ШАКИР Олжобай: Ач көз адамдан өткөн шоркелдей жок

Мухаммед Аззахири АС-САМАРКАНДИ

(XII), перс акыны 

Майда таарынычтар үчүн достукка артыңды салба.

* * *

Төмөнкү төрт милдет аткарылмайын иш бышты дебе:
Биринчиси, казандагы аш оозуңа тиймейинче;
Экинчиси, кош бойлуу аял көз жармайынча;
Үчүнчүсү, жоокер согуш майданынан кетмейинче;
Төртүнчүсү, дыйкан түшүмүн оруп жыймайынча…

* * *
Ачкалыктан тарпты да баса жыгыласың.

* * *

Эгер досуң душманга айланса, достуктун кайрадан тамыр жайып гүлдөшүнө мурдагыдан ашыра кам көр. Сүйүү жана ишенимдин тамырына бапестеп суу куйбасаң, ал да дарактай соолуйт.

* * *

Чыныгы достук ооз учундагы кеп үчүн эмес, тилектештик жана санаалаштыктын негизине таянып жашайт.

* * *

Аткарылбай келген арбир убада – жамгырсыз булут, мөмөсүз дарак, мизи чоркок кылычка окшош.

* * *

Адатта бир сааттык кумарга азгырылганыбыз үчүн канча күн бою өкүнгөн учурларыбыз болот.

* * *

Кудай-таала кайсыл калкка каарын чачкысы келсе, ал сөзсүз аткарылат.

* * *

Кайсы өлкө болбосун анын түркүгү да, пайдубалы да сот адилеттиги жана акыйкаттыкка негизделет.

* * *

Туура жолдон адашпай, эс-акылдуу жашагың келсе, кеменгер адам менен кеңешип-кесип иш кыл.

* * *

Түркөйдүн акылын ээрчиген адамдын ишинен эч качан майнап чыкпайт, көздөгөн мүдөөсүнүн бирине да жетпейт.

***

Ач көз адамдан өткөн шоркелдей жок.

* * *
Адамзатты адам кылган акылы,
Ансыз пенде жырткычтын эң жакыны.

* * *
Билим – улук, көрк берүүчү келбетке,
Билим кымбат асыл мурас берметтен.
Билерманга, даанышманга муктажбыз…
Кылым барбы, билимге өрт, сел жеткен?

* * *
Арстандын тишин көрүп күлкү десең, жаңыласың,
Абайла дос, анда чоң бир өкүнүчкө кабыласың!

* * *
Ким жаш кезде сүйүү зарын чекпеди, –
Демек анын жаштыгы кур кеткени.

* * *
Жаш кезде ким качса сүйүү мээринен,
Жандүйнөсү мерез, бузук дээринен.

* * *
Ашык ичсең ууга каршы дарыны,
Уудан мурда ошол алат жаныңы.

Кыргызчалаган О.ШАКИР