*     *     *

... Кетем десе куштай учуп денемден,
Көрүнбөгөн жанды кантип токтотом.

*     *     *

... Ыр менен ыйласа ыйлап, күлсө күлдүм...

*     *     *

Мен күткөн мындан улуу бакыт болбойт,
Өзүңдө чирип жатса жиликтерим.

*     *     *

Көп күйөөдөн төрөгөн энеге эмес,
Көп балалуу атага орден берсек.

*     *     *

Акыркы өмүр бир угулган ышкырык,
Ошол замат жашап калуу канча улук!

*     *     *

Кандай гана эмчек көрсөң ийиген,
Өмүр менен дүйнө деп бил эриген.

*     *     *

Дүйнөдөгү эң бир бийик нерсени
десек болот – энелердин эмчеги!

*     *     *

Оозуң жетип өзүңдү өзүң бир өппөй,
Айыкпаган бир арманда кетесиң.

*     *     *

Башкалардан өзүмдү өзүм көп угуп,
Көрбөй жүрөм өзүмдү өзүм мен дагы.

*     *     *

Батып алып таш уядай чыкыйга,
Кантип жүргөн тойбос көзүм төгүлбөй?

*     *     *

Адам өзү кубангандан көбөйүп,
Калат тура кайгыргандан түгөнүп.

*     *     *

Ата деген атак алсам алармын,
Кайра дагы болмок белем аталуу.

*     *     *

Сактап келем карегимдей көзүмдүн,
Атамсың деп ушул жарык дүйнөнү.

*     *     *

Бутун өбөм чуркап өткөн чүрпөмдүн,
Чөпкө айланып сөөгүм жаткан аңыздан...

*     *     *

Топурактар – топураган өмүрлөр,
Биздин жашоо бүткөн анын үстүнө.
Өлүмдөрдү сүйүүлөргө айлантып,
Топурактар, топурактар – бүтдүйнө...

*     *     *

...Биздин сүйүү кызыл эт эмес беле,
Балапанды, капырай, кантип көмдүң?!

*     *     *

Тикен дагы тиктеттирет көгүндө,
Жыландын да сулуулук бар өңүндө.

*     *     *

Сактансаң да кокустуктан, кырсыктан,
Карылыктан айыктыраар дары жок.

*     *     *

Түлөк болуп туруп бербейт тууруңа,
Ошон үчүн булбулдардын тукуму аз...

*     *     *

... соо кезимде салам берчү эркек дос,
Жорго минип жолукпагын жоолукчан.

*     *     *

Менин сүйүүм – төгүлчү нөшөр,
Сен чыгуучу көктөмдөй төшөл?!

*     *     *

Адам болсоң туруштук бер турмушка,
Тамекидей күйүп жашайт чыдаган!..

*     *     *

Адам болуп артыңа из калтырбай,
Кыйын иш ээ бүчүр бойдон көмүлсөк.

*     *     *

Бул дүйнөгө акындын көз карашы -
Башкаларды баласындай баалашы.

*     *     *

Күрөшөсүң турмуш менен мелдешип,
Достон мурун каска көнгүн элдешип.

*     *     *

Сага жетип баш кошуунун өзү эле,
Өлүп кайра тирилгенге барабар.

*     *     *

Элди-жерди, кызыл нанды бөлсөк да,
Жүрөктөрдү бөлүп кете албайбыз.

*     *     *

Таттуу нанга, жыттуу нанга туш болгон,
Жүрөгүмөн бактылуу да курсагым.

*     *     *

Миң жалганды багындырып бир чындык,
Калыстык да өлүп кайра тирилет.

*     *     *

Маңдайыма үчүнчү көз бүтсө да,
Кереги эмне жүрөк таза болбосо...

*     *     *

Адам өзү ажалга окшош жасалган,
Ошондуктан адам өлөт адамдан.

*     *     *

Көрбөйсүң деп таштын көзүн чукуба,
Ал да өзүнчө көрүп турат дүйнөнү.

*     *     *

Өзүмдү толук сүйүп бүтө элекмин,
Өзүмө караштуусу: эл, жер, бүлө.

*     *     *

Күндөргө мүрзө кылып денебизди,
Биз дагы желип-желип эшилебиз.

*     *     *

Мына бакыт! Түбөлүккө өлбөймүн,
Уул-кызым - денемдин үзүндүсү.

*     *     *

Сезгентип сезимдерди себеби жок,
Тилиңди көк тикендей курчутпагын?!

*     *     *

Сүйүүң бышса, өнүп чыгат данектей,
Бир кутудан эки өмүрдүн үрөнү...

*     *     *

Өмүрлөр төгүлүшөт суудай болуп,
Өмүрлөр какшып калат суудай соолуп.

*     *     *

Жетип бүтпөс сапарларга чакырып,
Жол учунда жашайт жапжаш ак ойлор.

*     *     *

Ыйык болот актан – сүт, кызылдан – кан,
Эй, адамзат, ыйбаа кыл ыйыктыктан!

*     *     *

Өлсөк деле жерге өлүм жок тура,
Үстүбүзгө өсөт тура өсүмдүк.

*     *     *

Энчибизге бекитилген күндөр аз,
Мезгилдерге болбойлучу таштанды!

*     *     *

Мүрзө болуп ырларыма жүрөктөр,
Өзүм калам топуракка түйүлүп.
Ишенгиле!

*     *     *

Бөлүнбөсүн, бүлөң үйдө уктасын,
Чырын бассын, жылан үйүн бузбасын.

*     *     *

Өлтүрүүгө мүмкүн эмес сууну атып,
Өрттөөгө да мүмкүн эмес сүйүүнү!

*     *     *

Акындын ырдаганы – ыйлаганы,
(ыйлатып көрдүң беле кыйнап аны?..)
Жер менен кошо онтойт жамандыкта,
Ал үчүн оорубасын жердин жаны.

*     *     *

Бактысына суктанбагын бирөөнүн,
Алмашууга мүмкүн эмес гүл өңүн.

*     *     *

Тоодон түшүп келген менен тоң бойдон,
Ортосунда оргуштаймын чоң ойдун.

*     *     *

Этегиңе ороп алгын ата журт,
таштап кетем эмгектеген сүйүүмдү.

*     *     *

Бүгүн мага бүтүп жатат бүтүндүк,
Бул дүйнөдө болгум келбейт сындырым.

*     *     *

Эгер аксам тоону карай агамын!

*     *     *

Жашаган соң сүйүлбөсөң, сүйбөсөң,
бул жашоонун кереги жок эч кимге.

*     *     *

Көрөт баарын, билет баарын, а бирок,
киши билбейт качан, кантип өлөөрүн.

Топтогон “РухЭш” сайтынын “Нуска” котормочулар тобунун мүчөсү Мээрим САЙДИЛКАН