• Бир шам миң шамды тутандырат, андан кызмат кылуу мөөнөтү кыскарбайт. Бакыт бөлүшкөндөн да эч качан кемибейсиң.

• Бакытка кеткен жол жок, Бакыттын өзү – жол.
• Бирөө сени бактылуу же бактысыз кылат дегендин өзү күлкү.
• Бакыт сенин эмнең бар же ким экениңден көз каранды эмес. Ал сенин ойлонууңа гана таянат.
• Эгер силер бергендин күчү тууралуу мен билгенди билсеңер, анда бир да жолу тамагыңарды бирөө менен бөлүшмөйүнчө ичпейт болчусуңар.
• Мен жасап бүткөн иштеримди көрбөйм; жасала элек иштеримди гана көрөм.
• Сиз жабышкан нерселериңизди гана жоготосуз.
• Өткөн күн кайрылып келбейт, а келечек келе элек. Жашоого азыркы көз ирмемден гана карагының.
• Көйгөй, сенин алдыда убактым бар деп ойлогонуңда.
• Канчалаган ыйык сөздөрдү окуп, акылдуу сөздөрдү айтканың менен, аны өзүң жасабагандан кийин эмне пайда?
• Бир кичинекей шам жарыгын өчүрүш үчүн, бүт дүйнөнүн караңгылыгы аздык кылат.
• Байларга да, кедейлерге да бирдей ырайымдуу бол, ар кимдин өз мээнети бар. Бирөөсү мээнетти көп тартса, экинчиси андан куру жалак.
• Бир нерсе жасасаң, бүт дилиң менен жаса.
• Тартипке көнгөн акыл бакыт алып келет.
• Эгер өзүңдү чындап сүйсөң, бирөөгө жамандык жасай албайсың.
• Бардыгы өзгөрүлмө, ошондуктан эч нерсени аягына чыгыптыр деп айта албайм. Өзгөрүүлөрдүн алгачкы белгилерин аныктап, тааныганды үйрөн. Эмоцияга алдырба.
• Ар бир нерсе карама-каршылыктан турат, ошондуктан өз пикиримди айтууга шашылбайм.
• Жан дүйнөмдөгү Энергия Ааламдан келет. Бирок аны өнүктүрүп-өстүрүү менин мойнумда. Терең дем алгыла, ызы-чуулуу, адамдар көп жүргөн жана жакшы желдетилбеген жерден алыс болгула.
• “Инь” жана “Ян” түшүнүгүн пайдаланып ойлонууга өзүмдү машыктырам. Карама-каршы эки пикирдин бирин тандоого туура келсе, шашпайм, баарын таразалайм (Инь), тандап алган соң, өз чечимиме катуумун (Янь).
• Ар кандай кырдаалга туш келгенде, ага каршы чыккандан мурда, анын шарттарына ыңгайлашууга аракет жасайм.
• Кылар ишимди, кандай жыйынтык чыгат деп сарсанаа болбой жасайм. Оюмда коюлган милдетти кантип аткарам дегенден башка ой жок.
• Ашыкча эч нерсе жасабайм, бардык нерсенин тең ортосун издейм.
• Өз жашоомдогу негизги максат – өзүмдү өнүктүрүп алга жылуу экенин унутпайм.
• Аракет жасоодон мурда өз күчүмө баа берем. Баарын унутуп, алдыга жулунбайм: жасаган ишим не жыйынтык бериши мүмкүн экенин шашпай салмактайм.
• Тагдыр башка салганына баш ийем, өзгөртө албас ишти сабырдуу кабыл алам.
• Кайсы иш болбосун шашпай, кунт коюп жасайм. Башкалар дүрбөлөң түшсө кошо дүрбөбөй, сылык, бир калыпта өзгөрүүсүз кала берем.
• Бардык иштин өз убагы бар: өз чыдамкайлыгымды чыйралтып, күтө билүү жөндөмүмдү өнүктүрөм.
• Өз ордумду билем, текеберчиликтен качып, жупуну жүрүүгө аракетимди токтотпойм.
• Ар сөзүмдү ойлонуп сүйлөйм. Ушак айтпайм, айланамдагылардын мага болгон сыйы, ишеними мен үчүн кымбат.
• Карыларга мамилемди өзгөрттүм. Улууларга жардам кылуу – жөн гана жакшы иш жасоонун бири эмес. Бул адамгерчиликтүү болуу дегенди түшүндүрөт.
• Дос тандоодо өтө жоопкерчиликтүү мамиле кылам.
• Сугалак эмесмин, болгонуна ыраазымын. Ач көздүк туура жолуңдан чыгарып, гармония тууралуу унуткарат.
• Жупуну жашап, көңүл ачууларды тыкыр тандоого аракет кылам. Китепти кошунама жаккан үчүн эле окубайм.
• Өзүмдүн байкагычтыгымды дайыма машыктырам. Бирок байкоо салуу – бул соттоо эмес.
• Өз денемди жакшы көрөм жана ага кам көрөм. Түшкү тамакты жебей койбойм, көрүнгөн жерде отуруп-туруп тамактанбайм. Өз денемдин абалын тыңдап, ага күч келтирбейм, машыгууларга аны кыйноо үчүн эмес, ага ыракат тартылоо үчүн барам.

Которогон Абийрбек Абыкаев

Эгер «РухЭш» сайтынын ишмердиги токтоп калбашын кааласаңыз, бизди колдоо үчүн төмөнкү банктык эсебибизге өз каалооңузга жараша акча которо аласыз... Мбанк + 996 700 53 25 85 жана Оптимабанк-4169585341612561.