок нерсеге ишенүүгө мажбурлайт.

♦     ♦     ♦

Көптөгөн тарыхый катастрофалар, ал аз келгенсип кыйратуучу согуштар, экосистемага каршы зордук-зомбулук, бийликке биз өтө шашылыш жеткендин кесепети. Адамзаты – танктарга, атомдук бомбаларга капысынан ээлик кылган карышкыр үйүрү эмес, биз эволюциянын түшүнүксүз азгырыгынан улам танктарды, ракеталарды жасаганды, колдонгонду гана үйрөнгөн короо-короо койбуз. А куралчан койлор куралдуу карышкырлардан да өтө кооптуу.

♦     ♦     ♦

Туруктуулук – дөдөйлөр үчүн гана жанга жайлуу. Муну түшүнүү үчүн: эч бир чыр-чатаксыз улуу көркөм чыгарма барбы эсиңде калган?

♦     ♦     ♦

Ата-бабаларыбыз жаратылыш менен жуурулушуп жашаган деп улуп-уңшуп наалыгандарга эч ишенбегиле. Кайдан жуурулушсун. Эч коошпойт! Өнөр жай революциясы болгонго чейин адам аткырың көптөгөн жаныбар, өсүмдүктөрдүн түбүнө жеткен.

♦     ♦     ♦

6 миллион жыл мурда бир маймыл эки кыз тууптур. Бирөөсү азыркы бардык шимпанзелердин тукумунан тараптыр, а экинчиси – чоң энебиздин чоң энесинин энесинин энесинин энеси экен.

♦     ♦     ♦

Бардарчылык зарылчылыкка айланып, мойнубузга жаңы мүшкүл артты.

♦     ♦     ♦

Маалыматка көмүлгөн заманда эстен ажырабаганың – зор эрдик.

♦     ♦     ♦

Эч нерсе каалабаган адамдын ачуусу мурдунун учунда.

Булагы: https://mybook.ru/author/yuval-harari/citations/

Кыргызчалаган О`Шакир

Эгер «РухЭш» сайтынын ишмердиги токтоп калбашын кааласаңыз, бизди колдоо үчүн төмөнкү банктык эсебибизге өз каалооңузга жараша акча которо аласыз... Мбанк + 996 700 53 25 85 жана Оптимабанк-4169585341612561.