Жусуп Абдрахмановдун «күндөлүгүндөгү» акыл мурастар

Азыркы жетекчилерде акылдуулук, тапкычтык жок, аларга идеологиялык оппоненттерге каршы күрөштө саясий чынчылдык жетишпейт.

*     *     *

Менин мекендештерим үчүн – Кыргызстан кам көрүп, сүйүп, иштеши керек болгон өлкө эмес. Алар үчүн Кыргызстан өздөрүнүн жеке кызыкчылыктарынын гана базасы. Менин элимдин бактысыздыгы мына ушунда.

*     *     *

Адамдын ак эмгеги менен жеткен татыктуу ийгилигин тартып алууга болбойт.

*     *     * 

Окуялар тез өнүгүп жаткандыктан, кечээ түшүнүктүү болгон нерсе, а бүгүн түшүнүксүз болууда...

*     *     * 

Жер өз ордунда турбайт, саясат кесмеге айланды. Бул биздин бактысыздыгыбыз.

*     *     * 

Зарылдыктан адамдын эрки ойгонот. Эрк – кыймыл-аракетинин булагы, коомдук иш-аракеттеринин себеби боло алат.

*     *     * 

Биз, келер коркунучтуу кырсыктын алдында эмеспизби?!

*     *     * 

Эй, адам жүрөгү! Сен эмнелерди гана кыла албайсың. Убакыт өтөт, жашоо менен күрөшүүдөбүз. А сен дайыма бир нерселерди издейсиң, кубанасың, толкунданасың.

*     *     * 

Жаратылыш кубулушу сыяктуу, адамдар да өзгөрүлмө.

*     *     *

Достор көп, бирок ар бирибиз жалгызбыз.

*     *     * 

Жашоо – кызыктуу, бирок кубанычтуу эмес, чыдай алгыс оор.

*     *     * 

Адамдардын малга болгон айбандык мамилесин жок кылуу керек.

*     *     *

Азыркы заманбап адабиятыбыз америкалык каскадёр тасмаларга окшош. Аны кунт коюп окуп жатканда, көңүлүң ачылат, бирок окуп бүткөнүңдө мээңде эч нерсе калбайт.

*     *     * 

Мен бүгүн 29 жашка чыктым. Жылдар өтөт. Бирок... биз жылдар менен эмес, ишибиз менен жашайбыз.

*     *     * 

Биздин жашообуз өтүп кеткен жана келечектеги доорлордо жашаган адамдардын жашоосу менен барабар.

*     *     *

Ооба, жашоо – бул фактылардын жана ойлордун татаал желеси.

*     *     *

Шекспир "башыңдагы таажы менен бейпил жата албайсың” деп туура айткан. Биз падыша эмеспиз жана таажыбыз жок. Бирок күрөш жүрүп жатканда бейпил жатууга мүмкүн эмес.

*     *     *

Жашоо таң калыштуу да, коркунучтуу да нерсе. Анүчүн күрөшүп, ар бир мүнөтүн баалайбыз. Бүгүн эч нерсе болбогондой абалда... 4 адам өмүрүнөн ажыратылды.

*     *     * 

Биздин муундан, замандаштардан келечектин пайдасы үчүн өтө көп курмандыктарды талап кылабыз.

Которгон Мээрим САЙДИЛКАН