ЖАЗ

Бороон төгүп көп күндөр,
Булуттардан жаш тамат.
Кызыл-тазыл, көк гүлдөр
Кар астынан баш багат.

Байкап ойдуң, түздөрдү,
Байчечекей теребиз.
Алып келген гүлдөрдү
Апаларга беребиз.

Биргелешип бул таңда,
Бак бооруна чыгабыз.
Учуп келген куштарга
Уя белек кылабыз.

ЖАЙ

Күнгө кактап денени,
Көлдө сүзөм жайында.
Кабар алам мен эми,
Чоң энем бар айылда.

Даамы ширин өрүктүн,
Кагып жедим бышканын.
Көрктүү кылып көл үстүн
Көрдүм ак куу учканын.

Эс алганы чыгышкан
Биздин үйдө баары бар.
Эч жашынбай ысыктан
Бал чогултат аарылар.

КҮЗ

Түшүм жыйнап жеринен
Баба дыйкан жанданат.
Келгин куштар четинен
Кетүү үчүн камданат.

Бара жатат айдоодо
Трактордун сокосу.
Семириптир жайлоодо
Сары төөнүн ботосу.

Бешке толгон дептерим
Бүгүн кайра жаңырат.
Күтүп жүргөн мектебим
Күз келгенде ачылат.

КЫШ

Аппак болуп туш тарап,
Баары турат жай гана.
Балдар көрүп суктанат
Айнектеги саймага.

Эски тамдын бурчуна
Ээрчип чыкты агасын.
Күлкү келди ууртуна
Көргөн кезде чанасын.

Кар бүртүгү асмандан
Жерге карай жарышат.
Анда үйлөр ак кардан
Калпак кийип алышат.

БИРИМДИК

Бою кыска, өзү жоон,
Бармак болот биринчи.
Сөз айтылса кыймылдап
Сөөмөй болот кийинки.

Үчүнчүсү ортоң кол,
Үлкөн боюн карашат.
Төртүнчүнүн аты жок
Түрдүү шакек жарашат.

Бешинчиси эң кичүү,
Баары аны жоктошот.
Чыпалагын тийгизип
Чырдашкандар достошот.

Ынтымакта жүрүшсө
Бекем болот бир билек.
Ырга айланган беш манжа
Биримдикти билдирет!

ЖОМОК

Чоң шаар курса бир бала,
Аксакал өтөт айланып.
Акыл сөз айтса тим гана
Ага да калат таңданып.

Куйругу жок сүлөөсүн
Түлкүгө калды алданып.
Мойнуна албайт күнөөсүн
“Мен эмес” –дейт да карганып.

Чынында ата кесиби,
Чыкпасын уулум ал эстен.
Уялайт бириң экини
Уурулук менен алектен.

Кыдырып жердин ар четин
Куш келет учуп ал бачым.
Утуру эле чал-кемпир
Уурдата берет алмасын.

Жомоктордун баарысын
Чыгырбайбыз биз эстен.
Ар күн сайын жаңысын
Айтып берет китептен.

АЛМАШЫП КАЛГАН ЭМЕСПИ

Көргөн жан дароо таң калган
Көлөмү көзгө байкалган.
Адамдар жүрсө ат минип
Атты өңөргөн ал балбан.

Кыйлага даңкы бөлөнүп,
Кыйын иш дебей көшөрүп.
Төө ашуу боорун белестеп
Тулпарын чыккан көтөрүп.

Борбордон көрүп эстелик,
Бир турист мындай дебеспи:
Андагы атка кез келип,
Алмашып калган эмеспи...

Намысын, наркын беришпейт,
Нак ушул кыргыз балбаны.
Ааламда башка кезикпейт
Ат мине берсин калганы.

САЯПКЕР

Аткара албас канча адам,
Айырмасы башкадан.
Тилин таап жылкынын
Тулпар кылып таптаган.

Белгиленген мерчемин
Бирдей берип жем-чөбүн.
Аргымак деп өткөрөт
Ай-мезгилдин эң көбүн.

Мүдүрүлбөй алыска,
Мыкты чуркап жарышса.
Жалпы элди кубантып
Жарап берет намыска.

Жеңиш үчүн талапкер,
Жаныбарды карап бер!
Ата Журттун сыймыгы
Ат таптаган САЯПКЕР.

БОЗ ҮЙ

Муздаганча ысык чай,
Мүмкүн жыйнап үлгүрүү.
Керемет үй кызыктай:
Кереге, уук, түндүгү.

Коломтосу тап берип,
Кыш чилдесин жылыткан.
Жайда тиксең апкелип
Жанды коргойт ысыктан.

Багын ачып уул-кыздын
Боз үй “КУТ” деп саналган.
Ак жүрөктүү кыргыздын
Акылынан жаралган.

Эгер «РухЭш» сайтынын ишмердиги токтоп калбашын кааласаңыз, бизди колдоо үчүн төмөнкү банктык эсебибизге өз каалооңузга жараша акча которо аласыз... Мбанк + 996 700 53 25 85 жана Оптимабанк-4169585341612561.