***

Өчүртө албай жүрөт кээси ТикТокту,

Парламентте карар башка иш жокпу?!

***

“Элитабыз” – ичи көңдөй жаңгактай.

Элибизчи?.. Жеңил учкан камгактай!

***

Тыйса болбой тууй берген катындай,

Коррупция, сенде кандай жатын бар?

***

Эл баатыр көп, куу бирок:

Коён жүрөк, суу жүрөк.

***

Жазуучулар, акындар, манасчылар, төкмөлөр,

Зулум бийлик алдында – тебеленген чөпсүңөр!

***

Мааниси жок төгө берген жаан, кардай:

Мамлекеттик капкайдагы наамдар бар!

***

Кемпайларды добуш берип шайламай –

Кем акылга, кекиртекти майламай!

***

Эл ишенип далайларга мандатты,

Өз тумшугун өзү канча каңдатты?..

***

Канчалары болгон менен министр,

Калк жыргачу эмне кылып ийиптир?

***

Аксакалдар – мокок, эски бычактай, -

Атпай журтка буюрбаган нысаптай.

***

Жарык өчкөн эч кеп эмес ГЭСинен,

Жарык өчпө, элдин акыл-эсинен!

***

Күзөтчүлөр күнү-түнү абакта,

Күлүп гана тургандары жагат да.

***

Алмурутту карс чайнасам тамшанып,

Маңдай тишти кетти кошо каңтарып!

***

Темир тордо көп эңседим сексти,

Ушул жаза мага абдан жетишти!

***

Бычак бербейт абак жайдын ичинде.

Айлаң жоктон: ишенген күч – тишиңде.

***

Кенен оонап уктар элем адатта,

Керебетим кең болсо не абакта!

***

Темир тордо болуш керек митайым...

Тегиң сактап, кетпеш үчүн ит абийр.

***

Бийлик ээрден канча кулап, алмашты?

Бирок соттор куюшканга жармашты!

***

Жемкор соттор кабат-кабат карынбы?

Сасып жыты, жууса кеткис калыңбы?

***

Качанкы бир бала кездей шоктонгон,

Калтаарыбайм мен эч качан соттордон.

***

Кагыш керек кош бийликтин тизгинин,

Калк болгон соң намыстанып биз бүгүн!

***

Эл бийликке коё албаса талапты,

Ээсиз бийлик койбойт көнгөн адатты.

***

Такылдаса кошоматчы теледен –

Талтайганы ашып кетет желеден.

***

Жалкыбаган элбиз бийлик калпынан,

Жамандайбыз кийин сөгүп артынан.

***

Ушу бизде кадрлар көп эптеген,

Унитазда калкып заңдай кетпеген.

***

Саясатчы токтобогон колдогу

Самын сымал – бир карасаң полдогу.

***

Бир кызматта ким отурса узакка,

Бир күн өзү түшөт билбей тузакка.

***

Капаста куш унуткандай учканды,

Калк унутат өз тарыхын тутканды.

***

Кашаң жылкы камчы көрсө жалтактайт,

Калк кул мүнөз – бийлигине жалпактайт.

                                      01.10.23