Бардыгы майда нерседен башталат. Тамчы артынан тамчы куюлуп олтуруп идиш сууга толот. Ар бир иштин чебери адегенде үйрөнчүк болуп баштаган. Биз бардык нерсени майдадан баштайбыз, майда деп көңүл бурбай коюга болбойт. Шашылбай, ыгы менен аракет кылуу ийгиликке жеткирет! Эч ким бир түндө баарына жете албайт: ийгилик шашпай, талыкпай майда-чүйдөсүнөн өйдө эске алгандарды гана коштойт.

Ой – материалдашат. Биздин акыл-эс – бул баары. Сен кандай ойлонсоң, ошондой адамсың. Эгер адам жаман сүйлөп, жаман ойлор менен жашаса, ал оорулууга чалдыгат. Эгер жалаң жакшы ой багып, адамдарга жакшылык кылса, бакыт көлөкөсүндөй ээрчийт жана эч качан аны таштап кетпейт. Туура жашоо үчүн мээңди туура ойлор менен толтур. Туура ой жүгүртүү каалаганыңдын баарына жеткизет. Туура эмес ойлонуу – бул сени аңга түртүп, акыры түбүңө жетер эң чоң жамандык. Бардык иш аракеттер акыл-эстен пайда болот. Эгер акыл-эсиңди өзгөртсөң, аракетиң мурдагы боюнча калабы?

Кечиримдүү бол. Кек сактоо – бирөөгө ыргытам деп алаканыңда кармаган ысык чок сыяктуу, эң биринчи өз колуң күйөт. “Кечирилбегендердин” түрмөсүндө камалгандарды бошотсоң, өзүң ошол түрмөдөн бошоносуң. Өзүңдү токтото албасаң, эч качан башка бирөөнү токтото албайсың. Кечиргенди үйрөнгүлө. Тезирээк кечиргенди үйрөнгүлө.

Ар бир аракетиң маанилүү. Өсүп-өнүгүү үчүн аракеттениш керек; күн сайын өнүгүү үчүн, күн сайын аракетте болуу кажет. Атак-даңк – баардыгы үчүн, бирок анын даамын дайыма аракеттенгендер гана татат. “Кудай ар бир чымчыкка курт берет, бирок ар биринин уясына салып бербейт” деп айтылат. Будда: “Аракеттеги адамдар оор тагдырга кабыларына ишенбейм, бирок аракетсиз адамдар оор тагдырга туш болоруна ишенем”, – деген.

Түшүнүүгө аракет жаса. Биз чындык үчүн эмес, өзүбүз үчүн гана күрөшөбүз. Адегенде түшүнүүгө аракет кыл, анан гана сени башкалар түшүнүү үчүн аракет жаса. Башка адамдардын көз караштарын түшүнүү үчүн болгон күчүңдү жумша. Алардын айткандарын ук, эмне айтайын дегенин түшүн, ошондо жандүйнөң тынч алат. Чынчыл болууга караганда, бактылуу болууга көбүрөк маани бер.

Өзүңдү жеңе бил. Миң согушта жеңгиче, өзүңдү жеңгениң миң эсе артык. Бул жеңишиңди сенден эч ким тартып алалбайт. Өзүңдү жеңиш үчүн акыл-эсиңди жең. Ойлоруңа көзөмөл жаса. Алар деңиз толкунундай тынчый албай турбасын. “Ойлорумду кантип көзөмөлдөйм? Башыңа не ойлор келбейт, алар айттырбай келет” деп ойлошуң мүмкүн. Мен ага мындай жооп берем: “Канаттулар үстүңдөн айланып учушуна тоскоол боло албайсың, бирок алар башыңа уя салышына жол бербейсиң”.

Гармонияда жаша. Гармония ички дүйнөңдө жаралат. Аны сырттан издебе. Жүрөгүңдөн гана таба алчу нерсени тыштан издеп убара чекпе. Көпчүлүк учурларда биз аны чыныгы жашоодон өзүбүздү алаксытуу үчүн издейбиз. Чын гармонияны биз жанүйнөбүздөн гана таба алабыз. Гармония – бул жаңы буюм, жаңы иш же жаңы машина эмес, гармония – бул жандүйнөңдөгү аалам, ал өзүңдөн башталат.

Ыраазы болуп жаша. Кел, ордубуздан туруп, көп нерсени үйрөнбөсөк да, ага көп убактыбызды коротпогонубуз үчүн, а эгер көп убакыт сарптасак, оору-сыркоого кабылбаганыбыз үчүн, эгер ооруп калсак алигиче өлбөй жашап жатканыбыз үчүн жаратканга ыраачылык айталы. Ыраазычылыгыбызды билдирүү үчүн дайыма себеп табылат. Жадакалса бирөө менен чатакташып жаткан учурда да ыраазычылык билдирүү үчүн он себеп табууга болорун унутпаңыз.

Бардыгы эле бүгүнкү таңда ойгонушкан жок; кечинде кээ бир адам акыркы жолу уктоо үчүн жатат. Тирүү адамга ыраазы болуш үчүн ар дайым себеп табылат. Ыраазычылыкка толгон жүрөк сени улуу адамга айлантат!

Которгон Абийрбек Абыкаев

Эгер “РухЭш” сайтынын ишмердиги токтоп калбашын кааласаңыз, бизди колдоо үчүн төмөнкү банктык эсебибизге өз каалооңузга жараша акча которо аласыз... Мбанк+996 700 532 585 жана Оптима банк-4169585341612561.