ЖОМОК

Илгери-илгери, айыл четинде эки улуу тоо жанаша туруптур. Бирин эл Ак-Тоо, экинчисин Кара-Тоо аташыптыр. Экөөнүн тең чокулары көк тиреп, капталдары асманга сунулгансып, мөңгүдөн жаралган тунук суулар агып чыгат экен.

Ак-Тоодон аккан суу мөлтүр болуп, жай гана агып, Ак-Суу дарыясын түзүптүр.

Ал эми Кара-Тоодон чыккан суу күңүрт тартып, шаркырап, кээде ачууланып, кээде тынчый албай, Кара-Суу дарыясын жаратыптыр. Экөө тең дыйкандардын талааларына жан киргизип, элге ырыскы болуп кызмат кылышчу.

Бир күнү Ак-Суу жай гана агып баратып, Кара-Сууга үн катты:

— Тынч агып, элге пайдаңды тийгизсеңчи. Эл бизге ишенет.

Кара-Суу бурк эте түштү:

— Мен эркинмин! Каалагандай агам! Мени эч ким токтото албайт! — деп таштарды уруп, шаркырап кетти.

Ак-Суу унчукпай кала берет.

Күндөр өтөт... Ак-Суу мурдагыдай эле тынч агып, талааларды сугарып, дыйкандарга жардам берди. Ал эми Кара-Суу кээде жини келгенде жээгинен ашып, эгин талааларын жууп кетип, элге зыян келтире берди.

Бир күнү дыйкандар чогулушуп, сүйлөнүштү:

— Бул Кара-Суу бизди кыйнап бүттү…

— Эгиндерибизди быйыл да жууп кетти…

— Эмне айла кылабыз эми?..

Алар эки тоого карап, үн салышты:

— Оо, улуу тоолор! Бизге жардам бергиле!

Ошол маалда кайдан-жайдан экени белгисиз, ак сакалчан карыя пайда болду. Анын көздөрү терең, үнү салмактуу эле.

— Эмне болуп жатат, балдарым? — деди ал жай гана.

Дыйкандар болгон окуяны айтып беришти.

Карыя башын ийкеп, Кара-Сууга кайрылды:

— Эй, Кара-Суу! Элге зыян келтирбей, тынч агууну үйрөн. Сен да ырыскы болушуң керек.

Кара-Суу андан бетер буркулдап жооп берди:

— Мен өзгөрбөйм!

Карыя дагы бир жолу эскертти:

— Акылга кел. Болбосо кесепети оор болот.

Кара-Суу такыр эле укпады. Дагы да күчөп, таштарды уруп, шаркырап агып жатты. Ошондо карыянын кабагы түйүлүп, үнү катуу чыкты:

— Анда өзүңө өзүң жооп бересиң!

Ал колун көтөрүп, жерге таяк менен бир урду.

Бир заматта жер дүңгүрөп, чоң жарака пайда болду. Кара-Суу буркан-шаркан түшүп, ошол жаракага кирип кетти...

Карыя:

— Сен эми жер астындагы суу сандыкта болосуң.

— Качан мүнөзүңдү оңдосоң, ошондо гана кайра жер үстүнө чыгасың!

Жер жабылып, тынчтык орноду. Ак-Суу мурдагыдай эле жай агып, элге кызмат кылып калды. Ал эми Кара-Суу жер астында буркулдап, дагы деле тынч ала албай жатты. Кээде анын үнү жер алдынан угулгандай болот дешет.

— Мени чыгаргыла! Мен өзгөрөм!.. — деп кыйкырып жаткансыйт. Бирок кулпу эмнегедир ачылбайт.

Азыр да айрым жерлерден жылуу булактар атырылып чыгып жатканы да ошондон дешет.

Ак-Суу болсо жай агып жатып, акырын күбүрөнөт:

— Сабырдуу болууну үйрөнмөйүнчө, эркиндикке жетүү кыйын...

Эгер «РухЭш» сайтынын ишмердиги токтоп калбашын кааласаңыз, бизди колдоо үчүн төмөнкү банктык эсебибизге өз каалооңузга жараша акча которо аласыз... Мбанк + 996 558 08 08 60 жана Оптимабанк-4169585341612561.