Кербез пейил

Айылдан иш таппай четке кеткенде, эне-атасын сагынчу. Сүйлөшсө сөзү бүтпөйт эле. Далай жолу телефон күркөсүнөн кезек тийбей, шаабайы сууп, ылайым ата-энем колунан түшүрбөгөн телефон болуп калсачы деп тиленчү.

Азыр ата-энесинин чөнтөк телефондору бар, бирок мурдагысындай жалындуу сагыныч менен сүйлөшө албайт. Болгону ата-энесинин ал-абалын гана сурайт.

Жасалма гүлдөр

Кирпиги төгүлгөн, эриндери бөрбөйгөн, жүзү булуттай апакай бул сулууда баары бар. Өң-келбеттүү. Бирок ал пластикалык операция жолу менен периштедей сулууларга айланып, сулуулар конкурсуна катышчуларга суктанат десең. Өзү мурду кетирекей, бетинде бир аз сепкили бар кыз.

Аны агасы колунан тартты:

– Жүрү жарыгым, жансыз жыты жок гүлдөргө суктана бербе. Сен алардан көрө бал аарылар конгон гүлсүң... – деди саамайынан сылап.

Эне-Сайлык кыргыздар

– Аке, балдарыңдын баары Ата-Журту каяк экенин билбестен эле чоңоюп келатат, качан келесиздер?.. – Карындашы Красноярскийде жашаган агасына суроо таштады.

– Ээ кубатым, инилериңдин тили бир аз буруу болуп калышы мүмкүн, бирок биз тарыхты жаңылаган эне-сайлык кыргыз болобуз.

Аялуу сезим

– Жеңе, акемди чыкырып бераласызбы? Үйүмө уяттуу меймандар келди эле, карагайда учкун жанып, жарык өчүп калды. Жандырып берсинчи... – деди кайниси.

– Кокуй бала, ушул чагылган чартылдаган жамгырда акеңди ток урсунбу?! –жеңеси катуу чочуду кооптонуп.

Кыйла жыл мурда акеси муну бир көрүп эле ала качып келген. Ошондо "тааныбаган адам менен кантип жашайм, кетем" – деп аябай жулкунуп боздогон жеңеси эми мынтип ыргыштап турганы.

Анда акесин аяды эле, азыр жеңесин аяп турду.

Кездешүү

– Ата, мынабу сүрөттү карасаңыз, абдан таасирдүү чоң ата болуп түшкөн экенсиз.

Болгон болбогонду деле телефонго сүрөткө тарта берчү келининин айтканын кыртышы сүйбөй карады. Атасы эрте жашында каза болуп, чоң атасынын гана улгайган кези эсинде. А телефондогу “чоң ата” өзү эмес эле, тек гана сакалына муз тоңуп, кышта ат чаап келаткан чоң атасын көрүп турду.

Суук кабар

– Неме... эже, Гүлсүн "админ" болуп кетиптир....

– Кайсы тайпага?.. – Дайыма шайыр мүнөз, ар түрдүү тайпаларды ачып "админ" болуп жүрүүчү сиңдисин оюнда эч жамандыгы жок эстеп койду.

– Баягычы? – Иниси үнү каргылдана, биринин артынан бири кайтыш болгон өз туугандарын айтып бүтө электе эжеси чаңырды:

– Боору-ум-ай боорум!!! – ачуу кыйкырды.

Эгер «РухЭш» сайтынын ишмердиги токтоп калбашын кааласаңыз, бизди колдоо үчүн төмөнкү банктык эсебибизге өз каалооңузга жараша акча которо аласыз... Мбанк + 996 700 53 25 85 жана Оптимабанк-4169585341612561.