Колдоо көрсөтүү
KY
RU
EN
TR
Люк де Клапье ВОВЕНАРГ
(1715-1747), француз жазуучусу
Эмгектен эмес, бекерпоздуктан көбүрөк чарчайсың.
* * *
Мээнетиңдин жемишин көргөндөн өткөн ыракат барбы?
* * *
Адамдардын керексиз нерселер менен алпурушканын койдуруш кыйын.
* * *
Кээде тубаса чечендин да улуу чындыктын түйүнүн чечмелеп берген кебине көпчүлүктүн акылы жетпейт.
* * *
Макоонун белгиси – эстутумунда ой, далилдер толтура, бирок ошолордон өз алдынча жыйынтык чыгарганга жөндөмсүз, кептин баары ушунда.
* * *
Жүрөк туйганга – акыл караандабайт.
* * *
Улуу дөө-шаалар кайратсыз адамдарды ой калчаганга үйрөтүп жүрүп, баарын адашкан жолго түртүп коюшту.
* * *
Оюңду тунук чагылдырып, салмагын арттырчу эмне? Өз орду менен айтылган кенедей бир мисал. А толтура мисалыңды келтире бергенден, кеп кунарын кемитесиң.
* * *
Чечендик өнөр да чанда бир жаралган талант сыяктуу кезигет.
* * *
Чечендикти да билимдей жогору баалашыбыз керек.
* * *
Акылыбызга кысынып-кымтынбас маектен өткөн мектеп жок.
* * *
Мыкты жазуучулардын кеби деле чубалжыма болот.
* * *
Кээде ылжыган мастын оозунан жазмакерлер жараталбаган калемпир-мурчтуу азил чыгып кетет.
* * *
Философтордун тамашасын кээде олуттуу ойлордон ажырата албай, олку-солку боло бересиң.
* * *
Атак-даңктуулардан дипломат чыкпайт, себеби оозуна келгенди оттоп салышат.
* * *
Эң таасирдүү, эскирбеген китеп кайсы? Тээ качанкы чындыкка окурманды байлап койгон китеп.
* * *
Өзүн мыйзамдан да катуу карманган адам – жеткен зулум.
* * *
Мыйзамды чындап сыйлаган адам – элден коркот.
* * *
Адам туулат, өлөт, бул – кеп эмес. Анын колдо болгон дүйнөсүнөн, акчасынан, там-ташынан айрылганын деле анча аянычтуу дебейм. Булар адам өмүрүнө туткак болалбайт. Адам ариетинен ажырап, өзүнүн ким экенин жоготсо – эң аянычтуусу ошол.
* * *
Башыңа түшкөн жамандыкты акылың эмес, кайратың жеңет.
* * *
Кээде ден-соолугубузга ачкарындык кандай зарыл болсо, эс-акылыбызды тундурууга жалгызчылык да керек, бирок узакка эмес. Себеби узак мөөнөттүк ачкарындык да, жалгызчылык да түбүбүзгө жетет.
* * *
Эрдемсингендерди баарлашуу гана мыш кылат. Башкаларга өзүңдү салыштырууда тамыр тартышып көр. Тартынчааксыңбы, куру чиренсиңби: кимдин-ким экени кысынып-кымтынбаган пикирлешүү учурунда билинип калат.
* * *
Баары тегиз жакшы дегендин өзү – чабал саясат.
* * *
Туруктуу мүнөз менен ийкемдүү акыл эриш-аркак болууга тийиш.
* * *
Бизге көөнөргүс ойлорду көкүрөгүбүз шыбырап турат.
* * *
Атак үчүн жаралгандар убакыттын кунун куру кетирбейт.
