АҢГЕМЕ

– Тур эй, уйкучу.

– Азыр.

– Тур эми намазыңдан кечигесиң.

– Саал жата турайынчы. Кечикпейм.

– Уйкуң жаман ширин экен а?..

– Уйкуда эмес кеп.

– Шылтоолобо, тур.

– Ух... Жакшы уктап турдум. Алла ыраазы болсун сага... Ойготуп койгонуңа.

– Алладан мурда сен ыраазы болсоң жетет мага.

– Алланын ыраазылыгы үчүн болуш керек баары.

– Йе таксыр, багымдат намазыңдын маалы өтүп баратат... Кайра жатып алганың кандай?

– Ооба, кечиктим. Ырайымдуу Алла кечиримдүү. Анын ырайымы чексиз.

– Бүгүнкү багымдат намазыңды окубайсыңбы анан?

– Беш мүнөткө кеч ойгонуп калбадымбы, уйку басып.

– Кудай көктөн саатты карап отурат дейсиңби, окуй бер да.

– Эк... Кудай урган неме экенсиң! Сөз тийгизбе Аллага! Күнөө...

– Саатты мен кечээ жатарда он мүнөт артка жылдырып койгомун. Окуй бер, кечикпейсиң.

– Даарат алганга үлгүрбөйм го...

– Кудай эми врач-уролог эмес да, дааратыңды текшерет беле...

– Астафуралла! Кантип оозуң барды бу кепке? Кудай менен тамашалашпа, наадан десе.

– Кудай менин оозумду эле тиктеп отурат бекен? Аны өзүңө окшогон пенде көрбөчү.

– Кудай деген бийикте. Ага акаарат келтирбе! Сөз тийгизбе жараткан Аллага!

– Бийикте болсо бийикте калтыргыла аны, жерге түшүрбөй.

– Ар дайым бийикте ал.

– Анда бийиктеги Кудайды убара кылып, улам жерге түшүрө бербесеңчи.

– Ыйык Кудайды эмне убара кылыпмын?!

– Аны бир урологдон бетер дааратыңды шылтоолодуң, бир туруп менин оозумду тиктеп отурган чекист кылгың бар. Бир карасам, сенин Кудайың немиске окшоп саатка так окшойт ушунчалык... Беш мүнөт кечиккениңди айтканыңа карасам.

– Эй, эй!.. Антип айтканга акың жок! Кудай урган десе. Каарына калып жүрбө анын!

– Карасаң эми... Кудай ар кимди эле уруп, согуп, каарый берчү “разборщикпи” сага?

– Кудайга сөз тийгизбе дейм!

– Чаңырбачы мынча. Сабыр эт.

– Сөз тийгизбе десем, тибирейсиң. Жаагың басылбай!

– Сөз тийгизгеним жок ага, бирок сен аны улам асмандан жерге түшүрүп, канча убара кылдың?..

– Сени Кудайга эле тапшырдым. Кудайга койдум.

– Кудай сага окшогондордун буюрмасын аткарып, буйругун укса, биздин соттордон айырмасы жок окшойт а-а?..

– Бул кебиң Кудайга жакпас деги!

– Кудайга сен эле жакчы, айланайын.

– Жагам мен Кудайга, жагам эле. Сен жакпайсың ага!

– Сен ага кантип жагып калдың экен?

– Беш маал намазым үчүн!..

– Бүгүнкү намазың төрт маал болуп калганычы? Кудайдын эсебине киреби, жокпу?..

– Үзүлгөн намазымды улап койсом боло берет.

– Демек, сенин Кудайың бухгалтердей кайра эсептеп коёт экен да... Ушинтип кудайга жакканың курусун!

– Жагам эле.

– А мен жакпайм ээ?!

– Жакпайсың!

– Жагыш үчүн эмне кылсам Ыйык Кудайга?

– Намаз оку.

– Мен ага башка адалат иштерим менен эле жакканга аракет кылайынчы...

– Жок. Алла-Таалага намаз окуган киши гана жагат.

– Категориялары, критерийлери бар дечи... Демек, Кудай деле кошоматчылыкты сүйгөн Ак үйдөгү чоңдордон айырмасы жокпу?

– Пенде баласы Кудайга жагыш үчүн намаз окугандан өтөрү жок.

– Анда мен Кудайга кошомат кылышым керек тура э, жагыш үчүн?..

– Намаз – Кудайга жакындатчу жол.

– Билген намазыңды өзүң эле окучу, айланайын. Бар ары...

Таксыр тесмесин санап, дубасын окуп отурду. Эмне дуба окуганы белгисиз.

2023-жылдын 30-сентябры

Эгер «РухЭш» сайтынын ишмердиги токтоп калбашын кааласаңыз, бизди колдоо үчүн төмөнкү банктык эсебибизге өз каалооңузга жараша акча которо аласыз... Мбанк + 996 700 53 25 85 жана Оптимабанк-4169585341612561.