Феликс Поллак: Романчынын чеберчилиги – кичинекей окуяны чоңго айлантканында.

Мартин Эмис: Сен жазып жатканда ийиниңден бирөө дайыма карап тургандай сезимде бол.

Квентин Крисп: Калемди колго алышыңдын үч себеби бар: биринчиден, сага акча керек, экинчиден, сенин дүйнөгө айта турган маанилүү сөзүң бар, үчүнчүдөн, зериктирген кыштын узун түнүн кыскарткың келет.

Роберт Хайндайн: ...Жазуучулук ийгиликтин беш эрежесинин негизгиси: жазышың керек.

Жан Ростан: Чыгармасын окуганга караганда өзү жөнүндө ойлонгондо жагымдуулук сезилген жазуучулар бар.

Оскар Уайльд: Ар бир киши үч томдук роман жаза алат. Бул үчүн ал турмушту да, адабиятты да таптакыр билбеши керек. 

Иосиф Бродский: Жазуучу кыртыштан боюн ала качкан дарак сыяктуу.

Карлос Фуэнтес: Жашаш үчүн жаза баштап, өлбөш үчүн жазганды токтотосуң.

Жон Стейнбек: Жазуучулук эң жөнөкөй иш: эки сүйлөмдүн кыскасын тандайсың, эки сөздүн жөнөкөйүн, эки баяндын түшүнүктүүсүн аласың, эки басып чыгаруучунун ичинен кат жазганын эмес телеграмма жөнөткөнүн тандайсың.

Тадеуш Бреза: Жазыш кыйын, бирок жазбай коюш андан кыйын.

Гариэл Лауб: Белгилүү жазуучу бул начар товарын саткан сатуучу, ал эми атактуу жазуучу ушундай эле товары үчүн мактоо уккан соодагер.

Михаэл Аугустин: Жазуучу – бул сөздүк кору үчүн нак төлөөнү талап кылган киши.

Эрвин Кобб: Жазуучу ийгиликтүү ишкер боло алса, анда анын жазуучу болбой коюуга акылы жетмек.

Корней Чуковский: Жаман ойсуз жазгыла, бул үчүн жакшы төлөшөт.

Пшекруй: Жазуучу абадан имарат курат, окурман анда жашайт, ал эми басмаканачы бул үчүн акы талап кылат.

Оскар Уайльд: Адабий достуктун жерпайынын түптөлүшүнө уу кошулган шарап куюлган чөйчөктөр кызмат кылат.

Николас Гомес Давила: Сүйгөн же жек көргөн жазуучуга караганда сүйүп да, жек көрүп да жазган жазуучу окурманды жакшырак ишендире алат.

Гильберт Честертон: Жакшы роман өз каарманы жөнүндөгү чындыкты айтат, жаман роман өз автору тууралуу чындыкты айкындайт.

Александр Пушкин : Бир саатта жазылган бир саатта унутулат.

Айрис Мёрдок: Жазуучулук – бул үйлөнүү сыяктуу. Өз бактыңа таң калмайынча чечүүчү кадамды жасоого эч качан шашылбаш керек.

Этьен Рей: Адабий дүйнөдө акча ийгилигинен башка жол болуулардын баары кечиримдүү.

Жон Стейнбек: Жазуучулукка караганда ат чапкан беделдүү жана ишенимдүү бизнес.

Которгон Кубанычбек АРКАБАЕВ

“Пиши. про писателей” сайтынан алынды