Блез ПАСКАЛЬ – (1623-1662), француз окумуштуусу, философ  

Канчалаган канкорду өлүм жазасына тартабыз, ошол туурабы? Жок. Биз кайра канкорлордун эсебин көбөйтөбүз.

*       *       *

Окурман аягына чыккан соң бүйүр козгоп, андайды өзү жазуу оңой көрүнсө, демек ал мыкты китеп.

*       *       *

Ким китепти өтө шар же тамгалап ташып окуса, анда ал эч нерсеге түшүнбөгөн окурман.

*       *       *

Көптү билүүгө умтулуу деле абыгерчилик. Эмнеге баарыбыз тең көптү билүүгө умтулабыз? Тек, башкаларга мактаныш үчүн.

*       *       *

Адамдар көп учурда кашкайган далилге эмес, көңүлгө төп келер божомол-дөдөмөлгө ишенет.

*       *       *

Жашоо маңызын сезбейбиз, болгону жашап жүрөбүз.

*       *       *

Биз дайыма болор-болбос нерсеге сооронуп калганыбыздын себеби, көп учурда болор-болбоско муңайым тартабыз.

*       *       *

Ашкере азаттыктын өзү да коркунучтуу, анан кем-карчыны сезбеген жашоо жашоо эмес.

*       *       *

Клеопатранын мурду бир аз жалпак болгондо эле жер шары башкача болмок.

*       *       *

Туура эместигин билип туруп эмне үчүн үрп-адаттан чыкпайбыз? Себеби ал үрп-адат. Эл ага сокур сезим менен ишенген үчүн үрп-адат жолунан чыккысы келбейт.

*       *       *

Адам периште да, айбан да эмес. Бирок анын бактысыздыгы – дайыма периште көрүнөм деп, айбан кейпин кийип калат.

Которгон О`Шакир