АҢГЕМЕ

– Ыйык никеңерди кыйууга молдо келди, – дешти.

Үй бурчунда ак жоолукту башынан улам сыйрып салган кыздын колдору көк ала, сыйрылган. Үйдөгүлөрдүн баары ага бейтааныш.

Кызды сомодой жигиттер улактай бөктөрүп, улкуп-жулкуп эле машинеге тыгышкан.

Ал улам жырткычтан корунгансып, жанына эч кимди жакындатпады. Бирок кемпир-кесектер аны улам жоолук салып жүдөтүштү. Кыз өжөрлөнүп улам силкинет аларга.

Көп өтпөй молдоке келди.

Арыда кемпир-кепшелер кобуранат улам:

– Ыйлап-ыйлап басылат…

– Ии ботом, бизди деле ала качып келишкен, өлбөдүк ко…

Колунда тесме чубурткан молдону тиктеген кыз кекенип отурду ичинен: “Алланын аты менен нике кыйгыдай ким экенсиң?!”

Молдо кобуранды жанындагыларга:

– Курандын, пайгамбардын, ыймандын сөзүнөн чыкпайбыз…

– Макул эместигимди укпай туруп нике кыйуу – ыймандын атына жамынган зомбулук эмеспи? – деди кыз молдону суракка алгансып.

Баары тил-ооздон калды. Баары кыздын оозун тиктеп, төбөдөн чагылган ургандай селейишти.

– Мендей миңдеген кыздардын көз жашынан коркпой нике кыйуу – Алланын осуяттарын булгабайбы?! – кыздын көзү – от, сөзү – чок туюлду.

Кемпирлердин келмелери ооздон учту. Жакаларын уучтады.

– Мынабул апалар! – деди сөөмөйү кемпирлерге сайылган кыз: – Адам тагдырын аябас силер да зомбулукка, кылмышка тилектешсиңер! Мыйзам алдында, Кудай алдында баарыңдын күнөөңөр кечирилгис! – деди өкүм үнү.

Жырткычтар менен кармаша тургансып ордунан обдула турду кыз:

– Агер ак жоолукту менин көз жашыма карабай салабыз десеңер – ушул да салтпы?! Молдоңор менин макулдугума карабай нике кыйса – бул да динби?! Ушул жердеги апалар мени зөөкүрлөр ала качып келгенин салт десеңер – ушул да акылбы, наркпы?!

Баарын калтыратты бул сөз. Абаны да калтыратты кыздын үнү. Кылымдарды калтыратты.

Тарыхты бүжүрөгөн бечарага айлантты чечкиндүү кыздын үнү.
Март, 2025-ж.

Эгер «РухЭш» сайтынын ишмердиги токтоп калбашын кааласаңыз, бизди колдоо үчүн төмөнкү банктык эсебибизге өз каалооңузга жараша акча которо аласыз... Мбанк + 996 558 08 08 60 жана Оптимабанк-4169585341612561.