(Германиядагы мекендештер, окумуштуу-агартуучулар Рахат Жолдошалиева, Гүлзат Баялиева, Айзада Акбекова, Аксана Исмаилова, Махабат Садырбекке арнайм)

Таянбай бабалардын арбагына,
таянсак илим-билим жардамына.

Түз жолго түшсүн десек мүлдө калкты,
түптөөбүз керек жаңы наркты, салтты.

Улутпуз тамырыбыз тереңдеги,
унуткан аттиң аны керең көбү.

Баатырлар баатыр, бирок акыл-эссиз,
баатыр көп элибизде - арты тексиз.

Улутка карта керек багыт берер,
умтулган муратына алып келер.

Самолёт, корабль же авто-унаа
картасыз түшалабы так жолуна?

Картограф керек жолдон (жаңылтпаган),
калкты эч адашууга кабылтпаган.

Картаны чиер болсо көсөмдөрүң,
калк табат карайлабас өсөр жолун.

Улуттун бардай далай көрөсөнү,
не алар жандуу эмес, өлөсөлүү?..

Кеменгер аттуу-баштуу жакшылардан
кемибес, бөксөрбөс не бакты калган?..

Кайышам калкты көрүп караламан,
караңгы таксырлар көп аралаган.

Таасир, күч берер кези келди деген,
Таз Баймат манасчы көп келжиреген.

Той сүйгөн элбиз уу-ду той-тойлогон,
төкмөлөр жалган мактап жойпоңдогон.

Жалганчы жазуучусу, акындары -
жаамы журт Эне тили жакырлады!

Жамырап жүрөт толо окумуштуу,
жат бирок тарыхыбыз - өкүнүчтүү!

Келебиз эл болалбай оомат алган,
көсөмсүз акылынан шоола тамган.

Картасыз байсал болбос сапарыбыз,
картасыз калкпыз бүтпөс чатагыбыз.

Жол таппай турса эрлер арассаттай, [1]
акылдуу кыздар силер - Карачачтай...

Кыз-кыркын, мекендештер алыстагы -
кыргыздын ойготкула намыс, арын!

Илимде ашып-ташып жөндөмүңөр,
а мында жетпей турат өрнөгүңөр!

Илимдүү, билимдүүлөр идиректүү,
мекенден сыртта жүргөн - кудуретпи?!

Агылып жаштар сыртка идиректүү,
Атажурт жоготобу кудуретти?!

[1] Арасат - ишенимсиз, эки анжы абал.   
Апрель, 2024. 

Элмира Ногойбаевага

Абак, сот, тергөө тажатты.
Акыйкат издөөм кажетпи?

Кадалган кабат кулпулар -
кусадар кылды журтуман.

Сагынсам тоону калкагар,
түтөтүп коём арчадан.

Сагынсам күмүш булакты,
жамгырга түрөм кулакты.

Табият, сулуу иримдер -
туш-тушум сүрөт илинген.

Дубалга илгем гүлдөрдү,
жылытып турар дүйнөмдү.

Так көрсөм түрдүү чийилген,
тазартып сүйгөм үйүмдөй.

Бийикти дайым көргүдөй -
маңдайым тоолор, мөңгүлөр.

Бозоргон дубал тактарын
кооз сүрөт көрсөм, чаптадым.

Жан-теним жабыр кезимде,
жазылды далай "Эсимде ". [1]

Каалгыса көктө булуттар -
кусалык каптайт буюккан.

"Чык-чык " деп кара саат турат,
чыгарбас каалга жаап турат.

Досторду шарап кагышкан
сагындым. Эрк жок барышка...
17.04.24.

[1] " Жаштык түрмөктөр " поэмасы жана мемуар эссе жөнүндө сөз.

Данияр Аманалиевге

Түш көрдүм. Күндүн таңында.
Кудай бар экен жанымда.
Шайтандар ойноп сценада...
Театр. Эл жык залында.

Сахнада оюн. Дүрбөлөң.
Актёрлор залдан сүрдөгөн.
Режиссёр - Кудай. Мен - автор.
(... көрүүчү калбай күлбөгөн...)

Чеберлеп ойноп каармандар,
баарысы шайтан, жаалданган.
Жактырбай Кудай отурду
кабагын түйүп каарданган.

"Режиссёр өзүң жараттың...
түйбө, - деп, - мага кабакты!  
"Кудайды тилдеп отурдум,
карматып жинди адатты.
18.04.24

Жаңыл Жусупжанга

Араторлор эч пайдасыз какшанган,
новаторлор керек коомду башкарган.

Ааламды бүт санарип доор тескеген
аңдоо калды баарын акыл- эс менен.

Көйү бүтпөс адам күчүн коротпой
көмөктөшөр көбөйүүдө роботтор.

Алла-таала өзү кылбас шумдукту
адамзаттык кудуретке буйруптур.

Жан үрөбөс жатып ичер пенделер -
түркөйлүктөн түйшүк тартып сенделер.

Кара күчкө ишенгендер карандай;
карайлаган заман амал табалбай.

Жараткандын бизге берген күчүн көр,
жатат гүлдөп илим берген бүчүрдөн.

Илим-билим берип чексиз мүмкүндүк,
ошондо да кылат экен кул кулдук.

Адамзаты кутулбады кулдуктан:
маңкурт, зомби - өз ою жок чулдуктар.

Жердин ээси кылса Кудай пендени,
пенде кайра кул дейт өзүн жердеги.

Адамзаада не Кудайдын эркеси?
Кудай мээрин шак унуткан эртеси !
05.04.24.