Бир жолу атактуу мистиктин окуучуларынын биринен:

– Устатыңыз эмне үчүн мистикалык жөндөмүн жашырат? Биз көп маалымат чогулттук, жана анын чындыгынан эч шектенбейбиз. Аны бир эле учурда далай жерден көрүүгө болот; ооруларды дуба менен айыктырат, бирок бул табигый күчтөрдүн таасири экенин айтып, адамдарды кыйынчылыктан чыгарууга түрткү гана берерин, ал эми айыгып кеткен оорулуулар жөн гана жолдуу адамдар деп ырастайт. Ал эмнеге мындай кылат?  

– Эмне айткыңыз келгенин жакшы түшүндүм, – деп жооп берди шакирт, – анткени өзүм да буга күбөмүн. Сиздин суроого жооп бере алам деп ойлойм. Биринчиден, устат элдин көңүл борборунда болуудан качат. Экинчиден, ал адамдар сыйкырга кызыгып алса, алар чындап руханий мааниге ээ касиетти үйрөнүүгө болгон каалоосун дароо жоготот деп ишенет, – дептир.

Кемчиликсизди издөө

Бир жолу базарда Кожо Насреддин эски досу менен кезигип калды. Ал үйлөнмөк болуптур. Досу Насреддиндин качан үйлөнөрүн сурап калды. Ал мындан көп жыл мурда эле үйлөнсөм деп ойлоп, кемчиликсиз колукту издей баштаганын айтат.

– Алгач, Дамаск шаарынан теңдешсиз сулуулукка ээ аялды таптым, бирок жакын арада анын руханий дүйнөсү жакырлыгын билдим. Андан соң Исфаханга бардым, ал жерде жан-дүйнөсү да, келбети да өзгөчө сулуу аял менен тааныштым, тилекке каршы, аягы аны менен мамилебиз келишпеди. Акыры Каирде таптым аны, — деди Кожо. — Ал төгөрөгү төп аял болуп чыкты: жан-дүйнөсү бай, назик, сулуу, жагымдуу. Кыскасы, эч кемчиликсиз.

— Сен ага үйлөндүңбү анан? — деп сурады досу.

— Жок, — деп жооп берди Кожо. — Тилекке каршы, ал да кемчиликсиз эркекти издеп жүрүптүр.

Сурабайт элең

Бир дервиш базарда олтурса, бай жигит садага кылып ага чоң акча берди да:

— Урматтуум, мага кеңешиң керек эле. Мага бир кыз жагат. Аябай. Эмне кыларымды билбей кыйналып жүрөм. Ага үйлөнсөмбү же үйлөнбөй койгонум оңбу?

— Үйлөнбө.

— Эмнеге?!

— Эгер чын эле кааласаң, минтип сурабайт элең.

Мен бактылуулукту тандайм

Устат Бахауддин өмүр бою жүзүнөн жылмаюу кетпей, ар дайым бактылуу адамдай жүрчү. Ага ар бир күн майрам эле. Ал өлүм алдында жатканда да кабагын бүркөгөн жок. Ажалдын келишин күткөндөй жылмайып жатты. Жанында олтурган шакирттеринин бири ага суроо узатты:

– Эмнеге жылмайып жатасыз? Өмүр бою кайгырганыңызды көргөн жокпуз, буга кантип жетиштиңиз? Ал тургай өлүм алдында да жылмайып жатасыз.

Карыя мындай жооп узатты:

– Көп жылдар мурда мен дагы он жетидеги, бирок дайыма бир нерсеге кайгырып жүргөн жаш жигит элем. Устатым жетимиш жашында да эч себепсиз күлүп жүрчү. Мен андан себебин сураганда минтип жооп берген:

– Мен эркин адаммын, тандоом өз эркимде. Ар бир таңда өзүмө суроо берем: бүгүн эмнени тандасам? Бактылуу болуунубу же бактысыздыктыбы? Ошентип күндө эртең менен бактылуулукту тандаган болом, бул өзү табыгий эмеспи.

Жалган жөндөмдөр

Күндөрдүн биринде Хасан ойчулдар чөйрөсүндө отурган атактуу сопу олуя Рабияга жолугуп, мындай дейт:

– Менин суу үстү менен басууга жөндөмүм бар. Келиңиз, тигил көлгө барып, анын үстүндө отуруп, рухий кептен сүйлөшөлү.

Рабия ага мындай жооп берди:

– Эгер өзүңүздү бул эң татыктуу чөйрөдөн бөлгүңүз келсе, эмне үчүн абада отуруп сүйлөшпөйбүз?

– Муну кылалбайм, анткени сиз айткан касиет менде жок, – деди Хасан. – Сиздин сууга чөкпөгөн жөндөмүңүз – балыкта да бар. Менин абада учуу жөндөмүмдү чымын да жасай алат. Бул жөндөмдөр анык чындыктын бөлүгү эмес жана рухий бийиктикке эмес, өзүн өзү көтөрүүгө жана атаандашууга гана негиз боло алат.

Өйдө тур

– Устат, эгерде менин жыгылганымды көрсөңүз эмне дейт элеңиз?

– Өйдө тур!   

– А кайра жыгылсамчы?

– Өйдө тур!

– А канча жолу жыгылып, кайра турса болот?

– Өлүп калмайынча өйдө турганыңды койбо! Жыгылып тура албагандар – өлүк жандар.

Булак: https://www.oum.ru/literature/pritchi/sufiyskie-pritchi/urok-sosredotocheniya/

Которгон Абийрбек Абыкаев

Эгер «РухЭш» сайтынын ишмердиги токтоп калбашын кааласаңыз, бизди колдоо үчүн төмөнкү банктык эсебибизге өз каалооңузга жараша акча которо аласыз... Мбанк + 996 700 53 25 85 жана Оптимабанк-4169585341612561.